وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسى ءبىلىم باسقارماسىنىڭ ستراتەگيا جانە كاسىپتىك ءبىلىم بەرۋ ءبولىمىنىڭ باسشىسى ەرىك ابىشايەۆ تەحنيكالىق جانە كاسىپتىك ءبىلىم بەرۋ جۇيەسىندەگى دۋالدى وقىتۋدى دامىتۋ بارىسى مەن حالىقارالىق ىنتىماقتاستىق تۋرالى ايتىپ بەردى.
سپيكەردىڭ ايتۋىنشا، كوللەدجدەر ءوندىرىس ورىندارىمەن تىعىز بايلانىسىپ ءبىلىم بەرەدى ەكەن. ءقازىر 22 مىڭنان استام ستۋدەنت، ياعني تەگىن وقيتىنداردىڭ 43،7%-ى وسى دۋالدى وقىتۋ جۇيەسى بويىنشا ءبىلىم الىپ جاتىر.
"دۋالدى وقىتۋ ستۋدەنتتەرگە ءوندىرىس ورنىنىڭ وزىندە كاسىبي داعدىنى مەڭگەرىپ الىپ، ولاردى ەڭبەك نارىعىنا جۇمىس ىستەگەن، تاجىريبەسى بار مامان بولىپ بارۋىنا مۇمكىندىك بەرەدى"، – دەيدى ەرىك ابىشايەۆ.
بۇل مودەلدى ىسكە اسىرۋ ماقساتىندا 71 ماماندىق بويىنشا 770 كاسىپورىنمەن كەلىسىمشارت جاسالعان. 2025 جىلدىڭ قورىتىندىسى بويىنشا كوللەدج تۇلەكتەرىن جۇمىسقا ورنالاستىرۋ دەڭگەيى 94،3%-دى قۇرادى، ونىڭ ىشىندە 17 مىڭنان استام تۇلەك تۇراقتى جۇمىسقا ورنالاسقان.
سونىمەن قاتار، شەتەلدىك سەرىكتەستەرمەن ىنتىماقتاستىق اياسىندا الماتىنىڭ التى كوللەدجىنەن 110 ستۋدەنت قىتايدا، تاعى 16 ستۋدەنت گەرمانيانىڭ كاسىپورىندارىندا اقىلى وندىرىستىك پراكتيكادان ءوتىپ قايتتى.
"حالىقارالىق پراكتيكا مەن قوس ديپلومدى ءبىلىم بەرۋ باعدارلاماسى ستۋدەنتتەرگە باسەكەگە قابىلەتتى داعدىنى مەڭگەرىپ، ەلدىڭ شەڭبەرىنەن شىعىپ، حالىقارالىق ەڭبەك نارىعىندا دا سۇرانىسقا يە بولۋىنا سەپ بولىپ وتىر"، – دەپ اتاپ ءوتتى سپيكەر.
تەحنيكالىق جانە كاسىپتىك ءبىلىم بەرۋ جۇيەسىندە ستۋدەنتتەردىڭ كاسىبي داعدىلارىن حالىقارالىق ستاندارتتارعا ساي دامىتۋعا ەرەكشە كوڭىل بولىنەدى. الماتىنىڭ مەملەكەتتىك كوللەدجدەرىندە WorldSkills ستاندارتتارى بويىنشا دەمونستراسيالىق ەمتيحاندار ەنگىزىلگەن. بۇل ەمتيحاندار تۇلەكتەردىڭ كاسىبي دايىندىق دەڭگەيىن وبەكتيۆتى تۇردە باعالاۋعا مۇمكىندىك بەرەدى.
سپيكەردىڭ ايتۋىنشا، بۇل ستۋدەنتتەرگە ءوز داعدىسىن راستاپ، جۇمىس بەرۋشىلەرگە بولاشاق مامانداردىڭ دايىندىق دەڭگەيىن كورۋگە جول اشادى.
2025 جىلى دەمونستراسيالىق ەمتيحاندارعا 3 620 تۇلەك قاتىسىپ، ولاردىڭ 3 521ء-ى Skills Passport يەگەرى اتاندى. الماتىدا ستۋدەنتتەردىڭ ماشىقتانۋىن وندىرىسكە بارىنشا جاقىن ورتادا جەتىلدىرەتىن 18 قۇزىرەتتەر ورتالىعى جۇمىس ىستەيدى. WorldSkills ايماقتىق جانە ىرىكتەۋ چەمپيوناتىنىڭ قورىتىندىسى بويىنشا جەڭىمپازدارعا اكىمدىك تاراپىنان جالپى سوماسى 9 ملن تەڭگە كولەمىندە اقشالاي سىياقى تولەندى.