ۇلى جەڭىس مەرەكەسى قارساڭىندا «Amanat» پارتياسىنىڭ بوستاندىق اۋداندىق فيليالى مەن الماتى قالالىق ءماسليحاتىنىڭ دەپۋتاتى ەرالى ساۋرانبايەۆ عاسىر جاساعان مايدانگەر، ۇلى وتان سوعىسىنىڭ ارداگەرى الەكساندر جۋراۆليەۆتى ارنايى قۇتتىقتاپ، قۇرمەت كورسەتتى.
سالتاناتتى كەزدەسۋگە قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتتەرى دە قاتىسىپ، ۇرمەلى اسپاپتاردا پاتريوتتىق شىعارمالار ورىنداپ، ارداگەرگە رۋحاني سىي جاسادى.
الەكساندر ستەپانوۆيچ جۋراۆليەۆ 1925 جىلى 30 مامىردا رەسەيدىڭ التاي ولكەسىندە دۇنيەگە كەلگەن. 1943 جىلى اسكەرگە شاقىرىلىپ، كارەل، كەيىن 1ء-شى ۋكراين مايداندارىندا بايلانىسشى جانە بارلاۋشى رەتىندە شايقاستارعا قاتىسقان. ول ەلبا وزەنىنەن ءوتىپ، بەرلين تۇبىندەگى ۇرىستارعا دەيىن جەتكەن. سوعىستان سوڭ بۋداپەشتتە اسكەري قىزمەتىن جالعاستىرىپ، 1950 جىلى بەيبىت ومىرگە ورالعان.
ارداگەردىڭ جاۋىنگەرلىك ەرلىگى مەن بەيبىت ومىردەگى ەڭبەگى جوعارى باعالانىپ، «قۇرمەت» وردەنىمەن جانە «جاۋىنگەرلىك ەرلىگى ءۇشىن»، «بەرليندى العانى ءۇشىن»، «پراگانى العانى ءۇشىن» مەدالدارىمەن ماراپاتتالعان.
ەرلىك پەن ەلدىك ۇلگىسىن كورسەتكەن ارداگەرگە كورسەتىلگەن بۇل قۇرمەت – بۇگىنگى ۇرپاقتىڭ العىسى مەن تاعزىمى. جەڭىستى جاقىنداتقان جاۋىنگەرلەردىڭ ءومىر جولى – ەل جادىندا ماڭگى ساقتالاتىن ۇلى امانات.