ناۋرىز مەيرامى قازاقستاندىقتار ءۇشىن جاڭا جىلدىڭ باستالۋىن بىلدىرەتىن تەرەڭ مادەني جانە تاريحي ماڭىزعا يە. تاريحي تۇرعىدان قاراساق، كوكتەمنىڭ كەلۋىن تويلاۋ 8-9 كۇنگە سوزىلىپ، «ناۋرىزناما» دەپ اتالعان. بيىل قازاقستاندىقتار ناۋرىز مەيرامىن جاڭا تۇجىرىمداما بويىنشا تويلايتىن بولادى.
«پروستور» جۋرنالىنىڭ باس رەداكتورى، قازاقستان جازۋشىلار وداعىنىڭ مۇشەسى فارحات تامەنداروۆ ناۋرىز مەيرامىنىڭ ماڭىزدى بولىگى وتباسىلىق باسقوسۋلار مەن وتباسىلىق ورتاداعى قارىم-قاتىناس ەكەنىن اتاپ ءوتتى. سول سەكىلدى تامەنداروۆتار وتباسىندا دا مەرەكەدە باس قوسىپ، داستارحان جايىپ، ۇلتتىق تاعامدار دايىنداۋ داستۇرگە اينالعان.
جاڭا تۇجىرىمداماعا قاتىستى ساراپشى ناۋرىز مەيرامىن تويلاۋدىڭ جاڭا فورماتى قازاقستاندىق قوعامنىڭ رۋحى مەن ىنتىماعىن نىعايتادى دەپ ەسەپتەيدى. سونداي-اق ول ءداستۇرلى كيىمدى قايتا جاڭعىرتۋدىڭ وڭ ءۇردىسىن دە اتاپ ءوتتى.
«مەملەكەت باسشىسىنىڭ باستاماسىمەن ءۇشىنشى قۇرىلتايدا ايتىلعانداي، ناۋرىزدىڭ 14ء-ى مەن 23ء-ى ارالىعىندا ناۋرىز مەيرامىن تويلايمىز. مەن بۇل يدەيانى تولىعىمەن قولدايمىن، ويتكەنى بىزگە حالىقتى بىرىكتىرەتىن، ونىڭ بىرەگەيلىگىن كورسەتەتىن ۇلتتىق مەرەكە كەرەك. بيىل ۇلتتىق كيىمدەرگە ەرەكشە كوڭىل بولىنگەنى، تەك قازاقتىڭ ۇلتتىق كيىمدەرىن عانا ەمەس، رەسپۋبليكامىزدىڭ بۇكىل كوپ ۇلتتى حالقىنىڭ كيىمدەرىن كورۋ ماعان ەرەكشە ۇنادى جانە وعان ريزا بولدىم. بۇل مەرەكە مەن ءۇشىن تابيعاتتىڭ جاڭارۋىن، شىعىس كۇنتىزبەسى بويىنشا جاڭا جىلدىڭ باستالۋىن بىلدىرەدى. وسى كەزەڭدە ايتىلعان تىلەكتەر اعاشتارداعى گۇلدەردەي بۇرشىك اتىپ، جەمىسىن بەرەتىنى ءسوزسىز»، - دەدى ف.تامەنداروۆ.
2024 جىلى ناۋرىز مەيرامىن تويلاۋدىڭ جاڭا فورماتى ون كۇن – 14-23 ناۋرىز ارالىعىندا وتەتىن بولادى. ناۋرىزنامانىڭ ونكۇندىگى ۇلتتىق كيىمدەردەن باستاپ، قازاق حالقىنىڭ مادەنيەتى مەن ادەت-عۇرپىنا دەيىن قوعامنىڭ بارلىق سالاسىن قامتۋعا ارنالعان.