الماتى قالاسىنىڭ اكىمى دارحان ساتىبالدى تۇركسىب اۋدانىن جۇمىس ساپارىمەن ارالاپ، قالالىق ورتانى جاقسارتۋعا جانە تۇرعىنداردىڭ ءومىر ءسۇرۋ ساپاسىن ارتتىرۋعا باعىتتالعان نەگىزگى اۋماقتاردى كورىكتەندىرۋ جوسپارلارى جانە جوبالارىمەن تانىستى، - دەپ حابارلايدى Aqshamnews.kz.
جۇمىس ساپارى اياسىندا قالا اكىمىنە «قاسبەتتەن قاسبەتكە دەيىن» قاعيداتى بويىنشا شولوحوۆ كوشەسىن ءسۇيىنباي دايڭعىلىنان ەرجانوۆ كوشەسىنە دەيىنگى ارالىقتا ورتاشا جوندەۋ جوسپارى تانىستىرىلدى. بۇل اۋماقتا اۋداننىڭ ەڭ جۇكتەمەسى جوعارى كوشەلەرىنىڭ ءبىرىن كەشەندى كورىكتەندىرۋ كوزدەلگەن. جوبا اياسىندا جول جانە جۇرگىنشى ينفراقۇرىلىمىن جاڭارتۋ، سىرتقى جارىقتاندىرۋدى جاڭعىرتۋ، ساۋلەتتىك نىساندار ورناتۋ، جاسىل ايماقتى دامىتۋ جانە كوشە جيھازدارىن ورنالاستىرۋ جوسپارلانىپ وتىر. قۇرىلىس-مونتاج جۇمىستارى 2026 جىلعا بەلگىلەنگەن.
سونداي-اق مايبورودا كوشەسىندە سەيفۋللين داڭعىلىنان بايكالسكايا كوشەسىنە دەيىن جۇرگىنشىلەر ايماعىن قۇرۋ ماسەلەسىنە ەرەكشە نازار اۋدارىلدى. جوبا تروتۋارلاردى كورىكتەندىرۋدى، شاعىن ساۋلەت نىساندارىن ورناتۋدى، كوگالداندىرۋ جۇمىستارىن جۇرگىزۋدى جانە سەرۋەندەۋگە قولايلى قوعامدىق كەڭىستىك قالىپتاستىرۋدى قامتيدى. جوبانى ىسكە اسىرۋ كەزەڭ-كەزەڭىمەن جوسپارلانىپ وتىر.
دارحان ساتىبالدى تۇرعىنداردىڭ جايلىلىعىنا باعىتتالعان زاماناۋي، ءقاۋىپسىز ءارى كورىكتەندىرىلگەن قالالىق ورتانى قالىپتاستىرۋدىڭ ماڭىزىن اتاپ ءوتتى. اتالعان جوبالاردى ىسكە اسىرۋ كولىك بايلانىسىن جاقسارتۋعا، اۋداننىڭ تۋريستىك تارتىمدىلىعىن ارتتىرۋعا، سونداي-اق كاسىپكەرلىكتى دامىتۋ ءۇشىن قوسىمشا مۇمكىندىكتەر جاساۋعا ىقپال ەتەدى.
تۇركسىب اۋدانىندا جۇرگىزىلىپ جاتقان جۇمىستار قالا ينفراقۇرىلىمىن جاڭعىرتۋ جانە قالالىق ورتانىڭ ساپاسىن ارتتىرۋعا باعىتتالعان.
