ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىنىڭ كۋرسانتتارى مەن الماتى قالاسى المالى اۋدانى قورعانىس ىستەرى جونىندەگى باسقارماسىنىڭ وكىلدەرى ۇلى وتان سوعىسىنىڭ ارداگەرى زۇلحارناي سەيىتوۆتى 101 جاسقا تولعان تۋعان كۇنىمەن قۇتتىقتادى.
ستالينگراد شايقاسىندا قان توككەن قارت مايدانگەر بەلورۋسسيا مەن پولشانى جاۋدان ازات ەتكەن. بەرلينگە جەتىپ، پوتسدام كوشەلەرىن مينادان تازارتۋعا قاتىسقان، دەپ حابارلايدى اlmaty-akshamy.kz.
قوناقتارعا ريزاشىلىعىن بىلدىرگەن تۋعان كۇن يەسى جاستارعا اق باتاسىن بەردى.
– ءبىزدى ۇمىتپاعاندارىڭا راحمەت. ەگدە جاستاعى ادامدار ءۇشىن مۇنداي كەزدەسۋلەر مەرەكە. ەلىمىزدىڭ گۇلدەنۋىن، قازاقستاندىقتاردىڭ بەيبىتشىلىك پەن كەلىسىمدە ءومىر ءسۇرۋىن ارماندايمىن. ال بولاشاق وفيسەرلەرگە گەنەرال بولىپ، وتانىمىزدىڭ يگىلىگى ءۇشىن قىزمەت ەتۋدى تىلەيمىن، – دەدى زۇلحارناي سەيىتوۆ.
ارداگەر 1922 جىلى 27 جەلتوقساندا ومبى وبلىسى، جاڭا قىپشاق اۋىلىندا دۇنيەگە كەلگەن. 1942 جىلى قىزىل ارميا قاتارىنا شاقىرىلىپ، سۆەردلوۆسك وبلىسىنداعى تۋرينسك قالاسىنا اسكەري ءىس بويىنشا وقۋعا جىبەرىلەدى. سول جىلى ول لەنينگراد مايدانىنا اتتانىپ، وندا 2ء-شى ەكپىندى ارميا قۇرامىندا باسقىنشىلارمەن شايقاستى.
كەيىننەن ساپەر كۋرستارى بويىنشا ارنايى دايىندىقتان وتەدى. ديۆەرسانتتار مەن ءتارتىپ ساقشىلارىنىڭ ماڭىزدى جاۋىنگەرلىك جۇمىسىن اتقارعان قىزمەتتىك يتتەرمەن ول ستالينگرادتان بەلورۋسسيا مەن پولشا ارقىلى ءوتىپ، بەرلينگە جاسالعان شابۋىلعا قاتىسادى.
مايدانگەردىڭ جاۋىنگەرلىك ەڭبەگى «قىزىل جۇلدىز»، II دارەجەلى «وتان سوعىسى» وردەندەرىمەن، «ستالينگرادتى قورعاعانى ءۇشىن»، «ەرلىگى ءۇشىن»، «1941-1945 جىلدارداعى ۇلى وتان سوعىسىنداعى ەرەن ەڭبەگى ءۇشىن» مەدالدارىمەن ماراپاتتالعان.
سوعىستان كەيىن زۇلحارناي سەيىتوۆ ومبى اۋىل شارۋاشىلىعى ينستيتۋتىن ءبىتىرىپ، قازاقستانعا جىبەرىلەدى. مۇندا ول بيولوگيا عىلىمدارىنىڭ دوكتورى جانە اكادەميك بولدى. ارىپتەستەرىمەن بىرگە «قازاق بالزامى» جانە «التىنسۋ» ەمدىك سۋسىندارىن ازىرلەۋگە قاتىستى. قىمىز، شۇبات، بيە جانە تۇيە ءسۇتىن قۇرعاق دايىنداۋ تەحنولوگيالارىن جاسادى.
ەڭبەك سىڭىرگەن عىلىم قايراتكەرى زۇلحارناي سەيىتوۆ 150-دەن استام عىلىمي جۇمىستار مەن مونوگرافيالاردىڭ، 14 پاتەنت پەن 8 اۆتورلىق كۋالىكتىڭ، 10 وقۋ قۇرالىنىڭ، ونىڭ ىشىندە قازاق، ورىس جانە اعىلشىن تىلدەرىندەگى «بيوحيميا» وقۋلىعىنىڭ اۆتورى. ونىڭ كوپتەگەن ازىرلەمەلەرى مەن جاڭالىقتارى بۇگىندە مەديسينادا دا، تاماق ونەركاسىبىندە دە كەڭىنەن قولدانىلادى.