ماقسات - ارنايى مىندەتتەردى ورىنداۋعا ۇدايى ازىرلىكتە بولۋ.
اقتاۋدا اسكەري-تەڭىز كۇشتەرىنىڭ جاۋىنگەر جۇزگىشتەرى جەڭىل سۇڭگۋىرلىك دايىندىق بويىنشا جيىنعا قاتىستى، دەپ حابارلايدى Almaty-akshamy.kz.
«ساباق بارىسىندا اسكەري قىزمەتشىلەر سۇڭگۋىرلىك جاراقتىڭ ماتەريالدىق بولىگىن جانە تاكتيكالىق-تەحنيكالىق سيپاتتامالارىن زەردەلەپ، سىناقتار تاپسىردى جانە ارنايى جابدىقتى پايدالانۋعا رۇقسات الدى»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
جەكە قۇرام ءتۇرلى تەرەڭدىككە سۇڭگۋىرلەردى ءتۇسىرۋدى ورىندادى. جارعىش زاتتاردى قويعان جانە زاقىمدانعان جەرلەردى انىقتاۋ ماقساتىندا كەمەلەردىڭ ءتۇبى مەن بۇراندالارىن قاراپ شىقتى. دايىندىقتىڭ بارلىق كەزەڭىندە نۇسقاۋشىلار قاۋىپسىزدىك شارالارىن ساقتاۋعا ەرەكشە نازار اۋداردى.
«جيىننىڭ باستى ماقساتى – اسكەري قىزمەتشىلەردىڭ ءوز بەتىنشە دە، توپ قۇرامىندا دا ارنايى مىندەتتەردى ورىنداۋعا ۇدايى ازىرلىكتە بولۋى. ءاربىر سۇڭگۋىر جاراقتى، جابدىقتى، سۋ استى قۇرالدارىن پايدالانا وتىرىپ، جۇمىستى ورىنداي الۋى ءتيىس»، – دەپ اتاپ ءوتتى اسكەري-تەڭىز بازاسىنىڭ ىزدەستىرۋ-قۇتقارۋ قىزمەتى مەن سۇڭگۋىر جۇمىستارىنىڭ اعا وفيسەرى، مايور نۇرلان وڭالبايەۆ.
قارۋلى كۇشتەردەگى جاۋىنگەرلىك دايارلىق ءىس-شارالارى ەل پرەزيدەنتى قاسىم-جومارت توقايەۆتىڭ قازاقستان ارمياسىنىڭ جاۋىنگەرلىك قابىلەتىن تۇبەگەيلى ارتتىرۋ جونىندەگى تاپسىرماسىن ىسكە اسىرۋ اياسىندا جۇرگىزىلىپ جاتقانىن اتاپ وتكەن ءجون.
