الماتىدا سىرتقى جارىقتاندىرۋ ساپاسىن ارتتىرۋ ماقساتىندا 84 جارىقسىز ۋچاسكەدە 16 كم جاڭا جەلى قۇرىلىسى باستالدى. 2025 جىلى 25 ساۋىردە 255 ۋچاسكەدە 93،2 كم جارىق جەلىلەرىن سالۋعا بايقاۋ جاريالاندى. بۇل تۋرالى قالا اكىمى ەربولات دوسايەۆتىڭ 2025 جىلعى 1-30 ءساۋىر ارالىعىنداعى پرەزيدەنتكە بەرگەن ەسەبىندە ايتىلدى، دەپ حابارلايدى aqshamnews.kz
- قالاداعى 7 ماگيسترالدى كوشەدە 19،6 كم جارىق جەلىسى جاڭارتىلىپ، 400 جاڭا شام ورناتىلىپ، 1،1 مىڭ شام اۋىستىرىلدى. ولاردىڭ قۋاتى ەكى ەسەگە ارتتى.
- سونداي-اق جارىقتاندىرۋ ساپاسىن ارتتىرۋ ءۇشىن جاڭارتۋدى قاجەت ەتەتىن 1 100 باسقارۋ شكافىنىڭ 320-سى جاڭارتىلدى. بيىل بۇل كورسەتكىش 70%-عا جەتپەك. بۇل جۇيەنىڭ سەنىمدىلىگى مەن جەدەلدىگىن ەداۋىر ارتتىرادى.
- 2025 جىلدىڭ باسىنان باستاپ رەسپۋبليكا الاڭىنداعى ەكى عيمارات پەن ق ر قارۋلى كۇشتەرىنىڭ اسكەري-تاريحي مۋزەيىندە ساۋلەتتىك جارىق ورناتىلدى. 2024 جىلى مۇنداي جارىقتاندىرۋ 25 نىساندا جۇزەگە اسىرىلعان.
ايتا كەتەيىك، 2023 جىلدىڭ تامىزىندا الماتىدا وتكەن كەڭەستە مەملەكەت باسشىسى قاسىم-جومارت توقايەۆ قالانى 2025 جىلدىڭ سوڭىنا دەيىن تولىق جارىقتاندىرۋدى تاپسىرعان. بۇل تاپسىرمانى ورىنداۋ ءۇشىن 2024 جىلدىڭ قاڭتارىنان باستاپ «الماتى قالا جارىق» كاسىپورنى قالا اكىمدىگىمەن بىرلەسىپ جۇمىس جۇرگىزىپ كەلەدى. بىلتىر جارىقتاندىرۋ دەڭگەيى 85%-عا جەتسە، بيىل بۇل كورسەتكىش 100%-عا جۋىقتايدى دەپ جوسپارلانعان.