بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا وتكەن باسپا ءسوز كونفەرەنسياسىندا كەڭەس مۇشەلەرى باياندادى.
سپيكەرلەر ءار سالا بويىنشا اتقارىلعان ىستەردى اتاپ، الماتىلىقتاردىڭ ءومىر ساپاسىن ارتتىرۋعا باعىتتالعان باستامالار مەن ۇسىنىستاردى تانىستىردى، دەپ حابارلايدى aqshamnews.kz.
قوعامدىق دامۋ، مادەنيەت، سپورت، ءدىن جانە جاستار ءىسى جونىندەگى كوميسسيانىڭ ءتوراعاسى مارلەن رىسبەكوۆ 2024 جىلى 11 قوعامدىق مونيتورينگ جۇرگىزىلگەنىن حابارلادى.
«ءبىز الماتى زووباعى، مۇراجايلار، تەاترلار، ارحيۆتەر مەن تاريحي عيماراتتاردى ارالاپ، ولاردىڭ جاعدايىنا ساراپتاما جاسادىق. انىقتالعان پروبلەمالاردى مادەنيەت جانە سپورت باسقارماسىمەن بىرگە شەشۋ جولدارىن تالقىلادىق»، — دەدى رىسبەكوۆ.
ونىڭ ايتۋىنشا، كوميسسيا الماتى يپپودرومى، زووباق، س. مۇقانوۆ پەن ع. مۇسىرەپوۆ مۋزەيلەرى سەكىلدى ماڭىزدى نىساندارعا بارىپ، ءۇش كەزەڭنەن تۇراتىن مونيتورينگ جۇرگىزگەن. قىركۇيەك ايىندا مەملەكەتتىك ورگاندار مەن ساراپشىلاردىڭ قاتىسۋىمەن دوڭگەلەك ۇستەل وتكەن.
سپورت جانە جاستار ساياساتى دا نازاردان تىس قالمادى. مەملەكەتتىك باعدارلاما اياسىندا جۇمىس ىستەيتىن سپورت كلۋبتارىنىڭ جۇمىسىنا تالداۋ جاسالىپ، «دامۋ بالا» جوباسىنا تاۋەلسىز ساراپشىلار باعا بەرگەن. جىل سوڭىندا اتا-انالارمەن، كاسىپكەرلەرمەن، دەپۋتاتتارمەن جانە اۋدان اكىمدىكتەرىنىڭ وكىلدەرىمەن كەزدەسۋ ۇيىمداستىرىلعان.
ەكونوميكا، ينۆەستيسيا، كاسىپكەرلىك جانە سيفرلاندىرۋ جونىندەگى №4 كوميسسيانىڭ ءتوراعاسى نۋرجان جاكۋپوۆ بۇل سالاداعى نەگىزگى باعىتتار بويىنشا مونيتورينگ جۇرگىزىلگەنىن مالىمدەدى.
«ءبىز تۋريزمگە ارنالعان اقپاراتتىق پۋنكتتەر، شاعىن جانە ورتا بيزنەس وكىلدەرى، سيفرلىق پلاتفورمالار مەن كۆازيمەملەكەتتىك ۇيىمداردىڭ اشىقتىعى بويىنشا تالداۋ جۇرگىزدىك. ۇسىنىستاردى سوسىن مەملەكەتتىك ورگاندار مەن مينيسترلىكتەرگە جولدادىق»، — دەدى جاكۋپوۆ.
سونىمەن قاتار، كوميسسيا جىلجىمالى ساۋدا نىساندارىن دامىتۋ، الەۋمەتتىك كاسىپكەرلىكتى قولداۋ جانە سينتەتيكالىق ناشاقورلىقپەن كۇرەس تاقىرىبىندا دوڭگەلەك ۇستەلدەر وتكىزگەن.
№5 كوميسسيانىڭ مۇشەسى بوگدان دجەپكا الەۋمەتتىك ساياسات سالاسىنداعى جۇمىستار تۋرالى باياندادى. كوميسسيا جۇمىسپەن قامتۋ تۋرالى زاڭعا ساراپتاما جاساپ، مەكتەپ اسحانالارىنىڭ قىزمەتىنە مونيتورينگ جۇرگىزىپ، ينكليۋزيۆتى ينفراقۇرىلىمدى دامىتۋعا اتسالىسقان.
«ءبىز جۇمىسپەن قامتۋ باسقارماسىمەن بىرلەسىپ، مۇگەدەكتىگى بار بالالارعا ارنالعان ينۆاتاكسي باعدارلاماسىن ىسكە قوستىق. 450 جۇرگىزۋشى ولاردى كولىككە ءوتىرعىزىپ-تۇسىرۋدى ۇيرەندى. ءقازىر شاعىم جاعى ازايعانىمەن، وقىتۋدى جالعاستىرىپ جاتىرمىز»، — دەدى دجەپكا.
سونداي-اق، بالالاردىڭ مۇگەدەكتىگىن ەرتە انىقتاۋ ماسەلەسىنە ەرەكشە كوڭىل بولىنگەن. پەرزەنتحانالار مەن ەمحانالاردا جۇرگىزىلگەن مونيتورينگتىڭ ارقاسىندا ۋاقىتىلى ەمدەۋ جانە وتباسىلىق قولداۋ كورسەتۋ مۇمكىندىگى ارتقان. قوعامدىق كەڭەس قالالىق ينفراقۇرىلىمدى بەيىمدەۋ، قوعامدىق كولىك پەن مەكەمەلەردى قولجەتىمدى ەتۋ ماسەلەسىن تۇراقتى باقىلاۋدا ۇستاپ وتىر.
جيىن سوڭىندا سپيكەرلەر قوعامدىق كەڭەستىڭ الداعى ۋاقىتتا دا قالا تۇرعىندارى مەن مەملەكەتتىك ورگاندار اراسىنداعى ديالوگ الاڭى بولىپ قالا بەرەتىنىن اتاپ ءوتتى. كەڭەس الماتىلىقتاردىڭ وزەكتى ماسەلەلەرىن كوتەرىپ، شەشىمىن تابۋعا ۇلەس قوسۋعا نيەتتى.