دۇيسەنبىدەگى اۋا رايى بولجامى

الماتى وبلىسىنىڭ الاكول اۋدانىندا جەلدىڭ ەكپىنى 28 م/س كۇشەيەدى

29 قاراشادا رەسپۋبليكانىڭ باسىم بولىگى ءالى دە اۋقىمدى انتيسيكلون ىقپالىندا بولادى. سوعان بايلانىستى جاۋىن-شاشىنسىز اۋا رايى كۇتىلەدى. ەلدىڭ تەك قيىر باتىسىندا سيكلون جىراسىنىڭ اسەرىنەن جاڭبىر مەن قار تۇرىندەگى ازداعان جاۋىن-شاشىن، كوكتايعاق بولادى. سونىمەن قاتار بارلىق وڭىردە تۇمان، ەكپىندى جەل بولجانادى، دەپ حابارلايدى Almaty-akshamy.kz «قازگيدرومەت» رمك-عا سىلتەمە جاساپ.

اتاپ ايتقاندا، جامبىل وبلىسىنىڭ تاۋلى جانە تاۋ بوكتەرىندەگى اۋداندارىندا تۇمان كۇتىلەدى، سولتۇستىك-شىعىسىندا جانە تاۋلى اۋداندارىندا 15-20 م/س ەكپىنمەن جەل تۇرادى. تۇندە جەلدىڭ كۇشى 23-28 م/س ارتادى.

الماتى وبلىسىنىڭ الاكول اۋدانىندا جەلدىڭ ەكپىنى 28 م/س كۇشەيەدى. شىعىس قازاقستان وبلىسىنىڭ جارما اۋدانىندا جەل 15-20 م/س جەتەدى. باتىس قازاقستان وبلىسىنىڭ سولتۇستىك-باتىسىندا، سولتۇستىگىندە كوكتايعاق، سولتۇستىگىندە تۇمان كۇتىلەدى.

تۇركىستان وبلىسىنىڭ وڭتۇستىگىندە، ماڭعىستاۋ، قوستاناي وبلىستارىنىڭ سولتۇستىگىندە، اتىراۋ وبلىسىنىڭ باتىسى مەن ورتالىعىندا تۇمان بولجانادى.

ەسكە سالايىق، سينوپتيكتەر 4 وڭىردە ەسكەرتۋ جاريالاعان بولاتىن.