الماتى اكىمى دارحان ساتىبالدى 2025 جىلدىڭ III توقسانىندا «تازا قازاقستان» ەكولوگيالىق اكسياسىن ىسكە اسىرۋ بويىنشا كەڭەس وتكىزدى.
ەكولوگيا جانە قورشاعان ورتانى قورعاۋ باسقارماسىنىڭ باسشىسى ميراس گايسين بايانداعانداي، اكسيا اياسىندا سانيتارلىق تازالاۋ، كوركەيتۋ، كوگالداندىرۋ، كوشە ساۋداسىن باقىلاۋ جانە ەكولوگيالىق ءبىلىم بەرۋ سىندى 34 ءىس-شارا جوسپارلانعان. قالادا سەنبىلىكتەر ۇيىمداستىرىلىپ، قوقىس جاشىكتەرى ورناتىلىپ، جارىق تىرەكتەرى جۋىلىپ، اعاشتار ەگىلىپ جاتىر. جىل باسىنان بەرى @TazaQazBot ارقىلى 4100-دەن استام ءوتىنىش كەلىپ ءتۇستى.
اۋدان اكىمدەرى اتقارىلعان جۇمىستىڭ قورىتىندىسىن ۇسىندى. اۋەزوۆ اۋدانىندا اپتا سايىن سەنبىلىكتەر وتەدى، 1500-دەن استام اعاش وتىرعىزىلدى، 10 مىڭ تەكشە مەتردەن استام كوگالدار اباتتاندىرىلدى. جەتىسۋ اۋدانىندا وزەن ارنالارى تازارتىلدى، قوقىس ۇيىندىلەرى جويىلدى، بەينەباقىلاۋ كامەرالارى ورناتىلدى. تۇركسىب اۋدانىندا 51 سەنبىلىك وتكىزىلىپ، 4،6 مىڭ توننا قوقىس شىعارىلدى، 66 جاسىل ايماق اباتتاندىرىلدى جانە نەگىزگى كوشەلەر بويىندا كوركەيتۋ جۇمىستارى جالعاسۋدا.
«ءار كەڭەس وتكەن سايىن جۇمىستى باستاعان ەكەنسىڭدەر اياعىنا دەيىن جەتكىزىڭدەر دەپ ايتىپ كەلەمىن. قالادا قازىلعان جەرلەر جەتەرلىك، اسىرەسە جاسىل ايماقتاردا. اۋدان اكىمدەرى مۇنى جەكە باقىلاۋدا ۇستاڭىزدار»، - دەدى دارحان ساتىبالدى.
قوعامدىق دامۋ باسقارماسىنىڭ باسشىسى ايدار ەسەنبەكوۆ مەكتەپتەردەگى تازالىق ساباقتارىنان باستاپ ەتنومادەني بىرلەستىكتەردى تارتۋعا دەيىنگى ەكولوگيالىق مادەنيەتتى قالىپتاستىرۋ شارالارىن اتاپ ءوتتى.
«مەكتەپ، بالاباقشا، اۋرۋحانا جانە ەمحانا سىندى بارلىق مەملەكەتتىك مەكەمە اۋماعىنىڭ تازالىعىن قاداعالاپ وتىرۋعا ءتيىس. اسىرەسە، اۋرۋحانادا جاعداي ءماز ەمەس: لاس، اعاش قاراۋسىز قالدى. ەگەر باسشىلار قاراپايىم تازالىقتى قالىپتاستىرا الماسا، وندا جۇمىس ساپاسى تۋرالى نە ايتۋعا بولادى؟»، - دەدى قالا اكىمى.
قالا باسشىسى حالىقپەن تىعىز بايلانىس ورناتۋدىڭ جانە اۋداندار مەن ءتيىستى قۇرىلىمدار اراسىنداعى ۇيلەسىمنىڭ ماڭىزدىلىعىن اتاپ ءوتتى.
«قالانى ارالاعاندا بيۋدجەت اقشاسىنا سالىناتىن نىسانداردىڭ ايلار بويى اياقتالماي تۇرعانىن كورەمىن. بۇل بەلگىلەنگەن مەرزىمدى كەشەۋىلدەتەدى، شىعىنعا اكەلەدى جانە تۇرعىنداردىڭ نارازىلىعىن تۋدىرادى. مىسالى، اۆتوماتتى سۋارۋدى الايىق، ونىڭ قۇبىرلارى بىرنەشە اپتا بويى جول بويىندا جاتادى. بۇعان جول بەرۋگە بولمايدى. ەگەر مەردىگەر مىندەتىن ورىنداي الماسا، وندا كەلىسىمشارتتى بۇزىڭىز. اۋدان جۇمىسىنداعى ەڭ وزەكتى ماسەلە - تازالىق، كوگالداندىرۋ، جارىقتاندىرۋ»، - دەدى قالا اكىمى.
كەڭەس قورىتىندىسى بويىنشا دارحان ساتىبالدى ەكولوگيا باسقارماسىنا اكسيانى ىسكە اسىرۋ جونىندەگى ءىس-قيمىل جوسپارىن بەكىتۋدى جانە ونىڭ ورىندالۋىن باقىلاۋدى قامتاماسىز ەتۋدى، قوعامدىق دامۋ باسقارماسىنا - قالا تۇرعىندارىنا ەكولوگيالىق ءبىلىم بەرۋدى جانداندىرۋدى، ال اۋدان اكىمدىكتەرىنە ۇيىمداردى تارتا وتىرىپ، سەنبىلىكتەردى تۇراقتى تۇردە وتكىزۋدى جانە جاسىل جەلەكتەرگە كۇتىمدى كۇشەيتۋدى تاپسىردى. سونىمەن قاتار تازالىق يدەولوگياسى قالانى باسقارۋدىڭ كۇندەلىكتى تاجىريبەسىنە جانە ءار تۇرعىننىڭ ومىرىنە ەنۋى كەرەك ەكەنىن اتاپ ءوتتى.