الماتى قالاسىنداعى №79 گيمنازيانىڭ وقۋشىسى دانا قادىربەك جاس ونەرتاپقىش رەتىندە ەرەكشە جوبامەن ەرەكشەلەندى. ول ويلاپ تاپقان قۇرىلعى ەلەكتر جەلىسىنە قوسىلماي-اق جۇمىس ىستەيدى، اۋاداعى ىلعالدى ءتيىمدى ءسىڭىرىپ، ونى كوندەنساسيالاۋ ارقىلى تازا سۋعا اينالدىرادى. وقۋشىنىڭ ونەرتابىسى جايلى Aqshamnews.kz ءتىلشىسى تولىعىراق باياندايدى.
دانانىڭ بۇل يننوۆاسياسى اسىرەسە سۋ تاپشىلىعى بايقالاتىن شالعاي ايماقتار ءۇشىن تاپتىرماس شەشىم بولىپ وتىر.
وقۋشىنىڭ بۇل ونەرتابىسىنا سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆتىڭ ءوزى قىزىعۋشىلىق بىلدىرگەن. ۆەدومستۆو باسشىسىنىڭ الدىندا ول ءوزىنىڭ جوباسىن تانىستىرىپ تا ۇلگەرگەن. كەزدەسۋ قورىتىندىسى بويىنشا مينيسترلىك پەن جاس ونەرتاپقىش جوبانى پيلوتتىق رەجيمدە ىسكە اسىرۋ، قۇرىلعىنى تاجىريبەلىك سىناقتان وتكىزۋ، اقپارات پەن دەرەكتەر الماسۋ باعىتىندا مەموراندۋمعا قول قويدى.
سۋرەت: Gov.kz.
ءمينيستردىڭ ايتۋىنشا، دارىندى جاستاردىڭ سۋ ۇنەمدەۋ ماسەلەلەرىنە بەي-جاي قاراماي، عىلىمي تۇرعىدان تىڭ شەشىمدەر ۇسىنۋى قۋانتادى.
"بۇل جوبانى ءبىز بۇرىننان باقىلاپ كەلەمىز. قۇرىلعىنىڭ ىلعال از جاعدايدا دا اتموسفەرادان سۋ جيناي الۋى ونىڭ پراكتيكالىق ماڭىزىن ارتتىرادى. زاماناۋي نانوماتەريالدار مەن كۇن ەنەرگياسىن قولدانۋ جوبانى ناعىز “جاسىل” يننوۆاسياعا اينالدىرادى"، - دەدى نۇرجان نۇرجىگىتوۆ.
دانا قادىربەكتىڭ جوباسى حالىقارالىق جانە رەسپۋبليكالىق دەڭگەيدەگى بايقاۋلاردا جوعارى باعالاندى. ول وڭتۇستىك كورەيادا وتكەن WICO كورمەسىندە 36 ەلدەن كەلگەن 2000-نان استام قاتىسۋشى اراسىنان ءبىرىنشى ورىندى جەڭىپ الدى. سونداي-اق يندونەزياداعى جاستاردىڭ حالىقارالىق عىلىمي جارمەڭكەسىندە (YISF) 24 ەلدىڭ قاتىسۋشىسى اراسىنان ۇزدىك دەپ تانىلدى. قازۇۋ حالىقارالىق كونفەرەنسياسى مەن Kazakhstan Smart Space عارىشتىق تەحنولوگيالار بايقاۋىندا دا جۇلدەلى ورىنداردان كورىندى.
جوبا بىرىككەن ۇلتتار ۇيىمىنىڭ ونەركاسىپتى دامىتۋ ۇيىمىمەن (UNIDO) بىرلەسىپ جۇزەگە اسىرىلاتىن Global Cleantech Innovation Programme (GCIP) باعدارلاماسىنىڭ ون جارتىلاي ءفيناليسىنىڭ قاتارىنا ەندى. قازاقستان بويىنشا 500-دەن استام ءوتىنىم اراسىنان ىرىكتەلىپ الىنعان بۇل جوبانىڭ حالىقارالىق دەڭگەيدە دە تانىمالدىلىعى ايقىن.
مينيسترمەن وتكەن كەزدەسۋدەن العان اسەرىن دانا قادىربەك بىلاي دەپ ءبولىستى:
"مينيسترلىك تاراپىنان كورسەتىلگەن قولداۋ مەن ءۇشىن ۇلكەن موتيۆاسيا بولدى. ەندى قۇرىلعىنى دالالىق جاعدايدا سىناقتان وتكىزىپ، جوبانى پيلوتتىق رەجيمدە ىسكە اسىرۋ مۇمكىندىگىنە يە بولامىز"، - دەدى جاس ونەرتاپقىش.
بۇل جوبا تەك قازاقستان ءۇشىن عانا ەمەس، الەمدىك دەڭگەيدە دە "جاسىل" تەحنولوگيالاردىڭ دامۋىنا ۇلەس قوساتىن ەرەكشە باستاما بولىپ وتىر.