الماتى قالاسىندا جول قاۋىپسىزدىگىن ارتتىرۋعا باعىتتالعان رەسپۋبليكالىق "ءقاۋىپتى جۇرگىزۋشى" جەدەل-پروفيلاكتيكالىق ءىس-شاراسى وتكىزىلىپ جاتىر، - دەپ حابارلايدى Aqshamnews.kz.
الدىن الۋ شارالارىنىڭ نەگىزگى ماقساتى – جول قوزعالىسى ەرەجەلەرىنىڭ ساقتالۋىن باقىلاۋدى كۇشەيتۋ جانە جول-كولىك وقيعالارىنىڭ الدىن الۋ. ونىڭ بارىسىندا جول قوزعالىسىنا تىكەلەي ءقاۋىپ توندىرەتىن ورەسكەل قۇقىق بۇزۋشىلىقتاردى انىقتاۋ مەن جولىن كەسۋگە ەرەكشە نازار اۋدارىلادى.
- جول قاۋىپسىزدىگى ماسەلەلەرى – ءبىزدىڭ باستى باسىمدىقتارىمىزدىڭ ءبىرى. پاترۋلدىك ەكيپاجدار كۇشەيتىلگەن تارتىپتە قىزمەت اتقارۋدا. اۆاريالىق جاعدايلارعا تىكەلەي اسەر ەتەتىن ورەسكەل بۇزۋشىلىقتار بويىنشا باقىلاۋ ايتارلىقتاي كۇشەيتىلدى، – دەپ اتاپ ءوتتى الماتى قالاسى پد اكىمشىلىك پوليسيا باسقارماسى باستىعىنىڭ ورىنباسارى تيمۋر سەرىك ۇلى.
سوڭعى تاۋلىكتە پوليسيا قىزمەتكەرلەرى ماس كۇيىندە كولىك باسقارۋدىڭ التى فاكتىسىن، مەملەكەتتىك ءنومىرسىز جۇرگەن 12 جۇرگىزۋشىنى، سونداي-اق جالعان ءنومىر قويىلعان ەكى كولىكتى جانە وزگە دە ءبىرقاتار ورەسكەل قۇقىق بۇزۋشىلىقتى انىقتادى. پروفيلاكتيكالىق جۇمىستار جالعاسۋدا. پوليسيا قالا تۇرعىندارى مەن قوناقتارىن جول قوزعالىسى ەرەجەلەرىن قاتاڭ ساقتاۋعا شاقىرادى.