الماتىنىڭ بوستاندىق اۋدانىندا تۇرعىنداردىڭ وتىنىشىمەن رەتتەلمەيتىن جول قيىلىستارىنا 8 باعدارشام ورناتىلدى
بوستاندىق اۋدانىنىڭ تۇرعىندارىمەن كەزدەسۋ بارىسىندا الماتى اكىمى ەربولات دوسايەۆ اۋداننىڭ جول ينفراقۇرىلىمىن جاڭعىرتۋ جانە جولاۋشىلار تاسىمالى ساپاسىن ارتتىرۋ جۇمىستارى تۋرالى باياندادى، دەپ حابارلايدى aqshamnews.kz
قالا باسشىسى جىل باسىنان بەرى 14 كوشەدە 12،5 كم جولدىڭ ورتاشا جوندەۋدەن وتكەنىن، قازان ايىنىڭ سوڭىنا دەيىن تاعى 19 كوشەدە 17،5 كم جولدىڭ جوندەۋدەن وتەتىنىن حابارلادى. اعىمداعى جوندەۋ اياسىندا 69 كوشەدە 22 مىڭ شارشى مەتر جول جوندەلدى، قاراشا ايىنىڭ سوڭىنا دەيىن تاعى 8 مىڭ شارشى مەتر جول جوندەلەدى دەپ جوسپارلانعان.
«4 كوشەدە 1،7 كم تروتۋارلار سالۋ جۇمىستارى جۇرگىزىلدى، الداعى ايلاردا تاعى 6 ماگيسترالدىق كوشەدە 1،8 كم تروتۋار سالۋ جوسپارلانىپ وتىر. اۋدان تۇرعىندارىنىڭ وتىنىشىمەن رەتتەلمەگەن جول قيىلىستارىنا 8 باعدارشام ورناتىلدى»، – دەدى ەربولات دوسايەۆ.
قوعامدىق كولىك قىزمەتىنىڭ ساپاسىن ارتتىرۋ تۋرالى ايتا كەلە، الماتى اكىمى بيىل 10 باعىت بويىنشا اۆتوبۋستار جاڭارتىلىپ، كولىك سانى 157-دەن 180 اۆتوبۋسقا دەيىن ارتقانىن حابارلادى.
سونداي-اق، بوستاندىق اۋدانىنداعى 7 مەكتەپتىڭ 760 وقۋشىسى «مەكتەپ اۆتوبۋسى» جوباسىمەن قامتىلعان، ال جاڭا وقۋ جىلىنىڭ باسىنان بەرى مەكتەپ اۆتوبۋستارىنىڭ سانى 17-گە دەيىن ارتتى.
ايتا كەتۋ كەرەك، جالپى الماتىدا بيىلعى جىلى 250 كم بولاتىن 274 كوشە ورتاشا جوندەۋدەن وتەدى. وسىلايشا، جاقسى جانە قاناعاتتانارلىق جاعدايدا تۇرعان جولداردىڭ ۇلەسىن 92%-عا جەتكىزۋ جوسپارلانىپ وتىر. سونىمەن قاتار، جەرگىلىكتى بيۋدجەت ەسەبىنەن گازبەن جۇرەتىن 600اۆتوبۋس، 100 ەلەكتروبۋس جانە 112 تروللەيبۋس ساتىپ الىنادى.