الماتىدا ۇلاندىقتار سوعىس جىلعى بالا – تىل ارداگەرى، ۇلتتىق ۇلاننىڭ ارداگەرى، وتستاۆكاداعى مايور عالىمجان باكەشيەۆتىڭ ءۇيىنىڭ اۋلاسىندا سالتاناتتى ءىس-شارا ۇيىمداستىرىپ، ارداگەردى 90 جاسقا تولعان مەرەيتويىمەن جانە ۇلى جەڭىستىڭ 80 جىلدىق مەرەكەسىمەن قۇتتىقتادى.
«وڭتۇستىك» وڭىرلىك قولباسشىلىعى كەڭەس وداعىنىڭ باتىرى گۆارديا پولكوۆنيگى باۋىرجان مومىش ۇلى اتىنداعى 5571 اسكەري ءبولىمى كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پودپولكوۆنيك ۇلىقبەك قارايەۆ ارداگەرگە العىس حات تابىستاپ، قولباسشىلىق اتىنان قۇتتىقتاۋ لەبىزىن ءبىلدىردى، ال وڭىرلىك قولباسشىلىقتىڭ ارداگەرلەر كەڭەسىنىڭ مۇشەلەرى جانە Hexlet ءىت كوللەدجىنىڭ وقىتۋشىلارى مەن ستۋدەنتتەرى تىل ەڭبەككەرىنە ارنايى دايىنداپ كەلگەن سىي-سياپاتتارىن بەردى. وسىدان سوڭ ارداگەر ءۇيىنىڭ اۋلاسىندا ۇلتتىق ۇلاننىڭ 5571 اسكەري ءبولىمىنىڭ وركەسترى سوعىس جىلدارىنداعى اسكەري اندەردى ورىنداسا، ۇلاندىق ساربازدار سالتاناتتى مارشپەن ءجۇرىپ ءوتتى.
– تىل ارداگەرى عالىمجان ءجۇسىپ ۇلى ىشكى اسكەردە ۇزاق جىلدار قىزمەت ەتىپ، زەينەتكە شىققان. ءبىز عالىمجان اتاعا ءجيى كەلىپ، جاعدايىن ءبىلىپ، مەرەكەلەردە قۇتتىقتاپ وتىرامىز. «وڭتۇستىك» وڭىرلىك قولباسشىلىعىندا ءقازىر تەك جالعىز تىل ارداگەرى بار. قازىنالى قاريامىزعا ءارقاشان قۇرمەت كورسەتەمىز، - دەيدى پودپولكوۆنيك ۇلىقبەك قارايەۆ.
سوعىس باستالعاندا عالىمجان اتا نەبارى التى جاستا ەدى. ءوزى سياقتى بۋىنى بەكىپ، بۇعاناسى قاتپاعان بالالاردىڭ ءبارىنىڭ بالالىق شاعىن سوعىس ۇرلاعان بولاتىن. ولار ەڭبەككە ەرتە ارالاسىپ، اۋىلداعى ەر-ازاماتتاردىڭ ورنىن باستى، انالارىمەن بىرگە تىلدا ەڭبەك ەتە ءجۇرىپ، جەڭىس كۇنىنىڭ جاقىنداۋىنا ۇلەس قوستى.
ءقازىر سوعىس جىلعى بالالار تىل ارداگەرلەرىنە تەڭەستىرىلگەن، ويتكەنى ولاردىڭ كوبى كىشكەنتاي جاسىنان باستاپ مايدانعا كەتكەن ەرەسەكتەردىڭ ورنىن باستى: زاۋىتتاردا، كولحوزداردا جۇمىس ىستەدى، ساربازدارعا جىلى كيىم توقىدى. عالىمجان اقساقالعا دا وسى مارتەبە بەرىلگەن. سونىمەن قاتار عالىمجان ءجۇسىپ ۇلى – ۇلتتىق ۇلاننىڭ قارت ارداگەرلەرىنىڭ ءبىرى. ول 1960 جىلدان باستاپ كسرو-نىڭ ىشكى اسكەرىندە ءار ءتۇرلى قىزمەتتەردە بولعان. كسرو ءىىم قازاق ءسسر-ى جانە قىرعىز ءسسر-ى بويىنشا ىشكى اسكەر باسقارماسىندا ساياسات ءبولىمىنىڭ نۇسقاۋشىسى لاۋازىمىندا زەينەتكە شىققان.
عالىمجان اتا مەن جۇبايى قونىسكۇل اپا اسكەري وركەستردىڭ اۋەنىمەن دوڭگەلەنىپ ۆالس بيلەپ، كوڭىلدەرى جادىراپ، جاسارىپ قالعانداي بولدى.