مانەرلەپ سىرعاناۋدان قازاقستان قۇراماسىنىڭ كوشباسشىسى ميحايل شايدوروۆ بوستون (اقش) قالاسىندا ءوتىپ جاتقان الەم چەمپيوناتىنىڭ كۇمىس جۇلدەگەرى اتاندى.
قىسقا باعدارلامادان كەيىن قازاقستاندىق سپورتشى ءۇشىنشى ورىندا تۇرعان ەدى. ناتيجەسىندە ول ءوز كورسەتكىشىن جاقسارتىپ، جوعارى كوتەرىلدى، دەپ حابارلايدى aqshamnews.kz ۇوك-كە سىلتەمە جاساپ.
ەركىن باعدارلامادا شايدوروۆ تورەشىلەردىڭ شەشىمى بويىنشا 192،70 ۇپاي جينادى (جەكە رەكورد). جالپى ەسەپتە ول 287،47 ۇپايعا (جەكە رەكورد) قول جەتكىزىپ، جارىستى ەكىنشى ورىنمەن اياقتادى.
الەم چەمپيوناتىنىڭ التىن مەدالىن قاتارىنان ەكىنشى رەت امەريكالىق يليا مالينين جەڭىپ الدى – 318،56 ۇپاي. ال جاپونيالىق يۋما كاگياما ۇزدىك ۇشتىكتى قورىتىندىلادى – 278،19 ۇپاي.
ايتا كەتەيىك، شايدوروۆ ەرەسەكتەر اراسىنداعى الەم چەمپيوناتىندا ءوز مانسابىنداعى ەڭ ۇزدىك ناتيجەسىن كورسەتتى. بۇعان دەيىن ونىڭ قورجىنىندا جاسوسپىرىمدەر اراسىنداعى الەم چەمپيوناتىنىڭ كۇمىس جۇلدەسى بولعان. سونداي-اق، بيىلعى ماۋسىمدا ول 2025 جىلعى ازيا ويىندارىندا قولا مەدال ەنشىلەپ، ءتورت قۇرلىق چەمپيوناتىندا التىن جۇلدە جەڭىپ الدى.
مانەرلەپ سىرعاناۋشى 2026 جىلعى وليمپيادا ويىندارىنا قاتىسۋ ءنورماتيۆىن ورىندادى. ول ءۇشىن سپورتشى الەم چەمپيوناتىندا ۇزدىك 24 سپورتشىنىڭ قاتارىنا ەنۋى قاجەت بولاتىن.
قازىرگى ۋاقىتتا ISU تاراپىنان وليمپياداعا جولداما العان سپورتشىلاردىڭ رەسمي ءتىزىمى جاريالانۋى كۇتىلۋدە.