سپورتشىلار 4 جىلدان بەرى سينحروندى سەكىرۋدەن سىنعا ءتۇسىپ كەلەدى
ءازىربايجان استاناسى باكۋدە ءوتىپ جاتقان الەم چەمپيوناتىندا قازاقستاندىقتار رومان باركوۆ پەن يگور گراچوۆ سينحروندى سەكىرۋدەن التىن مەدال جەڭىپ الدى، دەپ حابارلايدى Almaty-akshamy.kz.
ق ر ۇلتتىق وليمپيادا كوميتەتىنەن ءمالىم ەتكەندەي، سپورتشىلار 17-21 جاس ارالىعىنداعى توپتا سىنعا تۇسكەن. ولار قارسىلاستارىنا ەش مۇمكىندىك قالدىرماي، جەڭىسكە جەتتى. ەكىنشى ورىندى فرانسيا يەلەنسە، قولا مەدال بەلارۋس وكىلدەرىنە بۇيىردى.
گراچوۆ پەن باركوۆ وسكەمەن قالاسىنىڭ وكىلدەرى، قازاقستان ۇلتتىق قۇراماسىنىڭ مۇشەلەرى. فەدور بۋلۋچيەۆسكيي مەن يگور ياكوۆليەۆتىڭ قول استىندا جاتتىعادى.
سپورتشىلار 4 جىلدان بەرى سينحروندى سەكىرۋدەن سىنعا ءتۇسىپ كەلەدى. بۇل - ولاردىڭ الەم چەمپيوناتىنداعى العاشقى مەدالى.
ەسكە سالايىق، بۇعان دەيىن 11-12 جاستاعىلار اراسىندا اكروباتيكالىق جولدا سەكىرۋدەن التىن مەدالدى قازاقستاندىق يسلام قابدوللوۆ جەڭىپ العان بولاتىن.