الماتى سيركىنىڭ ارتىستەرى گيننەستىڭ رەكوردتار كىتابىنا ەندى
وتاندىق سيرك ونەرى ءۇشىن ناعىز جەڭىس. الماتى سيركىنىڭ ارتىستەرى، ايگىلى «سەربات» اكروباتيكالىق توبىنىڭ مۇشەلەرى – باتىر جانۇزاق پەن مارلەن ماراتوۆ ميلانداعى بەدەلدى «Lo Show Dei Record» حالىقارالىق شوۋىندا بىرەگەي رەكورد ورناتىپ، گيننەستىڭ رەكوردتار كىتابىنا ەندى. بۇل تۋرالى الماتى قالاسىنىڭ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا رەكوردسمەندەردىڭ وزدەرى حابارلادى.
يتاليادا ولار باسپالداقتان توڭكەرىلىپ تۇسكەن اداممەن بىرگە ەڭ قيىن تريۋكتى 36،66 سەكۋندتا ورىنداعان. بۇل جەتىستىك كورەرمەندەردى عانا ەمەس، حالىقارالىق قازىلار القاسىن دا تاڭعالدىردى. ول الماتىلىق اكروباتتاردىڭ ەرەكشە دايارلىعىنىڭ، ەپتىلىگى مەن شەبەرلىگىنىڭ سيمۆولىنا اينالدى.
«بۇل كەرەمەت ءسات بولدى. ءبىز بۇل رەكوردقا ۇزاق جانە تاباندىلىقپەن دايىندالدىق. بۇكىل زالدىڭ قول شاپالاقتاعانىن كورۋ – ۇمىتىلمايتىن ەرەكشە ءسات بولدى!»، — دەدى، رەكوردسمەن، اتاقتى «سەربات» اكروباتيكالىق توبىنىڭ مۇشەسى باتىر جانۇزاق.
«ءبىز ءۇشىن بۇل جاي عانا رەكورد ەمەس، بۇل بۇكىل كوماندامىزدىڭ ەڭبەگىنە، سيرك ونەرىنە دەگەن ماحابباتىنا بەرىلگەن باعا. بىزگە سەنگەن بارلىق جانكۇيەرلەرگە العىسىمىز شەكسىز!»، — دەپ تولىقتىردى الماتى سيركىنىڭ رەكوردسمەنى مارلەن ماراتوۆ.
«سەربات» سيرك توبى ۇزاق ۋاقىت بويى الەمدىك ساحنادا تانىلىپ، «America's Got Talent»، «Britain's Got Talent» جانە «China’s Got Talent» سياقتى بەلگىلى شوۋلاردىڭ فيناليستەرى مەن جەڭىمپازدارى بولدى.
ولاردىڭ قويىلىمى ءارقاشان بىرەگەيلىگىمەن، شەبەرلىگىمەن جانە جوعارى تەحنيكالىق دەڭگەيىمەن ەرەكشەلەندى.
«ءبىز ونەرپازدارىمىزبەن ماقتانامىز. بۇل رەكورد – جەكە جەتىستىك قانا ەمەس، سونىمەن قاتار قازاق سيرك ونەرىنىڭ دامۋىنا قوسىلعان زور ۇلەس. ەندى قازاقستاندا ناعىز سيرك شەبەرلەرى بار ەكەنىن بۇكىل الەم بىلەدى»، — دەدى قازاق مەملەكەتتىك سيركىنىڭ ديرەكتورى ماقسات جايىقوۆ.
ونىڭ ايتۋىنشا، بۇل رەكورد قازاقستاندىق ارتىستەردىڭ دەڭگەيى جوعارى ەكەنىن دالەلدەپ، الماتى سيركىنىڭ حالىقارالىق ارەناداعى بەدەلىن نىعايتۋعا جاسالعان تاعى ءبىر قادام بولدى.