بريتانيا يمپەرياسى وردەنىنىڭ كاۆالەرى، الەمگە ايگىلى ءبيشى ءارى حورەوگراف اكرام حان اباي اتىنداعى قازاق ۇلتتىق وپەرا جانە بالەت تەاترىنىڭ بالەت ترۋپپاسىنا بىرنەشە كۇن بويى شەبەرلىك ساباقتارىن وتكىزدى، دەپ حابارلايدى aqshamnews.kz
18 جاسىندا ءوزىنىڭ قويىلىمدارىمەن بي الەمىنە جاڭا سەرپىن بەرگەن شەبەر، قارا شاڭىراق ارتىستەرىنىڭ سەزىم ءتىلى – بي ءتىلىن تەرەڭدەتۋگە ىقپال ەتتى.
اباي اتىنداعى تەاتردىڭ بالەت ترۋپپاسى ءۇشىن اكرام حاننىڭ زاماناۋي حورەوگرافيا ستيلىمەن، سەزىمدەر مەن ەموسيالاردى بي ارقىلى جەتكىزۋ ادىستەرىمەن تانىسۋ ماڭىزدى بولدى. ەكى اپتاعا سوزىلعان شەبەرلىك ساباقتار تابىستى ءوتتى. بريتاندىق حورەوگراف اباي تەاترى ارتىستەرىنىڭ بيگە دەگەن كوزقاراسىن، پەداگوگتارىنىڭ اشىقتىعىن ەرەكشە اتاپ ءوتتى.
– ماعان بالەت ترۋپپاسىنىڭ پەداگوگتارى وتە ۇنادى. ولار مەنى جىلى قارسى الىپ، ءتانىم ارقىلى سۇراق قويۋعا مۇمكىندىك بەردى. مەنىڭ ماقساتىم باسقا ەلگە كەلىپ، ءوز ەرەجەمدى ەنگىزۋ ەمەس، سول ەلدىڭ بيشىلەرى ارقىلى ءوزىمدى تانۋ. كلاسسيكالىق بالەت ءارتىسى بولسا دا، ونىڭ دەنەسى مەن قيمىلى ۇلتتىق مادەنيەتتىڭ ەرەكشەلىكتەرىن كورسەتەتىن ءتىرى قازىنا ىسپەتتى. سوندىقتان ماعان ولاردىڭ بيگە دەگەن كوزقاراسى ۇنادى. مەن ءۇشىن ەڭ ماڭىزدىسى – بالەت ترۋپپاسىنىڭ بيىندەگى رۋحتى سەزىنۋ، – دەيدى قويۋشى، ءبيشى ءارى حورەوگراف اكرام حان.
اكرام حان الەمدى كوپ ارالاپ، جۇمىس ىستەگەن ارتىستەردىڭ اراسىنان ءوز كومپانياسىنا شاقىراتىن تالانتتاردى ىرىكتەيدى. ول اباي اتىنداعى وپەرا جانە بالەت تەاترىنىڭ كەيبىر بالەت ارتىستەرىن دە جوعارى باعالاعانىن جاسىرمادى. حورەوگراف قازاقستانعا العاش رەت كەلگەنىن جانە الداعى جوسپارلارى ۋاقىت وتە انىقتالاتىنىن ايتتى.
ءتۇپ تامىرى مۇسىلماننان شىققان ايگىلى ءبيشى ءۇشىن قازاقستاننىڭ قاسيەتتى جەرى – تۇركىستانعا، قوجا احمەت ياسساۋي كەسەنەسىنە بارۋ ماڭىزدى بولدى. وسى ورايدا اباي تەاترىنىڭ باسشىلىعى وعان ارنايى ساپار ۇيىمداستىردى.
– مەن مۇسىلمان وتباسىندا دۇنيەگە كەلگەندىكتەن، قازاقستانمەن ەرەكشە بايلانىس سەزىنەمىن. انام رۋحاني تۇرعىدا تەرەڭ ادام ەدى، سول بايلىقتى مەن قازاقستاننان – مادەنيەتكە دەگەن رۋحاني كوزقاراستان تاپتىم. بيدەگى رۋحانياتتى سوزبەن جەتكىزۋ مۇمكىن ەمەس، ول – بي ەمەس. بي – قوزعالىس قانا، ءبىراق سول قوزعالىسقا دەيىنگى ءسات، سول ءۇزىلىس – سەنىڭ ايتار ءسوزىڭ، ءتىلىڭ. الەمدە ءتىلدىڭ كوپ ءتۇرى بار، ال ءبيدىڭ تىلدەرى ودان دا مول. مەن ءۇشىن ەڭ قىزىقتىسى – دەنە ءتىلىنىڭ ءوزى ەمەس، سول ءتىلدىڭ اراسىنداعى ءۇزىلىس، قوزعالىستار اراسىنداعى تىنىشتىق. سول كەزدە سەن ءوزىڭنىڭ قالاي قيمىلداعانىڭدى سەزىنەسىڭ – رۋحاني قۇندىلىق دەگەنىمىز سول، – دەيدى اكرام حان.
الەمدە تانىمال جانە جوعارى سۇرانىسقا يە، بارلىق ونەر ورداسىمەن جۇمىس ىستەي بەرمەيتىن كرەاتيۆتى حورەوگرافتىڭ «ارىستاندار ۇيىقتاپ جاتقاندا» («Until the Lions»)، «Kaash»، «iTMOi»، «DESH»، «تىكە جول» («Vertical Road»)، «ءبىلىم» («Gnosis») جانە «ءنول بەلگىسى» («Zero Degrees») سياقتى قويىلىمدارى بار. ول انگليانىڭ ۇلتتىق بالەتىمەن، قىتايدىڭ ۇلتتىق بالەتىمەن، اتاقتى بالەرينا سيلۆي گيللەممەن جانە دجۋلەت بينوش، كايلي مينوۋگ سەكىلدى الەمدىك جۇلدىزدارمەن جۇمىس ىستەگەن. اكرام حاننىڭ قورجىنىندا لوۋرەنس وليۆە سىيلىعى، ISPA، فرەد جانە ادەل استەر سياقتى كوپتەگەن ماراپاتتار بار.