وڭىرلىك كوممۋنيكاسيالار قىزمەتى الاڭىندا الماتى قالاسى ءبىلىم باسقارماسىنىڭ ستراتەگيا جانە كاسىپتىك ءبىلىم بەرۋ ءبولىمىنىڭ باسشىسى ەرىك ابىشايەۆ تەحنيكالىق جانە كاسىپتىك ءبىلىم بەرۋ (تجكب) جۇيەسىن مەملەكەتتىك قولداۋ مەن كوللەدج ينفراقۇرىلىمىن دامىتۋ بارىسى تۋرالى باياندادى.
سپيكەردىڭ ايتۋىنشا، 2026 جىلى تجكب جۇيەسىنىڭ بيۋدجەتى 53،3 ملرد تەڭگەنى قۇراعان. بۇل تەگىن ءبىلىم الۋعا قولجەتىمدىلىكتى كەڭەيتىپ، ستۋدەنتتەرگە الەۋمەتتىك قولداۋدى كۇشەيتە تۇسۋگە مۇمكىندىك بەرىپتى.
"تەحنيكالىق جانە كاسىپتىك ءبىلىم بەرۋ سالاسىنداعى مەملەكەتتىك ساياسات ءار ستۋدەنتتىڭ ۇي-ىشىنە سالماق سالماي، سۇرانىسقا يە بولىپ وتىرعان ماماندىقتى وقىپ، ولاردىڭ بارىنشا ءبىلىم الىپ، ءجۇرىپ-تۇرۋىنا قاجەتتى جاعداي جاساۋعا باعىتتالعان"، – دەپ اتاپ ءوتتى ەرىك ابىشايەۆ.
ءقازىر الماتىداعى 88 كوللەدجدە 86 مىڭنان استام ستۋدەنت ءبىلىم الىپ جاتىر. ولاردىڭ 58%-ى مەملەكەتتىك ءبىلىم بەرۋ تاپسىرىسى اياسىندا تەگىن وقيدى. 2025 جىلى مەملەكەتتىك تاپسىرىس بويىنشا 17 491 ستۋدەنت قابىلدانىپ، الدىنعى جىلمەن سالىستىرعاندا جوعارى كورسەتكىشتى كورسەتتى.
"بۇل ءار جاستىڭ ۇي-ىشىنە سالماق سالماي، ساپالى كاسىپتىك ءبىلىم الۋىنا ناقتى مۇمكىندىك بەرەتىن قادام. كادر دايارلاۋ ەكونوميكانىڭ باسىم سالالارى بويىنشا 131 ماماندىق پەن 220 بىلىكتىلىكتى قامتيدى، بۇل جاستاردىڭ ەڭبەك نارىعىندا سۇرانىسقا يە قۇزىرەتتەردى مەڭگەرۋىنە جول اشادى"، – دەيدى.
كوللەدج ينفراقۇرىلىمىن دامىتۋعا دا ەرەكشە كوڭىل بولىنگەن. بىلتىر مەملەكەتتىك كوللەدجدەردى جوندەۋ مەن جابدىقتاۋعا جەرگىلىكتى بيۋدجەتتەن 2،4 ملرد تەڭگە ءبولىندى. الەۋمەتتىك ارىپتەستەردىڭ ەسەبىنەن ءتورت كوللەدجدىڭ ماتەريالدىق-تەحنيكالىق بازاسى دا 538 ملن تەڭگەگە جاڭارتىلدى.
"ءبىز وقۋ كورپۋستارىن، شەبەرحانالار مەن زەرتحانالاردى بىرتىندەپ جاڭعىرتىپ جاتىرمىز. بۇل وقىتۋ مەن ءبىلىم بەرۋدى ەڭبەك نارىعىنداعى زامان تالابىنا سايكەستەندىرۋگە سەپ بولادى"، – دەيدى سپيكەر.
ستۋدەنتتەردىڭ جاتاقحانامەن قامتىلۋ ماسەلەسىن شەشۋ ماقساتىندا 1 720 ورىنعا ارنالعان سەگىز جاڭا جاتاقحانا سالۋ دا جوسپارلانىپ وتىر. بىلتىر 120 ورىندىق جاتاقحاناسى بار جاڭا كوللەدج پايدالانۋعا بەرىلگەن بولاتىن.