قازاقستان وڭىرلىك اۆياسيالىق حابتى قالىپتاستىرۋ ءۇشىن كادرلار دايىندىعىن كۇشەيتۋدە.
ازاماتتىق اۆياسيا اكادەمياسىندا كولىك ءمينيسترى مارات قارابايەۆ، عىلىم جانە جوعارى ءبىلىم ءمينيسترى ساياسات نۇربەك، سونداي-اق اۆياكاسىپورىندار مەن ارىپتەستىك ۇيىمداردىڭ باسشىلارىنىڭ قاتىسۋىمەن وقۋ-ادىستەمەلىك بىرلەستىكتىڭ كەڭەيتىلگەن وتىرىسى جانە سالالىق كەڭەس ءوتتى، دەپ حابارلايدى aqshamnews.kz.
كولىك مينيسترلگىنىڭ مالىمەتىنشە، قاتىسۋشىلار اۆياسيالىق پەرسونالدى دايارلاۋدىڭ ستراتەگيالىق باعىتتارىن، ءبىلىم بەرۋ باعدارلامالارىن حالىقارالىق ستاندارتتارعا بەيىمدەۋدى جانە سالاداعى كادر تاپشىلىعىن ەڭسەرۋ جونىندەگى شارالاردى تالقىلادى.
جىل سايىن سالاعا 600-دەن استام مامان قاجەت. ولاردىڭ قاتارىندا ۇشقىشتار، ينجەنەرلەر، ديسپەچەرلەر، لوگيستەر، قاۋىپسىزدىك جانە پيلوتسىز جۇيە ماماندارى بار.
«مەملەكەت باسشىسىنىڭ تاپسىرماسىنا سايكەس شقو-داعى زايسان جانە قاتونقاراعاي اۋداندارىندا ەكى جاڭا اۋەجاي قۇرىلىسىن باستاپ كەتتىك. وسىعان ۇقساس جۇمىستار ماڭعىستاۋ وبلىسىنداعى كەندىرلىدە دە باستالادى. بۇدان باسقا، ارقالىق قالاسى اۋەجايىنىڭ قىزمەتىن قالپىنا كەلتىرۋ قاجەت. جاڭا اۋەجايلار كەلەشەكتە 1 مىڭعا جۋىق تۇراقتى جۇمىس ورنىن قۇرۋعا مۇمكىندىك بەرەدى. بۇل ءۇشىن ارينە ءوز ءىسىنىڭ ماماندارى كەرەك» - دەدى مارات قارابايەۆ.
اكادەميا - قازاقستانداعى ICAO، IATA، AVSEC ستاندارتتارى بويىنشا ماماندار دايارلايتىن جالعىز جوعارى وقۋ ورنى. بۇگىنگى تاڭدا مۇندا باكالاۆرلار، ماگيسترلەر مەن دوكتورانتتاردى قوسقاندا 2000-نان استام ستۋدەنت وقيدى.
اكادەميا ءبىلىم بەرۋ مودەلىن ترانسفورماسيالاۋ بويىنشا نەگىزگى باستامالاردى ۇسىندى: EASA (Part-FCL جانە part-66) ستاندارتتارىن ەنگىزۋ، باعدارلامالاردى اعىلشىن تىلىندە ىسكە قوسۋ، ۇشقىشسىز اۆياسيالىق جۇيەلەر ورتالىعىن دامىتۋ، وقىتۋدى سيفرلاندىرۋ جانە دۋالدى فورماتتى كەڭەيتۋ.