ولار مەكەمەدەگى العاشقى كۇنى كارانتينگە جاتقىزىلادى.
وڭالتۋ ورتالىقتارىندا ورىن تاپشى. الماتىداعى الەۋمەتتىك بەيىمدەۋ ورتالىعىن ءقازىردىڭ وزىندە تۇراقتى مەكەنى جوق 185 ادام پانالاپ وتىر، دەپ حابارلايدى Almaty-akshamy.kz Almaty.tv-گە سىلتەمە جاساپ.
مەكەمە قىزمەتكەرلەرى ولاردىڭ سانى قىتىمىر قىستىڭ ايازدى كۇندەرىنە بايلانىستى ءالى دە ارتا تۇسەتىنىن ايتادى. ودان بولەك، بارار جەرى، باسار تاۋى قالماي، كوشە كەزگەندەر قاتارىنىڭ كوبەيۋى دە سەبەپ بولعان كورىنەدى.
الەۋمەتتىك بەيىمدەۋ ورتالىعىنىڭ قىزمەتكەرلەرى ءدال وسى كولىكپەن قالانى كۇندەلىكتى ارالاپ، پاناسىزدار كەزدەسسە، ولاردى ءتيىستى مەكەمەگە جەتكىزىپ وتىرادى. تۇراقتى مەكەنى جوقتار دا، اسىرەسە، ايازدى كۇندەردە مامانداردىڭ ۇسىنىسىنا بىردەن كەلىسە كەتەدى. سەبەبى ولار دا جىلۋ ىزدەيدى. الايدا دەگەنىنەن قايتپاي، باس تارتىپ جاتاتىنداردىڭ دا بارىن ورتالىق قىزمەتكەرلەرى جوققا شىعارمادى.
«ولارعا كوشەدە ءومىر ءسۇرۋ وبرازى ۇناپ قالعاندىقتان... ءبىزدىڭ ورتالىقتا ىشىمدىك ىشۋگە، بىرەۋمەن توبەلەسۋگە، ۇرىس-كەرىس شىعارۋعا تىيىم سالىنعان. سوندىقتان كوشەدە قالىپ، ءىشىپ جۇرە بەرگەندى ءجون كورەتىن ادامدار بار»، – دەدى پسيحولوگ جۇلدىز الماعانبەتوۆا.
قالانىڭ ءار بۇرىشىنان اكەلىنگەن پاناسىزدار مەكەمەدەگى العاشقى كۇنى كارانتينگە جاتقىزىلادى. ءتورت ۋاقىت ىستىق تاماقپەن، تازا كيىممەن، توسەك-ورىنمەن قامتاماسىز ەتىلەدى. ودان بولەك، كەلگەندەردىڭ بارلىعى ءوزى تۋرالى بىرەر اقپار بەرىپ، پسيحولوگيالىق كومەك الادى.
پاناسىز قالعان جاندار بۇل ورتالىققا جەتكىزىلگەننەن كەيىن مىندەتتى تۇردە مەديسينالىق تەكسەرۋدەن وتەدى. قىزمەتكەرلەردىڭ ايتۋىنشا، مۇندا جەتكىزىلگەن ادامداردىڭ كوبىندە ۇسىك الۋ، ىرىڭدەۋ سىندى ءتۇرلى دەنە جاراقاتى انىقتالىپ جاتادى.
مەكەمە باسشىلىعىنىڭ سوزىنشە، مۇندا ەشكىمدى ماجبۇرلەپ ۇستامايتىندىقتان، باياعى ادەتىنە باسىپ، ورتالىقتان كەتىپ قالاتىندار دا بارشىلىق. الايدا ءومىرىن وزگەرتۋدى قالايتىنداردىڭ سانى دا از ەمەس كورىنەدى. مىسالى، ورتالىقتى 1 جىلدان استام ۋاقىت پانالاپ جاتقان ماحاببات قايداروۆانىڭ تاعدىر تالكەگىنە تۇسپەس بۇرىن جوعارى ءبىلىمى مەن جەكە كاسىبى بولعان.
«جۇبايىمنىڭ ءولىمى اۋىر سوققى بولدى. ونى ەمدەۋ ءۇشىن نەسيە مەن قارىزعا باتتىم. شىعىن دا كوبەيدى. ال بارلىعىن قايتارۋعا قاراجاتىم بىلاي تۇرسىن، مۇلكىم دە جەتپەدى. سودان ءۇيىمدى ساتتىم. دىمسىز دالادا قالدىم»، – دەدى قىزمەت الۋشى ماحاببات قايداروۆا.
مەكەمە قىزمەتكەرلەرىنىڭ سوزىنە سەنسەك، «قاڭعىباستار» قاتارىنا قوسىلعانداردىڭ دەنى - ىشىمدىكتىڭ كەسىرىنەن بارىنان ايىرىلعاندار. ايتا كەتسەك، الەۋمەتتىك بەيىمدەۋ ورتالىعىندا شامامەن 200 ادامعا ورىن بار.
«كۇننىڭ سۋىتۋىنا بايلانىستى قىزمەت الۋشىلار سانى كۇندەلىكتى ءوسىپ جاتىر. بىلتىرعى جىلى ءبىزدىڭ ورتالىقتان، ستاتيستيكا بويىنشا، 927 ادام قىزمەت الىپ شىققان. كەلگەنى بار، كەتكەنى بار. شىعادى، كەلەدى. ورنىنا باسقالارى كەلىپ جاتادى»، – دەدى «پانا» الەۋمەتتىك بەيىمدەۋ ورتالىعىنىڭ ديرەكتورى بولات ايتمۇرزايەۆ.
مەكەمە ديرەكتورىنىڭ سوزىنە سەنسەك، ورىن تاپشىلىق ماسەلەسىن شەشۋ ماقساتىندا بۇگىندە 140 ادامعا ارنالعان تاعى ءبىر ورتالىقتىڭ قۇرىلىسى ءجۇرىپ جاتىر. ياعني، جاقىن ارادا مىنا مەكەمەنى پانا ەتكەندەردىڭ ءبىر بولىگى سوندا كوشۋى مۇمكىن.