وتكەن تاۋلىكتە الماتىدا كوروناۆيرۋس ينفەكسياسىن جۇقتىرعان 996 جاعداي تىركەلدى.
قازاقستاندا 12 مەن 18 جاس ارالىعىنداعى بالالاردى Pfizer پرەپاراتىمەن ۆاكسينالاۋ ماسەلەسى قاراستىرىلۋدا. الايدا قازاقستاننىڭ پروفيلاكتيكالىق مەديسينا اكادەمياسىنىڭ پرەزيدەنتى الماز شارماننىڭ ايتۋىنشا، قازىرگى ۋاقىتتا بالالاردى ۆاكسينالاۋ ماسەلەسى ماڭىزدى ەمەس. عالىمنىڭ پىكىرىنشە، الدىمەن ەرەسەك تۇرعىنداردى جاپپاي ۆاكسينالاۋ قاجەت، دەپ حابارلايدى Almaty-akshamy.kz.
«مەنىڭ بىلۋىمشە، ءقازىر سپۋتنيكتى جاساۋشىلار 12 جاستان 16 جاسقا دەيىنگى بالالارعا كلينيكالىق زەرتتەۋلەر جۇرگىزۋدە. Moderna كومپانياسى دا وسىنداي سىناقتار جۇرگىزەدى. حالىقتىڭ جارتىسى ۆاكسينانىڭ ەكى دوزاسىن العان ەلدەر ءۇشىن بۇل ماسەلە وزەكتى بولۋى مۇمكىن. ال قازاقستاندا ەرەسەكتەردىڭ تەك 16%-ى عانا ەكپە الدى. سول ءۇشىن بالالاردى ۆاكسينالاۋ تۋرالى ايتۋعا ءالى ەرتە. ەڭ باستىسى، ەرەسەك تۇرعىنداردى 50%-عا دەيىن ۆاكسينامەن قامتۋدى ارتتىرۋ كەرەك»، - دەدى الماز شارمان وڭىرلىك كوممۋنيكاسيالار قىزمەتىندە وتكەن بريفينگتە.
كوروناۆيرۋسقا قارسى ۆاكسينانىڭ قاجەتتىلىگى تۋرالى ايتا كەلە، عالىم ءبىر جىل بۇرىن بالالاردا «كاۆاساكي» تۇرىندەگى بايقالعان اۋىر جۇيەلىك قابىنۋ سيندرومىنا بارلىعى تاڭ قالعانىن ەسكە سالدى.
«بۇل نيۋ-يوركتە بالالاردا قان تامىرلارىنىڭ وتكىزگىشتىگىنىڭ بۇزىلۋى العاش رەت انىقتالعان كەزدە باستالدى. بۇل «ۋحان» جابايى شتامىنا بايلانىستى بولدى. «كاۆاساكي» سيندرومى قازاقستاندا دا تابىلدى. پەدياتريا ينستيتۋتى 40-قا جۋىق بالانىڭ اۋىرعانى تۋرالى ەسەپ بەردى. بۇل تۇرعىدا «دەلتا» نۇسقاسى «ۋحان» نۇسقاسىنان ايتارلىقتاي ەرەكشەلەنبەيدى. سيرەك جاعدايدا «دەلتا» شتامى بالالاردا وسىنداي ەرەكشە كورىنىستەردى تۋدىرۋى مۇمكىن. جالپى، بالالاردا كوروناۆيرۋس ينفەكسياسى ەرەسەكتەرگە قاراعاندا الدەقايدا وڭاي، ءبىراق بۇل بولاشاقتا بالالار پوپۋلياسياسىن كوبىرەك باعىتتايتىن مۋتانتتار بولمايدى دەگەندى بىلدىرمەيدى»، – دەدى الماز شارمان.
بۇگىندە عالىمنىڭ ايتۋىنشا، ۆيرۋس مۋتاسيانى جالعاستىرۋدا. ەگەر ءبىر جىل بۇرىن كۆي نەگىزىنەن قارتتار مەن ءارتۇرلى سوزىلمالى اۋرۋلارى بار ادامدارعا اسەر ەتسە، ءقازىر كوروناۆيرۋس 30 جاستاعى ادامدارعا اسەر ەتىپ، اۋرۋدى قيىنداتادى.
ايتا كەتسەك، وتكەن تاۋلىكتە الماتىدا كوروناۆيرۋس ينفەكسياسىن جۇقتىرعان 996 جاعداي تىركەلدى. ينفەكسيالىق ستاسيونارلاردا 3 270 ادام جاتىر، ونىڭ ىشىندە 180 بالا بار.