الماتى №4 قالالىق كلينيكالىق اۋرۋحانا دارىگەرلەرى ۇلكەن جاتىر ميوماسىن ەمدەۋ كەزىندە اعزانى ساقتايتىن ءادىستى ءساتتى قولداندى. ناتيجەسىندە ناۋقاس راديكالدى وتا جاسالىپ، اعزانى الىپ تاستاۋ قاۋپىنەن امان قالدى.
44 جاستاعى تاتياناعا بىرنەشە جىل بۇرىن ولشەمى 10،0×6،0 سم، ياعني شامامەن 14 اپتالىق جۇكتىلىككە سايكەس كەلەتىن جاتىر ميوماسى دياگنوزى قويىلعان. دارىگەرلەر ءداستۇرلى اشىق وتا ارقىلى جاتىر مەن باسقا دا رەپرودۋكتيۆتىك مۇشەلەردى الىپ تاستاۋدى ۇسىنعان. بۇل جاعداي ايەلدى قاتتى كۇيزەلىسكە ءتۇسىردى.
اتالعان پاتولوگيانى حيرۋرگيالىق جولمەن الىپ تاستاۋ قالىپتاسقان تاجىريبە بولعانىنا قاراماستان، اۋرۋحانانىڭ گينەكولوگ دارىگەرلەرى ەندوۆاسكۋليارلىق حيرۋرگ، رەنتگەن-ەندوۆاسكۋليارلىق حيرۋرگيا جانە كارديولوگيا ءبولىمىنىڭ مەڭگەرۋشىسى نارينبايەۆ اسكار ساليموۆيچپەن بىرلەسە وتىرىپ، كەزەڭ-كەزەڭىمەن جۇرگىزىلەتىن تاكتيكانى - جاتىر ارتەريالارىن ەمبوليزاسيالاۋ (جاە) ءادىسىن تاڭدادى. بۇل شاعىن ءينۆازيۆتى ءتاسىل ناۋقاستىڭ جاتىرىن جانە رەپرودۋكتيۆتىك دەنساۋلىعىن ساقتاۋعا مۇمكىندىك بەردى.
پروسەدۋرا ءساتتى ءوتتى: ميومانى قورەكتەندىرەتىن ارتەريالارعا جىڭىشكە كاتەتەر ارقىلى ارنايى ميكروبولشەكتەر ەنگىزىلىپ، ىسىككە باراتىن قان اعىمى توقتاتىلدى. ۋاقىت وتە كەلە ميوماتوزدىق ءتۇيىن ايتارلىقتاي كىشىرەيىپ، سوڭعى ۋلترادىبىستىق زەرتتەۋ دەرەگى بويىنشا ونىڭ كولەمى 1،5×1،0 سم-گە دەيىن ازايعان. ياعني ىسىك دەرلىك جويىلدى. ناۋقاس اۋىر وتانى باستان وتكەرمەي، تەز قالپىنا كەلىپ، قالىپتى ءومىر سالتىنا قايتا ورالدى. بۇل جەتىستىك پاسيەنتتىڭ دارىگەرلەرگە دەگەن سەنىمى مەن بۇكىل مەديسينالىق پەرسونالدىڭ، سونىڭ ىشىندە وتادان كەيىنگى كەزەڭدە ساپالى كۇتىم كورسەتكەن گينەكولوگيا ءبولىمىنىڭ ۇيلەسىمدى كاسىبي ەڭبەگىنىڭ ناتيجەسى بولدى.
اسكار نارينبايەۆ بۇل ادىسكە قاتىستى بىلاي دەپ ءتۇسىندىردى:
"جاتىر ارتەريالارىن ەمبوليزاسيالاۋ - ءداستۇرلى حيرۋرگيالىق الىپ تاستاۋعا بالاما بولىپ سانالاتىن زاماناۋي شاعىن ءينۆازيۆتى پروسەدۋرا. ميوما - جاتىردىڭ بۇلشىقەت قاباتىندا داميتىن قاتەرسىز ىسىك. سان نەمەسە كارىجىلىك ارتەرياسى ارقىلى ەنگىزىلگەن كاتەتەر ارقىلى ەمبولالار جىبەرىلەدى، ولار ءتۇيىندى قورەكتەندىرەتىن قان اعىمىن بوگەيدى. سونىڭ ناتيجەسىندە ىسىك كىشىرەيىپ، قان كەتۋ مەن اۋىرسىنۋ بەلگىلەرى جويىلادى، ال جاتىر تولىق ساقتالادى. پروسەدۋرا شامامەن 30 مينۋتقا سوزىلادى، جەرگىلىكتى جانسىزداندىرۋمەن جۇرگىزىلەدى، قالپىنا كەلۋ ۋاقىتى قىسقا، ال اسەرى بىرتىندەپ بايقالادى. جاە-دان كەيىن ۋاقىتشا تارتاتىن اۋىرسىنۋ، دەنە قىزۋىنىڭ ءسال كوتەرىلۋى نەمەسە بولىنىستەر بولۋى مۇمكىن - بۇل قالىپتى جاعداي، ولار اۋىرسىنۋدى باساتىن ءدارىنىڭ كومەگىمەن ەكى اپتا ىشىندە باسىلادى. ەڭ باستى ناتيجە - اعزانىڭ ساقتالۋى جانە ەتەككىر سيكلىنىڭ قالپىنا كەلۋى".
سوڭىندا تاتيانا ريزاشىلىعىن ءبىلدىرىپ:
"ەڭبەگىڭىز، قامقورلىعىڭىز جانە ايەلدەرگە ءۇمىت پەن تولىققاندى ءومىر ءسۇرۋ مۇمكىندىگىن سىيلاعانىڭىز ءۇشىن شىن جۇرەكتەن العىس ايتامىن! اسكار ساليموۆيچ ميومانى قورەكتەندىرەتىن بارلىق ارتەريانى اسا دالدىكپەن جاۋىپ شىقتى، بۇگىندە ىسىك دەرلىك جوعالدى. وسىنداي بىلىكتى مامانمەن جولىقتىرعان تاعدىرىما ريزامىن"، - دەدى.