بوستاندىق اۋدانىنىڭ تۇرعىندارىمەن كەزدەسۋدە الماتى اكىمى ەربولات دوسايەۆ قولجەتىمدى جانە ساپالى مەديسينالىق قىزمەتتەرمەن قامتاماسىز ەتۋ جۇمىستارى تۋرالى ايتتى، دەپ حابارلايدى aqshamnews.kz
وسى جىلدىڭ ماۋسىم ايىندا بوستاندىق اۋدانىنداعى ماناس كوشەسىندە تاۋلىگىنە 500 پاسيەنتكە ارنالعان بالالارعا شۇعىل مەديسينالىق كومەك كورسەتۋ ورتالىعىنىڭ جاڭا عيماراتى اشىلدى.
مەكەمەدە 26 رەانيماسيا جانە قارقىندى تەراپيا توسەگى، 4 وپەراسيالىق بلوك، سونداي-اق دياگنوستيكالىق بولىمشە بار. عيمارات حالىقارالىق ستاندارتتارعا سايكەس سالىنعان.
بۇل بالالار ستاسيونارى 1965 جىلى سالىنعان جانە س. د. اسفەندياروۆ اتىنداعى قازۇمۋ پەدياتريا كافەدراسىنىڭ كلينيكالىق بازاسى بولىپ تابىلادى. مۇندا الماتىدان عانا ەمەس، قازاقستاننىڭ بارلىق وڭىرلەرىنەن كەلگەن بالالار ەم الادى. مەكەمە وڭەش اترەزياسى، ديافراگماتيكالىق گرىجا، راحيشيزيس، گاستروشيزيس جانە ت.ب. سياقتى تۋا بىتكەن اۋرۋلاردى حيرۋرگيالىق ەمدەۋدىڭ جالعىز ورتالىعى بولىپ تابىلادى.
سوڭعى ءۇش جىلدا ورتالىقتىڭ قابىلداۋ بولىمىنە تۇسكەن وتىنىشتەر سانى 30% - عا ارتتى.
قازىرگى ۋاقىتتا كلينيكانى قايتا قۇرۋ جوسپارى ازىرلەنۋدە. اتاپ ايتقاندا، بارلىق ەسكى عيماراتتار كۇردەلى جوندەۋدەن ءوتىپ، وڭالتۋ، وتولارينگولوگيا، وفتالمولوگيا، جاق باس سۇيەك حيرۋرگياسى بولىمشەلەرى اشىلادى. ناتيجەسىندە اۋرۋحاناداعى توسەك سانى 350-دەن 470-كە دەيىن ارتادى. جاڭعىرتۋ مەديسينالىق قىزمەتتەر سپەكترىن كەڭەيتۋگە جانە حالىقارالىق ستاندارتتار دەڭگەيىندە ساپانى قامتاماسىز ەتۋگە مۇمكىندىك بەرەدى.
سونداي-اق، قالا باسشىسى بوستاندىق اۋدانىنىڭ ءۇش دەنساۋلىق ساقتاۋ نىسانىن كۇردەلى جوندەۋ بارىسى تۋرالى حابارلادى. وسى جىلدىڭ جەلتوقسان ايىندا № 4 جانە №12 ەكى ەمحانانى جوندەۋدى اياقتاۋ جوسپارلانۋدا. 2025 جىلدىڭ اقپان ايىندا پەريناتولوگيا جانە بالالار كارديوحيرۋرگياسى ورتالىعى جوندەلەدى.
