الماتى قالاسىنىڭ تۇركسىب اۋدانىنداعى №20 مەكتەپتە جاڭا وقۋ كورپۋسى سالىنباق.
بۇل جوبا وقۋشىلار سانىنىڭ ارتىپ كەلە جاتقانىن ەسكەرە وتىرىپ، بالالارعا قولايلى ءارى ءقاۋىپسىز ءبىلىم بەرۋ ورتاسىن قالىپتاستىرۋعا جانە اۋداننىڭ ءبىلىم بەرۋ ينفراقۇرىلىمىن دامىتۋعا باعىتتالعان، - دەپ حابارلايدى Aqshamnews.kz.
سوڭعى جىلدارى اتالعان مەكتەپتە وقۋشىلار سانى ەكى ەسە ارتقان. مەكتەپ ديرەكتورى گۇلنارا سارسەنبايەۆانىڭ ايتۋىنشا، سوڭعى بەس جىل ىشىندە وقۋشى سانى 600-دەن 1200-گە دەيىن كوبەيگەن. ال مەكتەپ عيماراتى نەبارى 700 وقۋشىعا عانا ەسەپتەلگەن.
«جىل سايىن وقۋشىلار سانى 30–35% ءوسىپ كەلەدى. ەگەر جاقىن ماڭدا جاڭا ۇيلەر سالىنىپ، قونىستانۋ جالعاساتىن بولسا، بۇل كورسەتكىش ارتا تۇسەدى. عيماراتتاعى ورىن تاپشىلىعىنا بايلانىستى مۇعالىمدەر قوسالقى بولمەلەر مەن گاردەروبتاردى سىنىپ رەتىندە پايدالانۋعا ءماجبۇر. بۇل – ءبىلىم بەرۋ ۇدەرىسىنە مۇلدە سايكەس كەلمەيتىن جاعداي»، — دەدى مەكتەپ ديرەكتورى.
ءۇزىلىس كەزىندە دە قيىندىقتار كوپ. ەكىنشى قاباتتاعى 10 سىنىپتان ءبىر ۋاقىتتا 30–35 وقۋشى شىققاندا، دالىزدەردە ادام سىيماي كەتەدى. مۇعالىمدەر بالالاردىڭ قاۋىپسىزدىگىن قامتاماسىز ەتۋ ءۇشىن ءۇزىلىس ۋاقىتىندا دالىزدە كەزەكشىلىك ەتەدى.
سونداي-اق، مەكتەپتە قازىرگى زامانعا ساي وقۋ قۇرال-جابدىقتارىنىڭ جەتىسپەۋشىلىگى قوسىمشا ءبىلىم بەرۋدى ۇيىمداستىرۋدى قيىنداتىپ وتىر. وقۋشىلار سانى 2021 جىلدان باستاپ كۇرت وسكەن. سول جىلى قايرات ىقشام اۋدانى تۇركسىب اۋدانىنىڭ قۇرامىنا قوسىلعان بولاتىن. سودان بەرى وسى مەكتەپكە بالالارىن بەرگىسى كەلەتىن اتا-انالار سانى ارتقان.
اتا-انالار مەكتەپكە جاڭا كورپۋس سالۋ قاجەتتىگىن قولدايدى. ولاردىڭ ايتۋىنشا، وقۋ جاعدايىنىڭ ءقاۋىپسىز ءارى جايلى بولۋى ءۇشىن كەڭەيتۋ جۇمىستارى اۋاداي قاجەت.
مەكتەپ قامقورشىلىق كەڭەسىنىڭ مۇشەسى ناتاليا پەرەپولكينا (ەكى بالاسى 9 جانە 10-سىنىپتا وقيدى) ءوز پىكىرىن بىلاي ءبىلدىردى:
«ءبىزدىڭ وتباسىمىز بىرنەشە ۇرپاق بويى وسى مەكتەپپەن بايلانىستى. Mۇندا مەنىڭ كۇيەۋىم مەن ەنەم وقىعان. جوندەۋ جۇرگىزىلگەنىمەن، عيمارات ەسكىرگەن جانە قازىرگى وقۋشىلار سانىن كوتەرە المايدى. ءۇزىلىس كەزىندە دالىزدە ادام سىيمايدى، كەيبىر سىنىپتاردا 35 وقۋشىدان وقيدى. جەتكىلىكسىز ورىندارعا بايلانىستى ساباقتار كەيدە اكت زالىندا وتەدى نەمەسە ءبىر كابينەتتە ەكى ءپان قاتار جۇرگىزىلەدى. ول بولمە بار بولعانى 12 ادامعا ارنالعان. سانيتارلىق توراپتار دا جەتىسپەيدى، بالالار ۇزىن-سونار كەزەككە تۇرۋعا ءماجبۇر».
جاڭا كورپۋس سالۋ ءۇشىن 41 جەر تەلىمىن ساتىپ الۋ پروسەدۋراسى باستالدى. بۇل جۇمىستار قازاقستان رەسپۋبليكاسىنىڭ زاڭناماسىنا سايكەس، ازاماتتاردىڭ قۇقىقتارى مەن زاڭدى مۇددەلەرىن ساقتاي وتىرىپ، وتەماقى تولەۋ جانە ءتيىستى حابارلاما بەرۋ ارقىلى جۇرگىزىلەدى.
جەر تەلىمدەرىن مەملەكەت قاجەتىنە ساتىپ الۋ مەرزىمىن ناقتى ايتۋ مۇمكىن ەمەس – ءار جاعداي جەكە قارالادى. بۇل پروسەستىڭ ۇزاقتىعى مەنشىك يەلەرىنىڭ سانىنا، ۇسىنىلعان شارتتارمەن كەلىسۋىنە جانە سوت تالقىلاۋلارىنىڭ بولۋىنا بايلانىستى.
جوبانىڭ باستى ماقساتى - ءوسىپ كەلە جاتقان وقۋشىلار سانى بار اۋداندا ساپالى جانە قولجەتىمدى ءبىلىم بەرۋ جۇيەسىن قامتاماسىز ەتۋ.
اۋدان تۇرعىندارى مەن اتا-انالار جاڭا كورپۋس سالۋدىڭ ماڭىزدىلىعىمەن تولىق كەلىسەدى. سونىمەن بىرگە، ولار بۇل ماسەلەنى شەشۋ بارىسىندا بيلىك، تۇرعىندار جانە قوعام اراسىندا اشىق ديالوگ بولۋى كەرەك ەكەنىن اتاپ وتۋدە. بۇل - بالالار ءۇشىن زاماناۋي ءبىلىم بەرۋ جاعدايلارىن جاساي وتىرىپ، قالىپتاسقان قاۋىمداستىقتارعا زيان كەلتىرمەيتىن وڭتايلى شەشىم تابۋدىڭ كەپىلى.
