اۋىر اتلەتيكادان قازاقستان ۇلتتىق قۇراماسىنىڭ باس باپكەرلەرى تاعايىندالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قازاقستان اۋىر اتلەتيكا فەدەراسياسى ءمالىم ەتكەنىندەي، ەرلەردى نۇرجان سماحانوۆ، ايەلدەردى يۆان سيۆوحين باستاعان ماماندار جاتتىقتىراتىن بولدى.
بۇدان بۇرىن فەدەراسيا ۇلتتىق وليمپيادا كوميتەتى، سونداي-اق مادەنيەت جانە سپورت مينيسترلىگىمەن كەلىسە وتىرىپ، قازاقستان ۇلتتىق قۇراماسىن ەكى كومانداعا – ەرلەر مەن ايەلدەرگە ءبولىپ باسقارۋ تۋرالى شەشىم قابىلداعان بولاتىن.
«نۇرجان داۋرەنبەك ۇلى مەن يۆان پاۆلوۆيچ ەكەۋى دە – جوعارى بىلىكتى ماماندار. قۇراما كوماندادا جۇمىس ىستەگەن تاجىريبەسى بار. الداعى ۋاقىتتا دا ناتيجە شىعاراتىنىنا سەنەمىن. كوماندالار بيىلعى العاشقى وقۋ-جاتتىعۋ جيىنىنا كىرىستى. ەلدەگى ەپيدەميولوگيالىق احۋالدىڭ ناشارلاۋىنا بايلانىستى دەنساۋلىق جاعدايىمەن بارلىق سپورتشىلار تۇگەل قاتىسا المادى. دەگەنمەن 13 اقپاندا باستالاتىن ەكىنشى جيىنعا قوس كوماندا دا تولىق قۇرامدا كەلەدى دەپ ۇمىتتەنەمىز»، - دەدى فەدەراسيانىڭ باس حاتشىسى الديار نۇرالينوۆ.