الماتى اكىمى دارحان ساتىبالدى «الماتى تازالىق» مەملەكەتتىك كوممۋنالدىق كاسىپورنىنا بارىپ، قىزمەتكەرلەردىڭ ەڭبەك جاعدايىمەن، كوممۋنالدىق تەحنيكا پاركىنىڭ جاڭعىرتىلۋ بارىسىمەن جانە قىسقى ماۋسىم الدىنداعى قالا تازالىعىن قامتاماسىز ەتۋ جۇمىستارىنىڭ ۇيىمداستىرىلۋىمەن تانىستى.
جۇمىس ساپارى بارىسىندا دارحان ساتىبالدى كوممۋنالدىق قىزمەتتەردىڭ ءتيىمدى ءارى ۇزدىكسىز جۇمىسى ەڭ الدىمەن قىزمەتكەرلەرگە جاسالعان جاعدايعا تىكەلەي بايلانىستى ەكەنىن اتاپ ءوتتى. اكىمنىڭ تاپسىرماسىمەن بيىل كاسىپورىننىڭ ەڭبەكاقى قورى ەداۋىر ۇلعايىپ، ناتيجەسىندە جول جۇمىسشىلارىنىڭ، جۇرگىزۋشىلەر مەن مەحانيزاتورلاردىڭ جالاقىسى 30–55%-عا ءوستى.
سونىمەن قاتار، كاسىپورىن قىزمەتكەرلەرىنىڭ جالپى سانى 1560-تان 3169 ادامعا دەيىن ارتتى. ونىڭ ىشىندە 1362 جول جۇمىسشىسى، 136 جۇرگىزۋشى جانە 84 مەحانيزاتور قابىلداندى. وسىلايشا جول جۇمىسشىلارىنىڭ شتاتتىق سانى 638-دەن 2000 ادامعا دەيىن كوبەيىپ، ءۇش اۋىسىمدىق جۇمىس كەستەسىنە كوشۋگە جانە كوشە-جول جەلىسىن تازالاۋ تيىمدىلىگىن ارتتىرۋعا مۇمكىندىك تۋدى.
ەڭبەكاقىنى كوتەرۋمەن قاتار، قىزمەتكەرلەردىڭ تۇرمىس جاعدايىن جاقسارتۋعا باعىتتالعان باعدارلاما ىسكە اسىرىلىپ جاتىر. دەمەۋشىلىك قاراجات ەسەبىنەن ءارقايسىسى 12 ادامعا ارنالعان ەكى مودۋلدىك تۇرعىن بلوك ساتىپ الىندى. جىل سوڭىنا دەيىن سىيىمدىلىعى 60 ورىن بولاتىن تاعى 10 بلوك الۋ جوسپارلانۋدا. سونىمەن بىرگە 28 ورىندىق مودۋلدىك جاتاقحانا ورناتۋ ماسەلەسى قاراستىرىلىپ، لومونوسوۆ كوشەسى، 23 مەكەنجايىندا 100 ورىندىق جاتاقحانانىڭ قۇرىلىسى جۇرگىزىلۋدە.
قىسقى ماۋسىمدا قىزمەتكەرلەردىڭ جايلى تۇرۋىن قامتاماسىز ەتۋ ءۇشىن قالا تۇرعىن ءۇي قورىنان ۋاقىتشا ەكى ءۇي بولىنەدى – ءارقايسىسى 50 ورىننان ناۋرىزباي جانە تۇركسىب اۋداندارىندا. كەلەسى جىلى كوممۋنالدىق كاسىپورىن قىزمەتكەرلەرى ءۇشىن قوسىمشا 272 توسەك-ورىنمەن قامتاماسىز ەتۋ كوزدەلگەن.
«كوممۋنالدىق قىزمەت ماماندارىنىڭ جالاقىسىن ارتتىرۋ مەن ولارعا لايىقتى جاعداي جاساۋ – قالانىڭ تۇراقتى جۇمىس ىستەۋىنىڭ ماڭىزدى بولىگى، اسىرەسە قىسقى كەزەڭدە. تەك ەڭبەكاقىمەن شەكتەلمەي، دەمالىسقا دا تولىق جاعداي جاساۋ قاجەت: دەمالىس بولمەلەرى، اس ءۇي، كىر جۋۋ جانە جۋىنۋ بولمەلەرى بولۋعا ءتيىس. سونىمەن قاتار، كەلەسى جىلى قىزمەتكەرلەرگە ارنالعان جاتاقحانالار سانى 400 ورىنعا دەيىن ۇلعايتىلۋى كەرەك»، – دەدى دارحان ساتىبالدى.