الماتى قالاسى ناۋرىزباي اۋدانىنداعى №174 مەكتەپ-گيمنازياسىندا وقۋشىلار جۋرناليستيكا نەگىزدەرىن مەڭگەرىپ، ءوز ويلارىن قاعاز بەتىنە ساۋاتتى ءارى شەبەر جەتكىزۋدى ۇيرەنىپ ءجۇر. مۇنداي مۇمكىندىككە ولار مەكتەپىشىلىك «ۇرپاق ءۇنى» گازەتى ارقىلى يە بولدى.
– الەۋمەتتىك جەلىلەر ارقىلى سىرتقى الەممەن بايلانىس بۇگىندە قالامىزداعى مەكتەپتەردىڭ ءومىرىنىڭ اجىراماس بولىگىنە اينالدى. ءبىراق بۇكىل الەمگە مەكتەپ جەتىستىكتەرىن جاريالاۋ ءبىر باسقا، ال سول جەتىستىكتەر مەن مەكتەپ قاھارماندارىن وقۋشىلار مەن مۇعالىمدەردىڭ وزدەرىنە تانىستىرۋ – مۇلدە باسقا ماسەلە. وسى ماقساتتا «ۇرپاق ءۇنى» گازەتى قۇرىلدى. بۇل باسىلىم ماڭىزدى وقيعالاردى جاريالاپ قانا قويماي، وقۋشىلار مەن ۇستازدار اراسىنداعى بايلانىستى نىعايتىپ، «وقۋشى – اتا-انا – ءمۇعالىم» ۇشتىگىنىڭ ۇيلەسىمدى جۇمىسىنا جول اشادى، – دەيدى ناۋرىزباي اۋداندىق ءبىلىم ءبولىمىنىڭ باسشىسى سالتانات قۇسايىنوۆا.
مەكتەپتە قولعا الىنعان وسى الەۋمەتتىك ماڭىزى بار جوبانىڭ ناتيجەسىندە ارنايى مەديا-ستۋديا اشىلدى. جاقىندا وقۋشىلار ءوز قولدارىمەن ازىرلەگەن «ۇرپاق ءۇنى» گازەتىنىڭ العاشقى ساندارىن جارىققا شىعاردى. گازەتتە مەكتەپ ومىرىنە قاتىستى قىزىقتى، پايدالى ءارى تانىمدىق ماتەريالدار جاريالانادى. باسىلىم ايىنا ءبىر رەت باسپاحانادا باسىلىپ شىعادى. ونى وقۋشىلار ءوز باستاماسىمەن، مۇعالىمدەردىڭ قولداۋىمەن جۇزەگە اسىرادى. مۇعالىمدەر اراسىنان باس رەداكتور تاعايىندالعانىمەن، نەگىزگى جۇمىستى – ديزاينەرلىك، تىلشىلىك، فوتو جانە تاعى باسقا مىندەتتەردى وقۋشىلار وزدەرى اتقارادى.
– «ۇرپاق ءۇنى» – جاڭا بۋىننىڭ مەدياجوباسى. ول جاستاردىڭ ءۇنىن، ارمانى مەن كوزقاراسىن جەتكىزەتىن باسىلىم. گازەتتىڭ ماقساتى – مەكتەپتەگى شىعارماشىلىق پەن اقپاراتتىق الاڭدى دامىتۋ، وقۋشىلاردى جۋرناليستيكا مەن ءسوز ونەرىنە باۋلۋ، قوعاممەن قارىم-قاتىناس مادەنيەتىن قالىپتاستىرۋ جانە «وقۋشى – ءمۇعالىم – اتا-انا» ىنتىماقتاستىعىن نىعايتا وتىرىپ، مەكتەپتەگى باسپا ءسوز ورتالىعىنىڭ جۇمىسىن جانداندىرۋ، – دەيدى قازاق ءتىلى مەن ادەبيەتى ءپانىنىڭ ءمۇعالىمى، باس رەداكتور جەتكەنشەك مەڭدىعالييەۆ.
جۋىردا مەكتەپتە گازەتتىڭ سالتاناتتى تۇساۋكەسەرى ءوتتى. ءىس-شاراعا ۇستازدار، وقۋشىلار مەن ارداقتى قوناقتار قاتىستى.