الماتىدا «الاتاۋ» ءداستۇرلى ونەر تەاترىندا ەسەنعالي راۋشانوۆتىڭ شىعارماشىلىعىنا ارنالعان «مەنىڭ درامام» اتتى شىعارماشىلىق كەش ءوتتى
زال تولى كورەرمەن جينالدى. مادەنيەت قايراتكەرلەرى مەن شىعارماشىلىق زيالى قاۋىم وكىلدەرىمەن قاتار، الماتىلىقتار، ماڭعىستاۋ، اقتوبە جانە باتىس قازاقستان وبلىستارىنان ارنايى دەلەگاسيالار كەلدى. سونىمەن قاتار، قىرعىزستاننان كەلگەن قۇرمەتتى قوناقتار دا شاراعا قاتىستى.
كەشتىڭ باسىندا اقىننىڭ ولەڭ وقىعان ساتتەرى كورسەتىلگەن دەرەكتى فيلم ۇسىنىلدى. ودان كەيىن ساحنادا ەسەنعالي راۋشانوۆتىڭ ولەڭدەرى وقىلىپ، ونىڭ سوزىنە جازىلعان اندەر ورىندالدى.
– ەسەنعالي راۋشانوۆ قازاقستاننىڭ ۇلكەن پاتريوتى ەدى. ول قازاق پوەزياسى مەن ادەبيەتىنىڭ دامۋىنا زور ۇلەس قوستى. ءومىر بويى ءوزىن ىزدەنىستە بولدى، سول ارقىلى قازاق مادەنيەتىنە وشپەس ءىز قالدىردى. ونىڭ پوەزياسى مەملەكەتتىك ماراپاتتارعا يە بولىپ، ءوزى مەملەكەتتىك سىيلىقتىڭ لاۋرەاتى اتاندى، – دەپ ەسكە الدى كەشتە سويلەگەندەر.
ليتەراتوردىڭ شىعارمالارىندا ادامگەرشىلىك قۇندىلىقتار، وتانعا دەگەن ماحاببات، تۋعان جەرگە جانە تابيعاتقا دەگەن سۇيىسپەنشىلىك نەگىزگى ورىن الادى.
ەسەنعالي ءابدىجاپپار ۇلى شىعارماشىل جاستارعا ءاردايىم قولداۋ كورسەتىپ، ولاردىڭ اياعىنان تۇرۋىنا كومەكتەسكەن. وزبەكستان مەن شىڭجاڭ-ۇيعىر اۆتونوميالىق اۋدانىنان كەلگەن جاس ارىپتەستەرىنە دە ۇلكەن قولعابىس تيگىزگەن. وعان ەلىكتەگەن وتاندىق جانە شەتەلدىك قالامگەرلەر كوپ بولدى.
«جازۋشى» باسپاسىنىڭ جەتەكشىسى قىزمەتىندە جۇرگەندە قازاق تىلىندەگى ادەبيەتتەن بولەك، تاجىكستانعا ارنالعان وقۋ قۇرالدارى مەن قازاقستانداعى وزبەك مەكتەپتەرىنە ارنالعان كىتاپتاردى دا شىعارۋعا ۇلەس قوستى.
ونىڭ ەرەكشە تۋىندىسى «قۇستار – مەنىڭ دوستارىم» اتتى كىتابى كوپتەگەن تىلدەرگە اۋدارىلىپ، كەڭىنەن تارالدى، – دەيدى وتباسى دوسى المات مۇرزين.
ەسەنعالي راۋشانوۆ 1957 جىلى قاراقالپاقستاننىڭ حودجەلى قالاسىندا دۇنيەگە كەلگەن. 1980 جىلى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن سوڭ، سول جىلى العاشقى جىر جيناعى «باستاۋ» جارىق كوردى. ونىڭ شىعارمالارى ورىس، ليتۆا، ۋكراين، بولگار، چەح، وزبەك جانە قىرعىز تىلدەرىنە اۋدارىلعان.
ادەبي الماناح «جالىن» رەداكسياسىندا قىزمەت اتقارىپ، «اراي» جۋرنالىنىڭ باس رەداكتورى بولعان، «جازۋشى» باسپاسىن باسقارعان، سونىمەن قاتار قازاقستان جازۋشىلار وداعى باسقارماسىنىڭ حاتشىسى قىزمەتتەرىن اتقارعان.
«قۇرمەت» جانە «پاراسات» وردەندەرىمەن ماراپاتتالعان.
اقىن 2021 جىلى ومىردەن ءوتتى.
ەسەنعالي راۋشانوۆ
يا حوتەل بى
جيت ي ۋمەرەت ۆ پاريجە،
ەسلي بى نە بىلو تاكوي زەملي –
موسكۆا.
ۆ. ماياكوۆسكيي
كوگىلدىر كەش،
كوك مەشىت،
جورعا بۇلاق،
اسپان دا – ب ا ق،
جەر دە – ب ا ق،
جول داعى – ب ا ق.
مەن تاشكەنتتە ولەر ەم،
الماتىم بار،
قۇشاق اشىپ تۇرعان جوق ول دا ءبىراق.
جان-جاعىمنان قاپ-قارا تاسقىن قاماپ،
جاندارمەن كۇن قاشا الماي باس بۇرمالاپ،
مەن تاشكەنتتە ولەر ەم،
سالاماتحان،
سەنىڭ ءنوپىر شاشىڭنىڭ استىندا قاپ.
"مەن قازاقپىن!
الماتى،
ار ما!" – دەدىم.
جىلىتپادى ول مۇز بولىپ قالعان ءوڭىن.
قاپا شىعار قازاققا… دەدىم ىشتەي
قارىنداسى سەكىلدى حان كەنەنىڭ.
تۇلدانا دا قارايدى، سۇرلانا دا
نوكەرىندەي كوك نايزا شىڭدار انا.
قاتال،
قايسار،
قىزعانشاق،
ءور كوكىرەك،
ءبىر نازىكتىك بار ءبىراق بۇل قالادا.
ءبىر نازىكتىك بار وندا… تىكسىنبەلىك،
قايسار قىزدىڭ جانىن ەل ۇقسىن دەلىك.
سۇلۋ ءجۇزىن جاس جۋىپ كەتەدى ءار كەز،
ءبىراق كىرپىك قاقپايدى ول سۇپ-سۇر بولىپ.
ءمايىن بۇلاق الدىمدا جورعالادى،
…مەشىتتەردى ارالاپ جول بارادى.
مەن تاشكەنتتە ولەر ەم،
الماتى بار،
تەك مەن عانا تۇسىنەم ول قالانى.