استانانىڭ قىلمىستىق ىستەر جونىندەگى اۋدانارالىق سوتىندا بۇرىنعى مادەنيەت جانە سپورت ءمينيسترى ارىستانبەك مۇحامەديۇلىنا قاتىستى تاعى ءبىر قىلمىستىق ءىس قارالىپ جاتىر.
بۇل جولى ەكس-مينيستر رەيدەرلىك ارەكەت جاسادى دەپ ايىپتالعان. قىلمىستىق ءىس ەلورداداعى «ديپلومات» قوناقۇيىنە قاتىستى قوزعالعان، دەپ حابارلايدى Almaty-akshamy.kz Halyq-uni.kz-كە سىلتەمە جاساپ.
2023 جىلدىڭ 3 قاراشاسىندا وتكەن سوت وتىرىسىندا ارىستانبەك مۇحامەدي ۇلى ءوتىنىشحات جولداپ، ءىس بويىنشا سوتتا كۋالىك ەتكەندەردىڭ ءبىرىن قىلمىستىق جاۋاپكەرشىلىككە تارتۋدى سۇرادى.
«پروسەسس بارىسىندا سوتتى مەنسىنبەيتىندەردىڭ ارەكەتىنە كۋا بولدىق. تەك شىندىقتى ايتامىن دەپ انت بەرگەندەر سوتتا جالعان، شىندىققا سايكەس كەلمەيتىن مالىمدەمەلەر جاسادى. قىلمىستىق ءىستىڭ رەيدەرلىك، لاۋازىمدى وكىلەتىن تەرىس پايدالانۋ بويىنشا قارالىپ جاتقانى حابارلانىپ جاتىر، ال جابىرلەنۋشىلەر مەن كۋاگەرلەر ۇيالماي جالعان سويلەۋمەن بولدى. جەكە باسىم مەن وتباسىمدى قورلايتىن سوزدەر ايتىپ جاتىر. جابەرلەنۋشى ايەلىم ەكەۋمىز تۋرالى «دۆا ساپوگا پارا»، ۇلىمدى «القاش»، ايەلىمنىڭ اناسىن «كارى، ەسى دۇرىس ەمەس» دەپ اتادى. كۋاگەر ز.ك. «ديپلومات» ءقوناقۇيىن سەرىك قارىمساقوۆ باسقارعانىن بىرنەشە رەت ايتتى. سوعان قاراماستان سەرىك قارىمساقوۆتىڭ قوناقۇيگە كىرۋىنە مەنىڭ تىيىم سالعانىمدى ايتادى. الايدا مالىمدەمەسىنە قاتىستى ءبىر دە ءبىر دالەل كەلتىرمەدى.
تاعى ءبىر كۋاگەر د.م. قىزمەتكەرلەردەن وسى جاعداي تۋرالى ەستىگەنىن ايتتى. ول 2020 جىلدىڭ قاراشاسىنان باستاپ BALI spa ورتالىعىن سەرىك قارىمساقوۆتىڭ باسقارعانىن ايتتى. BALI spa-نىڭ «ديپلومات» ءقوناقۇيى قۇرىلىمى ەكەنىن ايتىپ وتىر. لوگيكا قايدا؟ مەنىڭ سەرىك قارىمساقوۆتىڭ كىرۋىنە تىيىم سالعانىمدى ايتادى، ءبىراق ءوزى ۇيىمداستىرۋ-قارجىلىق ماسەلەنىڭ ءبارىن قارىمساقوۆ شەشكەنىن ايتتى. د.م.-دى قىلمىستىق جاۋاپكەرشىلىككە تارتۋدى سۇرايمىن»، - دەدى ارىستانبەك مۇحامەدي ۇلى سوتتا.
سونداي-اق مۇحامەديۇلىن ءوتىنىشحاتتىڭ ەكىنشى بولىگىندە ايىپتاۋ تاراپىنىڭ كۋاگەرلەرىنەن جاۋاپ الۋدى توقتاتىپ، ءىستى ءارى قاراي جالعاستىرۋدى سۇرادى. وزىنەن جاۋاپ الۋعا قارسى ەمەس ەكەنىن ءبىلدىردى.
ءىستى قاراپ جاتقان سۋديا ءابينۇر قارابايەۆ كۋاگەرلەردىڭ جاۋابىنا ۇكىم شىعاراتىن كەزدە كەڭەسۋ بولمەسىندە باعا بەرىلەتىنىن ايتتى.
ەگەر سوت ولاردىڭ جالعان كۋالىك ەتكەن دەپ تانىسا، قوسىمشا قاۋلى شىعارىلىپ، ولاردى جاۋاپكەرشىلىككە تارتۋ تۋرالى شەشىم شىعارادى، - دەدى سۋديا ءابينۇر قارابايەۆ.
ال ءوتىنىشحاتتىڭ ەكىنشى بولىگىنە قاتىستى سۋديا مەملەكەتتىك ايىپتاۋشىعا ءوز تاراپىن دالەلدەۋگە مۇمكىندىك بەرۋ كەرەك ەكەنىن، تاراپتاردىڭ بارىنە قۇلاق اسۋ قاجەت ەكەنىن ايتتى.
پروكۋرور قاي كۋاگەردەن جاۋاپ الۋ-الماۋ تۋرالى شەشىمدى ءوزى قابىلدايدى. ءتىپتى كۋاگەرلەردىڭ ءبىر بولىگىن قىسقارتا الادى. سوندىقتان بارلىق كۋاگەردەن جاۋاپ الامىز. ارىستانبەك مۇحامەدي ۇلى كەز كەلگەن ۋاقىتتا سوتتا جاۋاپ بەرە الادى، - دەدى سۋديا.
ارىستانبەك مۇحامەدي ۇلى كۋاگەرلەردىڭ ناقتى دالەلگە سۇيەنىپ جاۋاپ بەرۋىن سۇرادى.
ايتا كەتەيىك، ارىستانبەك مۇحامەدي ۇلى قىلمىستىق كودەكستىڭ 24-بابى 3-بولىگى – 249-بابى 1-بولىگى (رەيدەرلىك ارەكەتكە وقتالۋ)، 28-بابى 3-بولىگى – 250-بابى 1-بولىگى (وكىلەتىن تەرىس پايدالانۋ ارقىلى قىلمىستىق قۇقىق بۇزۋشىلىقتى ۇيىمداستىرۋ) بويىنشا ايىپتالىپ وتىر.
2023 جىلدىڭ 28 قىركۇيەگىندە پروكۋرور حايرۋللايەۆ ايىپتالۋشىلارعا قاتىستى ايىپتاۋ اكتىسىن وقىدى.
بۇعان دەيىن بۇرىنعى مادەنيەت جانە سپورت ءمينيسترى ارىستانبەك مۇحامەدي ۇلى 8 جىلعا باس بوستاندىعىنان ايىرىلدى. ارىستانبەك مۇحامەدي ۇلى 28-باپتىڭ 3-بولىگى (قىلمىستى ۇيىمداستىرۋ) جانە 189-باپتىڭ 4-بولىگى 2-تارماعىندا (اسا ءىرى مولشەردەگى سەنىپ تاپسىرىلعان بوتەننىڭ مۇلكىن ۇرلاۋ) كوزدەلگەن قۇقىق بۇزۋشىلىقتى جاساعانى ءۇشىن كىنالى دەپ تانىلدى.
سودان كەيىن ەكس-مينيسترگە شىققان ۇكىم اپەللياسيالىق سوت القاسىندا قارالىپ، وزگەرىسسىز قالدى.