قازاق جاستارى بۇگىندە الەمنىڭ تۇكپىر-تۇكپىرىندە جۇرسە دە، ءوز ەلىنىڭ اتىن تانىتىپ، تەحنولوگيا سالاسىندا ەرەكشە تابىستارعا قول جەتكىزىپ ءجۇر. سونىڭ ايقىن مىسالى - اقش-تا جاساندى ينتەللەكتكە نەگىزدەلگەن Call2action.ai ستارتاپىن دامىتىپ جۇرگەن جاس قازاقستاندىق كاسىپكەر ەرسۇلتان ءجۇنىساقىنوۆ.
ول بيىل قاراشادا مەملەكەت باسشىسى قاسىم-جومارت توقايەۆتىڭ اقش-قا جاساعان ساپارى كەزىندە پرەزيدەنتتىڭ الدىندا ءوز ستارتابىن تانىستىرعان جاس وتانداستاردىڭ ءبىرى بولدى. ونىڭ جوباسى پرەزيدەنتتىڭ ەرەكشە قىزىعۋشىلىعىن تۋدىرىپ، قولداۋ تاپقان. Aqshamnews.kz ءتىلشىسى ەرسۇلتانمەن تىلدەسىپ، ونىڭ ستارتاپى، كومانداسى، ماقساتتارى مەن قازاقستاننىڭ تەحنولوگيالىق بولاشاعى تۋرالى جان-جاقتى اڭگىمە ءوربىتتى.
Call2action.ai - اقش نارىعىنا باعىتتالعان بىرەگەي جوبا
Call2action.aiم - Astana Hub تەحنوپاركىنىڭ رەزيدەنتى جانە الەمدە جاساندى ينتەللەكت نەگىزىندە رەكرۋتينگتى اۆتوماتتاندىرۋعا ارنالعان العاشقى پلاتفورما رەتىندە تانىلىپ وتىر. كەيىپكەرىمىز ەرسۇلتان ءجۇنىساقىنوۆ - Call2action.ai كومپانياسىنىڭ نەگىزىن قالاۋشىسى جانە باس ديرەكتورى (Founder & CEO).
"ءدال وسى Astana Hub باعدارلامالارىنىڭ ارقاسىندا ءبىز 2024 جىلى كرەمنيي القابىنداعى بەدەلدى Alchemist Accelerator اكسەلەراتورىنان وتتىك. بۇل ءبىزدىڭ Call2action.ai جوباسىن دامىتىپ، اقش نارىعىنا شىعۋىمىزعا ۇلكەن مۇمكىندىك بەردى"، - دەيدى ول.
بۇل جوبا جۇرگىزۋشىلەردى، مەحانيكتەردى، لوگيستيكا جانە كولىك سالاسىنىڭ قىزمەتكەرلەرىن جالداۋدى تولىق اۆتوماتتاندىرۋعا باعىتتالعان. الەمدە ازىرگە ءدال وسى سالادا بالاماسى جوق بۇل جوباسىن ەرسۇلتان پرەزيدەنتكە بيىل وسىمەن ەكىنشى رەت تانىستىرعان.
بۇگىندە اقش-تاعى 40-تان استام تراكينگ كومپانياسى بۇل ونىمگە قىزىعۋشىلىق بىلدىرگەن. قازىرگى تاڭدا ەكى تولىققاندى كوممەرسيالىق كليەنت، ءۇش پيلوتتىق باعدارلاما جۇزەگە اسىرىلىپ جاتىر.
سۋرەت: كەيىپكەردىڭ الەۋمەتتىك جەلىدەگى پاراقشاسىنان
تەحنولوگيانىڭ ەرەكشەلىگى نەدە؟
ەرسۇلتاننىڭ ايتۋىنشا، ولاردىڭ AI-ينتەرۆيۋەرى:
- كانديداتپەن "ءتىرى ادام" سياقتى سويلەسەدى،
- سۇراق قويىپ، ناقتىلاپ، اڭگىمەلەسەدى،
- كانديداتتىڭ داعدىسىن 0-10 بالدىق شكالادا باعالايدى،
- رەكرۋتينگتىڭ نەگىزگى كەزەڭدەرىن اۆتوماتتاندىرادى.
اقش تراكينگ نارىعىندا مۇنداي كەشەندى شەشىم ءالى جوق. بۇل ستارتاپتىڭ باستى ارتىقشىلىعى دا - وسى.
اقش-تا دامۋ: ينۆەستيسيالار، كليەنتتەر جانە ماسشتابتاۋ
جوبا ءوزىنىڭ ومىرشەڭدىگىن دالەلدەگەننەن كەيىن، كوماندا ينۆەستيسيالىق راۋند اشىپ، $500 000 كولەمىندەگى pre-seed ينۆەستيسياسىن تارتقان. كومپانيا باعالاۋى - 6 ملن اقش دوللارى.
ينۆەستورلار قاتارىندا:
- امەريكالىق ۆەنچۋرلىك قورلار،
- حالىقارالىق بيزنەس-انگەلدەر،
- MIT PhD،
- YC تۇلەگى،
- Rippling جانە Workday كومپانيالارىنىڭ كەڭەسشىلەرى بار.
Call2action.ai بۇگىندە اقش-تا تولىققاندى ىسكە قوسىلعان. ماشتابتاۋ جۇمىستارى، پيلوتتىق جوبالار، كەلىسىمشارتتار جانە جاڭا كليەنتتەرمەن جۇمىس بەلسەندى تۇردە ءجۇرىپ جاتىر.
حالىقارالىق دەڭگەيدەگى جوبانىڭ نەگىزىن قالاعان - قازاق جاستارى
جوبانىڭ بارلىق ينجەنەرلەرى مەن ازىرلەۋشىلەرى - قازاقستاننان شىققان جاس ماماندار. كوماندادا 6 ادام بار، ءبىراق ولاردىڭ تاجىريبەسى حالىقارالىق دەڭگەيدە اۋىز تولتىرىپ ايتۋعا تۇرارلىق.
"ەڭبەكقورلىق، تەحنيكالىق جانە تەز ۇيرەنۋ قابىلەتى - قازاق جاستارىنىڭ باستى ارتىقشىلىقتارى"، - دەيدى ەرسۇلتان.
سۋرەت كەيىپكەردىڭ الەۋمەتتىك جەلىدەگى پاراقشاسىنان
ەرسۇلتاننىڭ جەكە جولى: الماتىدان كرەمنيي القابىنا دەيىن
ەرسۇلتان الماتى قالاسىنىڭ تۋماسى. تەحنولوگياعا قىزىعۋشىلىعى بالا كەزدەن باستالعان. 15 جاسىنان سايتتاردى كاسىبي باعدارلامالاۋدى بىلگەن. IT جانە e-commerce باعىتىندا بىرنەشە جوبا جاساپ كورگەن. ال جوعارى ءبىلىمدى الماتىداعى ەنەرگەتيكا جانە بايلانىس ۋنيۆەرسيتەتىندە العان.
ستارتاپتارعا قىزىعۋشىلىعى ناقتى ماسەلەلەردى تەحنولوگيامەن شەشۋگە بولاتىنىن تۇسىنگەننەن كەيىن كۇشەيگەن. ەرسۇلتاننىڭ سوزىنشە، وسىنداي جەتىستىككە جەتۋىنە اتا-اناسىنىڭ قولداۋى دەمەۋ بولعان. سەبەبى، ولار ونىڭ تاڭداعان جولىنا سەنىم ارتقان.
اناسى ۋنيۆەرسيتەتتە اعىلشىن ءتىلى ءپانىنىڭ وقىتۋشىسى، ال اكەسى ءقازىر ەرسۇلتاننىڭ العاشقى كومپانياسىندا جۇمىس ىستەيدى ەكەن.
"ولار ماعان ەڭبەكقور بولۋدى، ادالدىقتى جانە قيىندىققا قاراماي العا ءجۇرۋدى ۇيرەتتى"، - دەيدى ول.
جاھاندىق نارىقتاعى قازاقتار: كىمدەر نە ىستەپ ءجۇر؟
ەرسۇلتاننىڭ ايتۋىنشا، بۇگىندە اقش-تا AI، فينتەح، لوگيستيكا، HR-tech باعىتىندا ستارتاپ قۇرعان قازاقتار كوپ. Google، Apple، Meta، Tesla، Amazon سياقتى الىپ كومپانيالاردا جۇمىس ىستەيتىن قازاقستاندىقتار دا بارشىلىق.
"مەنىڭ ءبىر قازاق دوسىم Tesla كومپانياسىندا باس تەحنيكالىق ينجەنەر قىزمەتىن اتقارعان. مۇنداي دەڭگەيدەگى ينجەنەرلەر بۇكىل الەمدە بار بولعانى 15-20 ادام، جانە سول توپتا قازاق مامانىنىڭ بولۋى - ءبىزدىڭ جاستاردىڭ الەمدىك دەڭگەيدە باسەكەگە تولىق قابىلەتتى ەكەنىن دالەلدەيدى"، - دەيدى ەرسۇلتان ءجۇنىساقىنوۆ.
بۇل - قازاق جاستارىنىڭ الەمدىك دەڭگەيدە باسەكەگە قابىلەتتى ەكەنىنىڭ انىق دالەلى.
قازاقستاندا قانداي سالالارعا AI ەنگىزۋگە بولادى؟
Call2action.ai الدىمەن رەكرۋتينگتى اۆتوماتتاندىرسا، كەيىن ءۇش ءىرى سالاعا كەڭەيتۋ جوسپارلانىپ وتىر:
1. HoReCa
- داياشىلار،
- اسپازدار،
- بارمەندەر،
- ءقوناقۇي قىزمەتكەرلەرى.
بۇل سالادا كادر تۇراقسىزدىعى جوعارى.
2. ريتەيل
- كاسسيرلەر،
- ساتۋشىلار،
- قويما قىزمەتكەرلەرى.
ماۋسىمدىق وزگەرىستەرگە بايلانىستى مامانداردى جىلدام اۋىستىرۋ كەرەك بولۋى ابدەن مۇمكىن.
3. قويما لوگيستيكاسى
- جۇك تاسۋشىلار،
- وپەراتورلار،
- سكانەرلەۋشىلەر.
كوپ كومپانيالار ءبىر ۋاقىتتا جۇزدەگەن قىزمەتكەر ىزدەيدى.
"بۇل سالالاردا AI ناقتى تيىمدىلىك بەرە الادى، - دەيدى ەرسۇلتان.
قازاقستاندا ستارتاپ جۇيەسىن قالاي جاقسارتۋعا بولادى؟
ەرسۇلتاننىڭ پىكىرىنشە، ول ءۇشىن ءۇش باستى باعىت ماڭىزدى:
- 1.كوبىرەك ۆەنچۋرلىك قورلار قۇرۋ
ستارتاپتار قارجىعا قاتتى مۇقتاج. - 2.الەمدىك دەڭگەيدەگى اكسەلەراتورلاردى دامىتۋ
Alchemist، YC، Techstars - قازاقستاندا وسى دەڭگەيدەگى باعدارلامالار كەرەك. - 3. ينجەنەرلىك ۋنيۆەرسيتەتتەردى كۇشەيتۋ
MIT ۇلگىسىندەگى زەرتتەۋ ورتالىقتارى قاجەت. - 4. مەكتەپتەن باستاپ پروگراممالاۋ مەن AI وقىتۋ
"بالالاردى ەرتە جاستان كود جازۋعا، الگوريتمدىك ويلاۋعا جانە جاساندى ينتەللەكت نەگىزدەرىنە ۇيرەتۋ - بولاشاق ينجەنەرلەر مەن فاۋندەرلەر سانىن ايتارلىقتاي ارتتىرادى. ەگەر وسى تەتىكتەر جۇزەگە اسسا، قازاقستان ناعىز الەمدىك دەڭگەيدەگى تەحنولوگيالىق ورتالىققا اينالا الادى"، - دەپ بولجايدى ستارتاپەر.
بولاشاق جوسپار: اقش-تا ميللياردىق كومپانيا قۇرىپ، قازاقستاندا 1000 جۇمىس ورنىن اشۋ
ەرسۇلتاننىڭ وسى كۇنى ماقساتى ايقىن. ول كەلەشەكتە اقش-تا unicorn دەڭگەيىندەگى كومپانيا قۇرعىسى كەلەدى. وسىنداي دەڭگەيگە جەتكەن كەزدە قازاقستاندا 1000-نان استام جاڭا جۇمىس ورنىن اشۋ ويى دا بار ەكەن. وسى ارقىلى ەلدىڭ تەحنولوگيالىق سالاسىنا ۇلەس قوسۋعا نيەتتى.
ستارتاپەردىڭ بۇل ويى جۇزەگە اسسا، بولاشاقتا وسىنداي جۇمىس ورىندارىندا:
- ينجەنەرلەر،
- باعدارلاماشىلار،
- AI/ML ماماندارى،
- data analyst جانە data engineer سياقتى جوعارى جالاقىسى بار ماماندىقتار بولماق.
ەرسۇلتان ءجۇنىساقىنوۆتىڭ جولى كوپ قازاق جاستارىنا ۇلگى بولارلىق.
الماتىدان باستالعان قاراپايىم ارمان، ەڭبەكقورلىق پەن تاباندىلىقتىڭ ارقاسىندا بۇگىندە قازاق ستارتاپشىسى اقش نارىعىندا باسەكەگە ءتۇسىپ، الەمدىك دەڭگەيدەگى ءونىم جاساپ وتىر.
ءوزىنىڭ ايتۋىنشا:
"بالكىم، بىرەۋگە قيىن شىعار. ءبىراق ءبارى مۇمكىن. ستارتاپ قۇرۋ دا، اقش نارىعىنا شىعۋ دا، ۇلكەن كومپانيالارمەن جۇمىس ىستەۋ دە - ارمان ەمەس، ناقتى ماقسات"
قازاقستاننان الەمدىك دەڭگەيگە شىعاتىن تالانتتار كوپ. ال ەرسۇلتاننىڭ تابىسى - سول ۇلكەن جولدىڭ جارقىن مىسالى.