الماتى قالاسى بويىنشا قاج دەپارتامەنتىنىڭ №11 مەكەمەسىندە 1 جەلتوقسان – دۇنيەجۇزىلىك جيتس-كە قارسى كۇرەس كۇنىنە وراي اتالعان ينفەكسيانىڭ تارالۋ جولدارى مەن ودان قالاي ساقتانۋ تۋرالى ءدارىس ءوتتى.
ماڭىزدى ءىس-شاراعا «وتباسىلىق دارىگەر» قوعامدىق قورىنىڭ جەتەكشىسى جىبەك امەنوۆا، «قامقورلىق تN-2018» قوعامدىق قورىنىڭ جەتەكشىسى ماديار ءابدىلوۆ، «ريەۆانش» قورىنىڭ جەتەكشىسى ەلەنا بەلوكون، قازاقستان رەستوراتورلار كلۋبى قاۋىمداستىعىنىڭ باسشىسى گۇلنار نۇرعانات قىزى، «ەۆروپوليس» مەيرامحاناسىنىڭ وكىلى مارات جانبولات، دۇنگەن رەسپۋبليكالىق ەتنومادەني ورتالىعى ءتوراعاسىنىڭ ورىنباسارى، الماتى قالاسى دۇنگەن مادەني ورتالىعى انالار كەڭەسىنىڭ ءتوراعاسى ريمما ماسىروۆا قاتىستى.
«سپيكەرلەر اتالعان اۋرۋدىڭ تارالۋىنا سەبەپ بولاتىن ناشاقورلىق جايىندا ايتىپ، قان ارقىلى بەرىلەتىن ينفەكسيالىق كەسەل تۋرالى ءدارىس وقىپ، اتالعان تاقىرىپ بويىنشا سوتتالعان جاسوسپىرىمدەرگە تولىق اقپارات بەردى. ماقسات، ارينە، جاستاردى قورعاۋ. ءبىز ءۇشىن بارلىق بالانىڭ اماندىعى، دەنساۋلىعىنىڭ جاقسى بولۋى ماڭىزدى»، – دەيدى ەپيدەميولوگ-دارىگەر سەيىلحان تالاسبايەۆ.
ال ءوز كەزەگىندە كولونيادا جازاسىن وتەپ جاتقان جاسوپىرىمدەر جيتس تاقىرىبىنا ارناپ دايىنداعان قابىرعا گازەتتەرىن قورعاپ، ونداعى وزدەرى سالعان سۋرەتتەردىڭ مازمۇنىن، كوتەرەر جۇگىن جان-جاقتى ءتۇسىندىرىپ بەردى.
ءىس-شارا سوڭىندا كەلگەن قوناقتار سۋرەت بايقاۋىندا جەڭىمپاز بولعان ءۇش ءجاسوسپىرىمدى ماراپاتتادى، سىيلىق ۇسىندى. ال مەيرامحانا وكىلى داستارحانعا بالالارعا دەپ ارنايى كوتەرە كەلگەن پيسسا، جەمىس-جيدەك، ءتاتتى سۋسىندارىن قويدى. جاستار مەيماندارعا راحمەتىن ايتتى.