الماتىدا 10 ساۋىردەن باستاپ 6 مامىرعا دەيىن جالعاساتىن “ءجاسوسپىرىم” رەسپۋبليكالىق جەدەل-پروفيلاكتيكالىق ءىس-شاراسى وتۋدە.
ونىڭ نەگىزگى ماقساتى – كامەلەتكە تولماعاندار اراسىنداعى قۇقىق بۇزۋشىلىقتىڭ الدىن الۋ، پاناسىز جانە قاراۋسىز قالعان جاسوسپىرىمدەردى انىقتاۋ، وتباسىلار مەن جاستارمەن پروفيلاكتيكالىق جانە تاربيەلىك جۇمىستاردى جۇرگىزۋ. ءىس-شارانىڭ العاشقى بەس كۇنىندە قالالىق پوليسەيلەر ناقتى ناتيجەلەرگە قول جەتكىزدى، دەپ حابارلايدى aqshamnews.kz.
— وسى كەزەڭدە يۋۆەنالدى پوليسيا بولىمشەلەرى 814 اكىمشىلىك قۇقىق بۇزۋشىلىقتى انىقتادى. تۇنگى ۋاقىتتا ەرەسەكتەردىڭ قاراۋىنسىز جۇرگەن 731 ءجاسوسپىرىم ۇستالدى. وسى ءۇشىن ق ر اقبتك-نىڭ 442-بابى بويىنشا 642 زاڭدى وكىل جاۋاپقا تارتىلدى. ومىرلىك قيىن جاعدايعا تاپ بولعان 19 كامەلەتكە تولماعان ءجاسوسپىرىم بالالاردى قولداۋ ورتالىعىنا ورنالاستىرىلدى. سونداي-اق قوسىمشا باقىلاۋدى قاجەت ەتەتىن 22 اتا-انا مەن 14 ءجاسوسپىرىم ەسەپكە الىندى. اتا-انالىق مىندەتتەرىن تيىسىنشە ورىنداماعانى ءۇشىن بارلىعى 67 ادام جاۋاپقا تارتىلدى، - دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ.
كوڭىل كوتەرۋ ورىندارىنا، ينتەرنەت كلۋبتارعا جانە جاسوسپىرىمدەر كوپ جينالاتىن ورىندارعا ەرەكشە نازار اۋدارىلادى. بەس كۇن ىشىندە 121 مەكەمە تەكسەرىلىپ، 15 جاعدايدا كامەلەتكە تولماعانداردى تۇنگى ۋاقىتتا كىرگىزگەن عيماراتتىڭ اكىمشىلىگى جاۋاپكەرشىلىككە تارتىلدى.
— جۇمىس قالانىڭ ءار اۋدانىندا جۇيەلى تۇردە جۇرگىزىلۋدە. ءبىز ءبىلىم جانە باسقا دا قۇرىلىمداردىڭ وكىلدەرىمەن تىعىز بايلانىستا جۇمىس ىستەيمىز. ەڭ باستىسى جازالاۋ ەمەس، دەر كەزىندە ارالاسىپ، كەلەڭسىزدىكتەردىڭ الدىن الۋ. الدىن الۋ جىلى اياسىندا بۇل جۇمىس ودان ءارى جاندانا تۇسەدى، - دەدى سەرىك شۋمايەۆ.
پوليسيا قىزمەتكەرلەرى، اتا-انالار مەن زاڭدى وكىلدەرىن بالالارىنىڭ بوس ۋاقىتىن ءتيىمدى وتكىزۋگە جانە ولاردىڭ ارالاساتىن ورتاسىنا كوبىرەك كوڭىل بولۋگە شاقىرادى.