الماتىلىق ساراپشى ناۋرىز مەيرامىن تويلاۋدىڭ جاڭا فورماتى جايىندا
2024 جىلى ەلىمىزدە ناۋرىز مەيرامى جاڭا فورماتتا وتەدى. قازاقستاندىقتار ەندى كوكتەمنىڭ كەلۋىن 10 كۇن – 14-23 ناۋرىز ارالىعىندا تويلايدى. «ناۋرىزنامانىڭ» ونكۇندىگىنىڭ ءار كۇنى قوعامىنىڭ ۇلتتىق بولمىسى مەن الۋان تۇرلىلىگىن كورسەتەتىن بەلگىلى ءبىر تاقىرىپتارعا ارنالادى، دەپ حابارلايدى اlmaty-akshamy.kz.
زيالى قاۋىم وكىلدەرى وزگەرىستەردىڭ قازىرگى قوعامدا ءداستۇرلى مەرەكەنىڭ ساقتالۋىنا جانە دامۋىنا سەپتىگىن تيگىزەتىندىگىن ءبىراۋىزدان اتاپ ءوتتى.
اقىن، اۋدارماشى، جۋرناليست، قازاقستان جازۋشىلار وداعىنىڭ، ۇلتتىق قۇرىلتايدىڭ مۇشەسى ليۋبوۆ شاشكوۆا مەرەكەنىڭ جاڭا فورماتى ناۋرىزدىڭ مادەني اسپەكتىلەرىنە كوبىرەك نازار اۋدارۋعا مۇمكىندىك بەرىپ، مادەني الماسۋ مەن ۇلتتاردىڭ بىرىگۋىنە مۇمكىندىكتەر تۋعىزاتىنىن اتاپ ءوتتى.
«قازىرگى ناۋرىزدى تويلاۋدى اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا باستاپ كەتتىك. سول كەزدە بۇل مەرەكەنىڭ جاڭا فورماتى مەن مازمۇنى ايقىندالدى. 22 ناۋرىزدا كۇن مەن ءتۇننىڭ تەڭەلەتىن كۇنى تويلاناتىن عاسىرلار قويناۋىنداعى مەيرام. ۇزاق قىستان، كوكتەم كەلىپ، اعايىن-تۋىس باس قوسىپ، بىر-بىرىمەن كورىسەدى. بۇل كۇندى قۇتتىقتاۋ جانە العىس ايتۋ كۇنى دەسەكتە بولادى. وسىلايشا ءار كۇن جاڭا ماعىنالارعا تولى بولدى. بيىل الماتىدا مەرەكەنىڭ تويلانۋى ۇنادى. مەرەكەلىك شەرۋدى وتكىزۋ تاماشا يدەيا – كۇيمەلەردىڭ، كيىز ۇيلەردىڭ، تۇيە كەرۋەندەرىنىڭ قوزعالىسى، ياعني مۇنىڭ ءبارى ءبىزدى ۇلتتىق تاريحپەن، اتا-بابالارىمىزبەن، تۇپ-تامىرىمىزبەن بايلانىستىراتىن عاسىرلار بويىنا جالعاساتىن مەرەكەگە شىن مانىندە دەم بەرىپ، سالت-داستۇرلەرىمىز بەن ادەت-عۇرىپتاردى ساقتاۋعا شاقىرادى»، - دەپ ءبولىستى ل.شاشكوۆا.
سونداي-اق ول ناۋرىز مەيرامىنىڭ تابيعاتپەن تىعىز بايلانىستى ەكەنىن، ونىڭ كەلۋى قورشاعان ورتانى ايالاۋ كەرەكتىگىن ەسكە تۇسىرەتىنىن ايتتى. ماسەلەن، ناۋرىز مەيرامىندا قورشاعان ورتانى تازالاۋ، اعاش وتىرعىزۋمەن قاتار، تابيعاتقا، ونىڭ سىي-سىياپاتىنا تاعزىم ەتۋ رەتىندە ەرتەدەن كەلە جاتقان بۇلاقتىڭ كوزىن اشۋ ءراسىمى ورىندالادى.
ەستەرىڭىزگە سالا كەتەيىك، ناۋرىز مەيرامىن تويلاۋ جاڭا تۇجىرىمداما بويىنشا ءوتىپ جاتىر. وعان سايكەس، جىل سايىن ناۋرىزدىڭ 14ء-ى مەن 23ء-ى ارالىعىندا قوعامنىڭ بارلىق سالاسىن قامتۋعا ارنالعان ناۋرىزناما ونكۇندىگى وتەدى.
بۇگىن 22 ناۋرىز - جاڭا جىل. بۇل كۇنى ەلىمىزدىڭ بارلىق ايماقتارىندا ەتنواۋىلدار قۇرىلىپ، ۇلتتىق مادەني-سپورتتىق شارالار، ءتۇرلى جارمەڭكەلەر وتكىزىلۋدە.
23 ناۋرىز – تازارۋ كۇنى. جاڭا جىلدى جاڭا ماقساتپەن، جاڭا ۇمىتپەن قارسى الۋدىڭ سيمۆولى رەتىندە ناۋرىزنامانىڭ سوڭعى كۇنى رەتىندە بەلگىلەنگەن. بۇل كۇنى قازاقستاننىڭ بارلىق ايماقتارىندا جالپىۇلتتىق ەكولوگيالىق اكسيا وتەدى.