الماتىنىڭ اۋەزوۆ اۋدانىندا بۇرىن جارىق جەلىلەرى مەن باعانا بولماعان 81 اۋماقتا العاش رەت سىرتقى جارىقتاندىرۋ جۇيەسى ىسكە قوسىلدى. بۇل تۇرعىندار ءۇشىن ماڭىزدى جاڭالىق. تالاي جىل بويى قاراڭعى بولىپ كەلگەن اۋلالار مەن كوشەلەر ەندى جارىق، جايلى جانە ءقاۋىپسىز بولا ءتۇستى. بۇل تۋرالى اۋەزوۆ اۋدانىنىڭ اكىمدىگى حابارلادى.
جوبانى «RKR Group and Co» ج ش س جۇزەگە اسىردى. ونىڭ اياسىندا 828 زاماناۋي شام ورناتىلدى: سونىڭ ىشىندە 507ء-ى كوشە بويىنا، 321ء-ى اۋلالارعا ارنالعان تورشەرلى شام. جاڭا ەلەكتر جەلىلەرىنىڭ جالپى ۇزىندىعى 15 شاقىرىمنان استى. بارلىق نەگىزگى جۇمىس اياقتالدى، مەردىگەر ۇيىم ۇساق-تۇيەك ەسكەرتۋلەردى رەتتەپ جاتىر.
بۇدان بولەك، ءالى دە جارىقتاندىرۋ تولىق قامتىلماعان اۋماقتارعا ەرەكشە كوڭىل ءبولىنىپ وتىر. اتاپ ايتقاندا، بۇل ساين، اباي، مومىش ۇلى، تولە بي، جاندوسوۆ جانە رايىمبەك سياقتى ءىرى ماگيسترالدار. بۇل كوشەلەردىڭ تولىق جارىقتاندىرىلۋى الماتى قالاسىنىڭ قوعامدىق كەڭىستىكتەردى دامىتۋ باسقارماسىنىڭ «قاسبەتتەن قاسبەتكە دەيىن» قاعيداتى بويىنشا ىسكە اسىرىلاتىن جوبالارى اياسىندا قامتاماسىز ەتىلەدى. ۋاقىتشا شەشىم رەتىندە مۇندا 203 كرونشتەين شامى ورناتىلعان.
«بۇل جوبا اۋداننىڭ دامۋى ءۇشىن ماڭىزدى قادام. ءبىز تەك شام ورناتۋمەن شەكتەلمەي، قالالىق ورتانىڭ ساپاسىن جاقسارتتىق. ەندى كوشە مەن اۋلا ءقاۋىپسىز ءارى زاماناۋي. بارلىق جوسپارلانعان جوبا اياقتالعان سوڭ اۋداننىڭ سىرتقى جارىقتاندىرۋ دەڭگەيى 100%-عا جەتەدى»، – دەدى اۋەزوۆ اۋدانى اكىمدىگىنىڭ كوممۋنالدىق شارۋاشىلىق ءبولىمىنىڭ باسشىسى ەرسۇلتان جۇماحانوۆ.