تۇركىستان وبلىسى كەلەس اۋداندىق سوتىندا دامۋىندا ەرەكشەلىگى بار 24 جاستاعى جىگىتتى زورلاۋ ىسىنە قاتىستى ۇكىم شىقتى، – دەپ حابارلايدى اqshamnews.kz ءتىلشىسى.
وقيعانىڭ ءمان-جايى
بۇل جاعداي 2025 جىلدىڭ ناۋرىزىندا “نەمولچي.kz” قورىنىڭ جازباسىنان كەيىن بەلگىلى بولدى. قور دەرەگىنشە، اقىل-وي قابىلەتى 4 جاستاعى بالانىڭ دەڭگەيىنە سايكەس كەلەتىن 24 جاستاعى ازامات بىرنەشە جىل بويى ءوز تۋىستارى مەن كورشىلەرىنەن ءجابىر كورىپ كەلگەن.
جابىرلەنۋشىنىڭ اناسى زورلىق-زومبىلىققا التى ادامنىڭ، سونىڭ ىشىندە كامەلەتكە تولماعانداردىڭ دا قاتىسى بار ەكەنىن ايتقان. الايدا سوت الدىندا ونىڭ كامەلەتكە تولعان ءۇش تۋىسى عانا جاۋاپقا تارتىلدى.
سوت شەشىمى
سوت پروسەسى جابىق تۇردە ءوتتى. ەكى ايىپتالۋشى قىلمىستىق كودەكستىڭ 121-بابى 2-بولىگىنىڭ 1 جانە 4-تارماقتارى بويىنشا — ياعني بىرنەشە رەت جاسالعان توپتىق زورلاۋ فاكتىسى ءۇشىن كىنالى دەپ تانىلدى. ءۇشىنشى ايىپتالۋشى وسى باپپەن قاتار ۇرلىق جاساعانى ءۇشىن دە جاۋاپ بەردى (قك 188-بابى).
جابىرلەنۋشىنىڭ ادۆوكاتى گۇلايحان تۇرسىمانوۆانىڭ ايتۋىنشا، سوت ۇشەۋىن دە توعىز جىلعا باس بوستاندىعىنان ايىرۋ تۋرالى ۇكىم شىعارعان.