بالالاردى ەسىرتكىدەن قالاي قورعايمىز: اتا-انالارعا ءقاۋىپ بەلگىلەرىن تانۋ جولدارى ءتۇسىندىرىلدى

استاناداعى International Steppe School مەكتەبىندە جاڭا، ينتەراكتيۆتى فورماتتا اتا-انالار جينالىسى ءوتتى.

جينالىستىڭ باستى تاقىرىبى - بالالار مەن جاستاردى ەسىرتكىدەن قورعاۋ بولدى، - دەپ حابارلايدى Aqshamnews.kz.

جينالىس ق ر ءىىم ەسىرتكى قىلمىسىنا قارسى ءىس-قيمىل كوميتەتى مەن پرەزيدەنت جانىنداعى جاستار ساياساتى جونىندەگى كەڭەستىڭ بىرلەسكەن جۇمىسى اياسىندا ۇيىمداستىرىلدى. بۇل جيىندا رەسمي باياندامانىڭ ورنىنا اشىق ديالوگ بولدى، قۇرعاق ستاتيستيكا ورنىنا ناقتى مىسالدار كەلتىرىلدى.

سونىمەن قاتار اتا-انالار مەن جاسوسپىرىمدەرگە ءتونىپ تۇرعان ناقتى قاۋىپتەر تۋرالى اشىق اڭگىمە ءوربىدى.

جينالىس بارىسىندا ماماندار تومەندەگىلەردى ەگجەي-تەگجەيلى ءتۇسىندىردى:

كامەلەتكە تولماعانداردى زاڭسىز ەسىرتكى اينالىمىنا تارتۋدىڭ قازىرگى ادىستەرى؛

ەسىرتكى قولدانۋدىڭ سىرتقى جانە مىنەز-قۇلىققا ءتان بەلگىلەرى؛

اتا-انالارعا دەر كەزىندە بالالارعا كومەك كورسەتۋدىڭ ماڭىزى.

جينالىستا اتا-انالاردى "تەست ءار ۇيگە" پروفيلاكتيكالىق فورماتى ەرەكشە قىزىقتىردى. ولارعا بۇل تەكسەرۋدى ءوز بەتىمەن، جىلدام جانە قولجەتىمدى تۇردە جۇرگىزۋگە بولاتىنى تاجىريبە جۇزىندە كورسەتىلدى.

 بۇل قۇرال پروفيلاكتيكانىڭ نەگىزى — وتباسىنان باستالاتىنىن ايقىن كورسەتتى. نەگىزگى بولىمنەن كەيىن زال بىردەن تارامادى. اتا-انالار بەلسەندى سۇراق قويىپ، جەكە باقىلاۋلارى مەن قيىن جاعدايلاردى تالقىلادى، سونىمەن قاتار پروفيلاكتيكالىق جۇمىستى كۇشەيتۋگە ءوز ۇسىنىستارىن ايتتى.

ءتيىمدى پروفيلاكتيكا — قورقىتۋ نەمەسە فورمالدى ەسەپ ەمەس. بۇل — سەنىم، اقپاراتتاندىرۋ جانە ورتاق جاۋاپكەرشىلىك. ءىىم ەسىرتكى قىلمىسىنا قارسى ءىس-قيمىل كوميتەتى وسىنداي فورماتتاردى ءارى قاراي دا دامىتۋدى جوسپارلاپ وتىر. جينالىستار تەك ەلوردادا ەمەس، ەلىمىزدىڭ بارلىق وڭىرىندە وتكىزىلەدى.