الماتىدا جۇمىسشى ماماندىقتارىن دامىتۋ مەن تەگىن كاسىپتىك ءبىلىم بەرۋ ەڭبەك ادامىن قولداپ، جاستاردى جۇمىسپەن قامتۋدىڭ نەگىزگى تەتىگىنە اينالىپ بارادى. وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا وسى تۋرالى ايتىلدى. ساۋلەت، ديزاين جانە ينجەنەريا كوللەدجىنىڭ ديرەكتورى كامال جامانعوزوۆ جۇمىسشى كادرلاردى دايارلاۋ مەن تەحنيكالىق جانە كاسىپتىك ءبىلىم بەرۋ (تجكب) جۇيەسىن ترانسفورماسيالاۋ قالانى دامىتاتىن ماڭىزدى فاكتور ەكەنىن اتاپ ءوتتى.
سپيكەردىڭ ايتۋىنشا، ءقازىر قالا ەكونوميكاسى بىلىكتى جۇمىسشى ماماندارعا قاتتى تاۋەلدى بولىپ تۇر. ينۆەستيسيالاردى، وسى زامانعى تەحنولوگيالار مەن ۇلكەن ينفراقۇرىلىمدىق جوبالاردى بۇل سالانىڭ ۇڭعىل-شۇڭعىلىن بىلەتىن جاقسى ماماندارسىز قولعا الۋ قيىن. سوندىقتان تەحنيكالىق جانە كاسىپتىك ءبىلىم بەرۋ جۇيەسى وڭىرلىك ساياساتتا الدىنعى قاتارعا شىعىپ وتىر.
"ءبىز ديپلومعا بولا وقىتاتىن مودەلدەن باس تارتىپ، قالانىڭ ەكونوميكاسىنا كەرەك مامانداردى دايارلاۋعا كوشىپ جاتىرمىز. ءقازىر كوللەدجدەرگە دە تۇلەكتەردىڭ سانىنان گورى، ءارقايسىسىنىڭ ءبىرىنشى كۇننەن باستاپ جۇمىسقا دايىن بولىپ، جۇمىسقا ورنالاسقانى ماڭىزدى"، – دەيدى كامال جامانعوزوۆ.
جۇمىسشى كادر دايارلاۋدى جۇمىس بەرۋشىلەرمەن بىرلەسىپ قولعا العان. وقۋ باعدارلامالارى ناقتى وندىرىستىك ۇدەرىسكە بەيىمدەلىپ، دۋالدى وقىتۋ كەڭەيتىلىپ، پراكتيكالىق ءبولىم جاعى دا كۇشەيتىلدى. ول بيزنەس بىلىكتىلىك تالاپتارىن قالىپتاستىرۋعا، وندىرىستىك پراكتيكانى ۇيىمداستىرۋعا جانە وقۋ ناتيجەلەرىن باعالاۋعا بەلسەندى قاتىسىپ، ءبىلىم بەرۋ مەن ەڭبەك نارىعىنىڭ اراسىنداعى الشاقتىقتى قىسقارتۋعا مۇمكىندىك بەرىپ وتىر.
"جۇمىس بەرۋشىلەر ءقازىر كوللەدجدەرگە سەرىكتەس بولىپ وتىر. ولار داعدىعا قويىلاتىن تالاپتى قالىپتاستىرۋعا كومەكتەسەدى، ستۋدەنتتەردى تاجىريبەدەن وتكىزىپ، ولاردىڭ دايىندىق دەڭگەيىن باعالايدى. ياعني، وقۋ بارىسىن وندىرىسپەن ۇيلەستىرىپ وتىرمىز"، – دەپ اتاپ ءوتتى كوللەدج ديرەكتورى.
تجكب جۇيەسى تەرەڭ ترانسفورماسيا كەزەڭىنەن ءوتىپ جاتىر. سپيكەردىڭ ايتۋىنشا، قازىرگى كوللەدج وقۋ ورنى عانا ەمەس، كادرلار دايارلايتىن، ەرەسەك مامانداردى قايتا دايارلاۋمەن اينالىساتىن، جاڭا تەحنولوگيالار مەن وندىرىستەردى ەنگىزۋدى سۇيەمەلدەيتىن قۇزىرەتتەر ورتالىعى. مۇنداي مودەل كوللەدجدەردى قالانىڭ ەكونوميكالىق ينفراقۇرىلىمىنا كىرىكتىرەدى.
تجكب ترانسفورماسياسى الماتى ەكونوميكاسىنىڭ تۇراقتىلىعىنا تىكەلەي اسەر ەتەدى. كاسىپورىندار دايىن ماماندارعا قول جەتكىزىپ، قىزمەتكەرلەردى قايتا وقىتۋعا كەتەتىن شىعىنداردى ازايتادى، تۇلەكتەر تۇراقتى جۇمىسپەن قامتىلىپ، قىزمەتتە كاسىبي تۇرعىدا وسۋگە مۇمكىندىك الادى.
"تۇراقتى ناتيجەگە مەملەكەت پەن ءبىلىم باسقارماسى تاراپىنان جۇيەلى قولداۋ كورسەتىلمەي قول جەتكىزۋ مۇمكىن ەمەس. ماتەريالدىق-تەحنيكالىق بازانى جاڭارتۋ، بيزنەس-پەن ارىپتەستىكتى دامىتۋ مەن كوللەدجدەردىڭ باسقارۋعا يكەمدىلىگى ديرەكتورلارعا باسقارۋشى رەتىندە سەنىم ءبىلدىرىپ، ۇيلەسىمدى شەشىمدەردى قولا الۋدى تالاپ ەتەدى"، – دەپ قوستى كامال جامانعوزوۆ.
ناتيجەسىندە، جۇمىسشى كادرلاردى دايارلاۋ مەن تەحنيكالىق جانە كاسىپتىك ءبىلىم بەرۋ جۇيەسىن ترانسفورماسيالاۋ بۇگىندە ءبىلىم بەرۋدى عانا مىندەتتەپ قويماي، الماتى مەن تۇتاس ءوڭىردىڭ ەكونوميكاسىن تۇراقتى دامىتۋعا باعىتتالعان ستراتەگيالىق ينۆەستيسيا رەتىندە قاراستىرىلىپ وتىر.