الماتىنىڭ بوستاندىق اۋدانىندا 2000-عا جۋىق سىرتقى جارىقتاندىرۋ شامدارى اۋىستىرىلدى
الماتى اكىمى ەربولات دوسايەۆ تۇرعىندارمەن كەزدەسۋ بارىسىندا بوستاندىق اۋدانىن تۇراقتى ەلەكترمەن جابدىقتاۋ بويىنشا اتقارىلىپ جاتقان جۇمىستار تۋرالى باياندادى، دەپ حابارلايدى aqshamnews.kz
«اجك» اق وسى كۇزدە مىڭبايەۆ، جاروكوۆ، كەكىلباي ۇلى كوشەلەرى مەن گاگارين داڭعىلى بويىنداعى 26 كم ەلەكتر جەلىسىن جاڭعىرتۋدى اياقتاۋدى جوسپارلاپ وتىر. بۇل اپاتتىق وشۋلەردىڭ سانىن ەداۋىر ازايتادى.
ساپالى سىرتقى جارىقتاندىرۋدى قامتاماسىز ەتۋ ماقساتىندا جىل باسىنان بەرى 1 846 شام اۋىستىرىلدى. كۇزدە تاعى 267 تىرەك پەن شامدار ورناتىلادى. سونداي-اق، 2024 جىلدىڭ سوڭىنا دەيىن 9 ەسكەرتكىشكە تۇنگى جارىقتاندىرۋ ورناتۋ جوسپارلانعان.
جالپى، قالا بويىنشا سىرتقى جارىقتاندىرۋ جەلىلەرىنىڭ ۇزىندىعى 4،8 مىڭ كم. 2024 جىلى اۋداندىق اكىمدىكتەرگە تۇراقتى جارىقتاندىرۋدى قامتاماسىز ەتۋ ءۇشىن 9،9 ملرد تەڭگە ءبولىندى. قابىلدانعان شارالاردىڭ ارقاسىندا مەگاپوليستە سىرتقى جارىقتاندىرۋ دەڭگەيى 2024 جىلى 85%-عا، ال 2025 جىلى 100%-عا جەتكىزىلەدى.