الماتى قالالىق جەدەل شۇعىل كومەك كورسەتۋ اۋرۋحاناسىنا جۋىردا جاسى جۇزگە تولعان ماريا اپا ءتۇستى. ۇيىندە ابايسىزدا قۇلاپ قالعان كەيۋاناعا جەدەل جاردەم قىزمەتى دەرەۋ كومەك كورسەتىپ، اۋرۋحاناعا جەتكىزدى. تەكسەرۋ ناتيجەسىندە سول جاق جامباس سۇيەگىنىڭ سىنۋى، ناقتىراق ايتقاندا، سۇيەك بولىكتەرىنىڭ ىعىسۋىمەن اسقىنعان كۇردەلى جاراقات انىقتالدى.
مۇنداي دياگنوز كەز كەلگەن ادام ءۇشىن اۋىر سوققى ەكەنى انىق. ال عاسىر جاساعان اجەي ءۇشىن بۇل – ءومىر مەن ءولىم اراسىنداعى ۇلكەن سىناق.
دارىگەرلەر ناۋقاس اۋرۋحاناعا جەتكىزىلگەن كۇنى-اق وعان شۇعىل تۇردە جابىق رەپوزيسيا جانە وستەوسينتەز ءادىسى ارقىلى «گامما» ءتيپتى ينترامەدۋلليارلىق شتيفتپەن جامباس سۇيەگىن بەكىتۋ وتاسىن جاسادى. بار بولعانى 30 مينۋتقا سوزىلعان بۇل كۇردەلى وتا ءساتتى اياقتالدى.
تراۆماتولوگيا جانە ورتوپەديا بولىمشەسىنىڭ مەڭگەرۋشىسى مەدەت جانىسوۆتىڭ جەتەكشىلىگىمەن جاسالعان وتاعا اسسيستەنت يسلامبەك نۇرماحاشيەۆ، انەستەزيولوگ الىبەك ساتىبالدييەۆ جانە وتالىق مەدبيكە اسەل ابىلعازينوۆا قاتىستى. كاسىبي شەبەرلىك پەن كوماندالىق ۇيلەسىمدى جۇمىستىڭ ارقاسىندا ماريا اپا بىرنەشە كۇننىڭ ىشىندە جۇرۋگە ارنالعان كومەكشى قۇرالىنا سۇيەنە وتىرىپ قوزعالا باستادى. جەتىنشى كۇنى ونىڭ جاعدايى قاناعاتتانارلىق دەپ باعالانىپ، امبۋلاتوريالىق ەم الۋ ءۇشىن ۇيىنە شىعارىلدى.
– ءجۇز جاس – ۇلكەن بەلەس. ال وسىنداي جاسقا كەلگەن ادامنىڭ قايتا ءجۇرىپ كەتكەنىن كورۋ – ءبىز ءۇشىن زور مارتەبە. بۇل – ۋاقتىلى كورسەتىلگەن مەديسينالىق كومەكتىڭ، زاماناۋي ءتاسىل جانە ەڭ باستىسى، ناۋقاستىڭ ومىرگە دەگەن قۇلشىنىسىنىڭ جەمىسى، – دەيدى بولىمشە مەڭگەرۋشىسى مەدەت جانىسوۆ.