الماتى قالاسىنىڭ اۋەزوۆ اۋدانى الەۋمەتتىك-ەكونوميكالىق دامۋ كورسەتكىشتەرى بويىنشا تۇراقتى جانە سەنىمدى ءوسىم كورسەتىپ كەلەدى. 2025 جىلدىڭ العاشقى بەس ايىنىڭ قورىتىندىسى بويىنشا نەگىزگى كورسەتكىشتەر بويىنشا وڭ ديناميكا بايقالادى.
ەڭ ماڭىزدى جەتىستىكتەردىڭ ءبىرى — بيۋدجەتكە سالىقتار مەن باسقا دا مىندەتتى تولەمدەردىڭ ءتۇسۋ كولەمىنىڭ ارتۋى: 2024 جىلدىڭ سايكەس كەزەڭىندە 91،5 ملرد تەڭگە بولسا، 2025 جىلى بۇل كورسەتكىش 169 ملرد تەڭگەگە جەتتى. بۇل دەرەكتەر الماتى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا اۋدان اكىمى ابزال ەگەمبەردييەۆتىڭ ايتۋىمەن جاريا ەتىلدى.
«سالىق تۇسىمدەرىنىڭ 84،7%-عا ءوسۋى — اۋدانداعى ىسكەرلىك بەلسەندىلىكتىڭ ارتۋىن، كاسىپكەرلىك سەكتوردىڭ نىعايۋىن جانە كاسىپورىنداردىڭ قارجىلىق تۇراقتىلىعىنىڭ جاقسارعانىن كورسەتەدى»، — دەدى اۋدان اكىمى.
اۋداندا شاعىن جانە ورتا بيزنەستى دامىتۋعا ەرەكشە نازار اۋدارىلۋدا. شوب جۇمىس ىستەيتىن سۋبەكتىلەرىنىڭ سانى 6%-عا ءوسىپ، 68 مىڭنان استى. بۇل — اۋدانداعى قولايلى ىسكەرلىك كليماتتىڭ، جەرگىلىكتى اتقارۋشى بيلىك تاراپىنان بيزنەستى قولداۋدىڭ تيىمدىلىگىنىڭ جانە تۇرعىندار اراسىنداعى كاسىپكەرلىك بەلسەندىلىكتىڭ جوعارى دەڭگەيىنىڭ دالەلى.
وسىلايشا، اۋەزوۆ اۋدانى الماتىداعى ەڭ قارقىندى دامىپ كەلە جاتقان اۋدانداردىڭ ءبىرى رەتىندە ءوز پوزيسياسىن نىعايتىپ، الەۋمەتتىك-ەكونوميكالىق سالادا تۇراقتى ءوسىم مەن سەنىمدى دامۋ كورسەتىپ كەلەدى.