مەدەۋ اۋدانىنداعى № 2 اۋداندىق سوتىندا قىز زورلاۋ ءىسى بويىنشا كۇدىكتى 34 جاستاعى الماتىلىق ەر ادامعا قاتىستى قىلمىستىق ءىس قارالدى. ءىس جىنىستىق قىلمىسقا بايلانىستى بولعاندىقتان، سوت وتىرىسى جابىق ءوتتى، دەپ حابارلايدى almaty-akshamy.kz.
سوتتا 2023 جىلى 8-نەن 9-شى ناۋرىزعا قاراعان ءتۇنى الماتىلىق ازامات قالانىڭ تۇنگى كلۋبتارىنىڭ بىرىندە كوڭىل كوتەرىپ، سول ارادا ءوز قۇربىلارىمەن بىرگە تانىسى و-نى كورگەنىن، بۇدان كەيىن، ك. ونى ۇيىنە شىعارىپ سالامىن دەگەن سىلتاۋمەن ءوز پاتەرىنە اكەلگەنى، ارى قاراي جابىرلەنۋشىنىڭ دارمەنسىز كۇيىن (الكوگولدىك ماس بولۋ) پايدالانىپ، زورلىق-زومبىلىق كورسەتىپ، ەركىنەن تىس جىنىستىق قاتىناسقا ماجبۇرلەگەنى انىقتالدى.
سوتتالۋشى ك. كىناسىن مويىندامادى جانە سوتتان ءوزىن اقتاۋدى نەمەسە باس بوستاندىعىنان ايىرۋعا بايلانىستى ەمەس جازا تاعايىنداۋدى سۇرادى.
پروكۋرور سوتتالۋشىنى كىنالى دەپ تانۋدى جانە 5 جىل 4 ايعا باس بوستاندىعىنان ايىرۋ جازاسىن تاعايىنداۋدى سۇرادى.
"سوتتالۋشىنىڭ كىناسى ءىس بويىنشا جينالعان ساراپتامالاردىڭ قورىتىندىلارى، جابىرلەنۋشى مەن كۋاگەرلەردىڭ ايعاقتارى ارقىلى دالەلدەندى. سوت ۇكىمىمەن ك. ق ر قك-نىڭ 120-بابى، 1-بولىگى بويىنشا كىنالى دەپ تانىلىپ، وعان 5 جىلعا باس بوستاندىعىنان ايىرۋ تۇرىندەگى جازا تاعايىندالدى. سوتتالۋشى جازاسىن قاۋىپسىزدىگى ورتاشا قىلمىستىق-اتقارۋ جۇيەسى مەكەمەسىندە وتەيدى"، - دەلىنگەن سوت حابارلاماسىندا.