الماتىنىڭ مۋلتيمەديالىق ءداستۇرلى مۋزىكا ورتالىعىندا جاستارمەن «زاڭ جانە ءتارتىپ» اتتى كەزدەسۋ ساعاتى ۇيىمداستىرىلدى. ماقسات – قوعامداعى قۇقىقتىق سانانى قالىپتاستىرۋعا ۇلەس قوسۋ، ازاماتتاردىڭ قۇقىعى مەن مىندەتىن جان-جاقتى تۇسىندىرۋگە اتسالىسۋ.
كەزدەسۋگە قالاداعى Prime Legal Partners ادۆوكاتتىق كەڭسەسىنىڭ زاڭگەرلەرى باقتيار جورابايەۆ پەن ءمادي اۋكەنوۆ كەلدى. ولار قازاق اۆتوموبيل-جول كوللەدجىنىڭ ستۋدەنتتەرىنە مەملەكەت باسشىسى ۇسىنعان «زاڭ جانە ءتارتىپ» قاعيداتىن جان-جاقتى ءتۇسىندىردى. ەل پرەزيدەنتى بۋرابايدا وتكەن IV ۇلتتىق قۇرىلتايدا ادىلەتتى قازاقستان قۇرۋ جولىندا زاڭ مەن ءتارتىپ باستى قۇندىلىق ەكەنىن دە اتاپ كورسەتكەن بولاتىن.
زاڭگەرلەر بۇگىنگى اقپاراتتىق تەحنولوگيالار قارقىندى دامىعان زاماندا الەۋمەتتىك جەلىلەردەگى قۇقىقتىق مادەنيەتتى ساقتاۋ، زاڭ نورمالارىنا ساي ىس-ارەكەتتەر جاساۋ، قوعامدىق ورىندارداعى ادامنىڭ ىس-ارەكەتتەرى، الەۋمەتتىك پلاتفورمالاردا بوي كورسەتەتىن الاياقتاردىڭ ارباۋىنا ءتۇسىپ قالماۋ تۋرالى اڭگىمەلەدى.
سپيكەرلەر جاستار اراسىندا ءجيى كەزدەسەتىن قۇقىقتىق قاتەلىكتەر، زاڭسىز ىس-ارەكەتتەر ورىن السا جاۋاپكەرشىلىكتەن بوساتىلمايتىنى تۋرالى دا ايتىلدى.
"كەزدەسۋدە بۇگىنگى كۇنى جاستار جەڭىل جولمەن اقشا تابۋ ءۇشىن ەسىرتكى تاسىمالداۋ جولىنا ءتۇسىپ جاتاتىنى تۋرالى ناقتى دەرەكتەر ايتىلدى. ستاتيستيكاعا سۇيەنسەك، 14 مىڭعا تاياۋ 12-14 جاس، 16-18 جاس ارالىعىنداعى ءجاسوسپىرىم جەتى جىلدان جوعارى جازا ارقالاپ، كولونيالارعا جىبەرىلگەن ەكەن. زاڭگەرلەردىڭ ايتۋىنشا، كوبى جانىنداعى دوستارىنىڭ ىقپالىمەن، سونداي-اق ءوزى دە زاڭدى بىلمەگەندىكتەن وسىنداي كەلەڭسىز جاعدايلارعا ۇرىنىپ قالىپ جاتادى. زاڭ وكىلدەرى قوعامدا ورىن الىپ وتىرعان جاسوسپىرىمدەر اراسىنداعى دروپينگ، ستالكينگ، كيبەربۋللينگ ماسەلەلەرىن دە قوزعادى. مۇنداي جاعداياتتار اۋلادا، مەكتەپتە، وقۋ ورىندارىندا، ءتىپتى جۇمىستا دا كەزدەسىپ جاتاتىن كورىنەدى. الايدا، زاڭ بۇزۋشىلىق فاكتورلار بولعان جاعدايدا كەز-كەلگەن ادامنىڭ «مەن زاڭدى بىلمەدىم» دەۋى ونى قۇقىقتىق جاۋاپكەرشىلىكتەن بوساتپايتىنىن بىلگەنى ءجون. زاڭگەرلەر جاستارعا وسى ماسەلەلەردى، تارتىپكە باعىنعاننىڭ ەشتەڭەدەن ۇتىلمايتىنىن ءتۇسىندىردى"، – دەيدى مۋلتيمەديالىق ءداستۇرلى مۋزىكا ورتالىعىنىڭ جەتەكشىسى رۋزا ءجۇنىس قىزى.