قازاقستان پرەزيدەنتىنىڭ پايىمداۋىنشا، جاھاندىق سۋ ديپلوماتياسىن دامىتۋدا مەملەكەتتەر اراسىنداعى ىقپالداستىقتىڭ ماڭىزى زور.
بۇل تۋرالى قازاقستان پرەزيدەنتى تۇرىكمەنستانداعى فورۋمدا ايتتى، - دەپ حابارلايدى Aqshamnews.kz.
– بۇۇ جۇيەسىندە تەك سۋ ماسەلەسىمەن اينالىساتىن ارناۋلى قۇرىلىم جوق. بۇل تۇيتكىلدى تەز ارادا شەشكەن ءجون. قازاقستان حالىقارالىق سۋ ۇيىمىن قۇرۋدى ۇسىنادى. سول ارقىلى بۇۇ اياسىنداعى ءتۇرلى ۇيىمداردىڭ بارلىق مانداتىن ءبىر ماقساتقا جۇمىلدىرۋعا بولادى. UN-Water ۆەدومستۆوارالىق تەتىگىن بۇۇ-نىڭ تولىققاندى ارناۋلى اگەنتتىگىنە نەمەسە ۇيىمىنا اينالدىرۋ وڭتايلى شەشىم بولار ەدى. مۇنداي باستامانى ىسكە اسىرۋ بۇۇ-نىڭ ورنىقتى دامۋ ماقساتتارى مەن بارشا حالىقارالىق قوعامداستىقتىڭ مۇددەسىنە ساي كەلەدى. كەلەسى جىلى ءساۋىر ايىندا استانادا ايماقتىق ەكولوگيالىق سامميت وتەدى. اتالعان جيىندا قازاقستان جاھاندىق سۋ ۇيىمىن قۇرۋ تۋرالى حالىقارالىق كونسۋلتاسيا پروسەسىن باستاۋعا نيەتتى. ورتاق ساياسي ەرىك-جىگەردىڭ ارقاسىندا كۇن تارتىبىندەگى سۋدىڭ وزەكتى ماسەلەلەرى جۇيەلى تۇردە شەشىلە باستايتىنىنا سەنىمىم كامىل، – دەدى مەملەكەت باسشىسى.
قازاقستان پرەزيدەنتى ءسوزىن قورىتىندىلاي كەلە، اشحاباد فورۋمى مۇددەلى مەملەكەتتەردىڭ جاسامپاز سەرىكتەستىگىن نىعايتۋعا جانە الەمدە ادىلەتتى ءتارتىپ قالىپتاستىرۋدى كوزدەيتىن حالىقارالىق كۇش-جىگەرگە تىڭ سەرپىن بەرەتىنىنە سەنىم ءبىلدىردى.