انتونينا لاۆرينەنكو الماتىعا نەمەرەسىنە قوناققا كەلگەن. تۇندە اجەي ءوز بولمەسىندە قۇلاپ، وڭ جاق سان سۇيەگىنىڭ جابىق ۇرشىقاستار سىنىعى اۋىر جاراقاتىن العان. مۇنداي جاعدايدا شۇعىل حيرۋرگيالىق ارالاسۋ قاجەت - تراۆماتولوگتار سان سۇيەگى بولىكتەرىن ىشكى بەكىتۋ ارقىلى قايتا ورنالاستىرادى، ايتپەسە پاسيەنت قوزعالا الماي قالۋى مۇمكىن.
92 جاستاعى ناۋقاس شەتەل ازاماتى، سوندىقتان نەمەرەسى كومەك ىزدەپ بىرنەشە جەكە كلينيكاعا بارعان. جاسى مەن وتا كەزىندە اسقىنۋ قاۋپىنە بايلانىستى وتا جاساۋعا اجەيدى ەشكىم الماعان.
«اجەم قۇلاعان سوڭ ونى قالالىق تراۆماتولوگيالىق ورتالىقتىڭ بىرىنە اپارىپ، العاشقى مەديسينالىق كومەك الدىق. اجەمنىڭ جاسىنا بايلانىستى وعان وتا جاساۋ ۇسىنىلمادى. وڭ اياققا دەروتاسيوندى ەتىكشە سالىنىپ، كەم دەگەندە 2 اي توسەك دەمالىسى ۇسىنىلدى. جەكە كلينيكادا بىرنەشە رەت كەڭەس الدىق. بىزگە 91 جاستاعى قارت ادام ءۇشىن بۇل ادىسپەن سۇيەك 6 ايدان استام ۋاقىت بويى جازىلادى، ءارى ساۋىعىپ، ودان كەيىن جۇرە الاتىنى ەكىتالاي ەكەنىن ايتتى. بۇل ءبىرقاتار قايتىمسىز سالدارعا، سونىڭ ىشىندە توسەك دەمالىسىنا بايلانىستى باسقا ورگانداردىڭ اسقىنۋىنا، ءتىپتى ولىمگە اكەلۋى مۇمكىن ەكەن. بۇل رەتتە بارلىعى اجەمە وتا جاساۋعا كەڭەس بەردى، ءبىراق ونىڭ جاسىنا بايلانىستى بىردە-بىر جەكە كلينيكا ونى قابىلدامادى. ءبىز №4 قالالىق كلينيكالىق اۋرۋحاناعا حابارلاستىق. ءتورتىنشى قالالىق اۋرۋحانانىڭ دارىگەرلەرى مەن مەدبيكەلەرىنەن قۇرالعان بريگادانىڭ قاتاڭ باقىلاۋىمەن بۇكىل تاريحىمىزدى زەرتتەپ، تەكسەرىس، سىناقتاردان كەيىن اجەمدى ەمدەۋگە الدى. گامما وزەكتى پايدالانىپ، وڭ جاق سان سۇيەگى بولىكتەرىنىڭ جابىق رەپوزيسياسى وتاسى جاسالدى. وتادان كەيىن ءبىر اپتادان سوڭ اجەمىز ارنايى ءجۇرىس ارباسىمەن جۇرە الدى. قابىلداۋ ءبولىمىنىڭ مەڭگەرۋشىسى حايرويەۆ ماگادين ميكايلوۆيچكە جانە №4 قالالىق كلينيكالىق اۋرۋحانانىڭ ۇجىمىنا كاسىبي شەبەرلىگى مەن ءىلتيپاتى ءۇشىن كوپ راحمەت. ءبىر جارىم اي وتكەن سوڭ، بۇگىن بىزدە باقىلاۋ تەكسەرۋ بولدى. اجەم ءقازىر تاياقپەن جۇرە الادى! مىڭ العىس!» - دەيدى نەمەرەسى تيمۋر.
№4 قالالىق كلينيكالىق اۋرۋحاناعا 1932 جىلى تۋعان ناۋقاس وڭ جاق جامباس بۋىنى ايماعىنداعى اۋرۋ سەزىمىنە جانە وڭ اياقتىڭ تىرەك فۋنكسياسىنىڭ بۇزىلۋىنا شاعىمدانىپ تۇسكەن. ناۋقاس جاراقاتتى ءبىر كۇن بۇرىن وڭ جاق جامباس بۋىنىنا قۇلاپ العان. دياگنوزى: سۇيەك بولىكتەرىنىڭ ىعىسۋىمەن وڭ جاق سان سۇيەگىنىڭ جابىق ۇرشىقاستار سىنۋى. ناۋقاس بىردەن ورتوپەديالىق حيرۋرگيا بولىمىنە حيرۋرگيالىق ەمدەۋگە جاتقىزىلدى.
«ناۋقاس اۋرۋحاناعا جاتقىزىلعان كۇنى ءبىز وعان شۇعىل جامباس سۇيەگى بولىكتەرىنىڭ جابىق رەپوزيسياسىن قۇلىپتاۋشى ينترامەدۋلليارلىق يمپلانتپەن ىشكى بەكىتۋ وتاسىن جاسادىق. وتا 1،5 ساعاتقا سوزىلدى. حاتتاماعا سايكەس، ناۋقاس اۋرۋحانا جاعدايىندا اياعىنا تۇرعىزىلدى، ول ءجۇرىس ارباسى كومەگىمەن قوزعالا باستادى. ال ءبىر اپتادان سوڭ جاعدايى جاقسارىپ، اجەي امبۋلاتورلىق ەمدەلۋگە ۇيگە شىعارىلدى»، - دەيدى №4 قالالىق كلينيكالىق اۋرۋحانانىڭ قابىلداۋ ءبولىمىنىڭ مەڭگەرۋشىسى، تاجىريبەلى تراۆماتولوگ-ورتوپەد ماگادين حايرويەۆ.
وتانى قابىلداۋ ءبولىمىنىڭ مەڭگەرۋشىسى م.م. حايرويەۆ، اسسيستەنت تراۆماتولوگ-ورتوپەد ن.م. كيساكوۆ، انەستەزيولوگ-رەانيماتولوگ ا.ە. بيجانوۆ، وتالىق مەدبيكە ر.م. اۋباكيروۆا جاسادى.