ساتبايەۆ ۋنيۆەرسيتەتىندە بوستاندىق اۋدانى اكىمى اپپاراتىنىڭ ۇيىمداستىرۋىمەن الەۋمەتتىك قورعاۋ جۇيەسى قىزمەتكەرلەرىنىڭ كۇنىنە ارنالعان مەرەكەلىك ءىس-شارا ءوتتى. وندا اۋدان وكىلدەرى جينالعان قاۋىمدى كاسىبي مەرەكەسىمەن قۇتتىقتاپ، العىسىن جەتكىزدى.
"الەۋمەتتىك قىزمەتكەرلەر – بۇل ۇنەمى مۇقتاج جانداردىڭ جانىنان تابىلىپ جۇرەتىن، ولارعا كۇندەلىكتى، تۇراقتى كومەكتەسەتىن، جالعىزىلىكتى قارتتارعا، مۇگەدەكتىگى بار ادامدارعا، ومىرلىك قيىن جاعدايعا تاپ بولعان وتباسىلارعا قولداۋ كورسەتەتىن، اۋىرتپالىعىن كوتەرىسۋدەن قاشپايتىن جانى ىزگى، مەيىرىمدى ادامدار. ءيا، سىزدەر اتقارىپ جۇرگەن ەڭبەك الەمدەگى ەڭ ىزگى جانە شىدامدىلىقتى، كاسىبيلىكتى، ۇلكەن جۇرەكتى قاجەت ەتەتىن سالا. وسىناۋ ادامي قۇندىلىقتار تورىنەن كورىنىپ جۇرگەن ءارقايسىسىڭىز ءۇشىن قۋانىشتىمىن"، – دەدى بوستاندىق اۋدانى اكىمىنىڭ مىندەتىن اتقارۋشى ساكەن ارالبايەۆ.
ءىس-شارا الەۋمەتتىك سالانىڭ بارلىق قىزمەتكەرىنە العىس بىلدىرۋگە، ولاردىڭ قوعامنىڭ دامۋىنا جانە حالىقتىڭ ءومىر ءسۇرۋ ساپاسىن جاقسارتۋعا قوسىپ جۇرگەن ولشەۋسىز ەڭبەگىن اتاپ وتۋگە باعىتتالعان.
مەرەكەدە وسى سالادا ابىرويلى ەڭبەك ەتىپ جۇرگەن ماماندار 7 نوميناسيا بويىنشا ماراپاتتالدى. ولاردىڭ ىشىندە «اۋداننىڭ ۇزدىك الەۋمەتتىك قىزمەتكەرى»، «اۋداننىڭ ۇزدىك مەديسينالىق-الەۋمەتتىك مەكەمەسى»، «اۋدان بولىمشەسىنىڭ ۇزدىك مەڭگەرۋشىسى» سىندى اتالىمدار بار. جەڭىمپازدار انىقتالاردا الەۋمەتتىك قىزمەتكەرلەر بارىپ قىزمەت كورسەتىپ جۇرگەن وتباسىلاردىڭ دا باعاسى، ىقىلاسى ەسكەرىلدى دەيدى ساراپشىلار.
جالپى، بوستاندىق اۋدانىندا 100-دەن استام الەۋمەتتىك قىزمەتكەر بار. مەرەكەدە سول جانداردىڭ اراسىنان وزا شاپقاندارى بۇگىن العىسقا، ماراپاتقا يە بولدى. قۇشاقتارى گۇلگە، جۇزدەرى قۋانىشقا تولدى.
مەرەيى تاسىعان جانداردىڭ قۇرمەتىنە باقتيار تايلاقبايەۆ، تاحمينا اشىمبەكوۆا، «اعايىندى» توبى ءان-جىردان شاشۋ شاشتى.
"مەن الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ №1 بولىمشەسىندە ەڭبەك ەتەمىن. وسى سالادا جۇرگەنىمە 15 جىل بولدى. قامقورلىعىمدا مۇمكىندىگى شەكتەۋلى التى بالا بار. ولاردىڭ جۇيكە جۇيەسىندە اۋىتقۋ بولعانىمەن، مەنى تانيدى، كۇندە كۇتەدى، ىزدەيدى، ەسىكتەن كورىنسەم قۋانادى. كەتىپ بارا جاتسام قول بۇلعاپ قيماي قوشتاسادى. سەبەبى مەن جۇمىس كۇندەرى ولارمەن ىلعي بىرگەمىن. بالدىرعانداردىڭ قولىنا قالام، قاعاز ۇستاپ سۋرەت سالۋىنا، تاماق ىشۋىنە دە كومەكتەسەمىن. ولار كوڭىلدەنسە ءان دە سالىپ، بي بيلەيدى. اتا-انالارى جۇمىسقا كەتكەندە ولاردىڭ ءبىر جۇگىن كوتەرىسىپ، سولاي بالالارىنا قارايلاسامىز. ۇلكەندەردىڭ مۇڭىن دا تىڭداپ، ولارعا سوزىمىزبەن، جۇرەگىمىزدىڭ جىلۋىمەن قولداۋ بىلدىرەمىز. ياعني ءبىزدىڭ ميسسيامىز ۇلكەن. وسى ەڭبەگىمىزدىڭ باعالانىپ جاتقانىنا قۋانىشتىمىن. وسىلاي ءار وتباسىنا سۇيەۋ بولىپ، ادامگەرشىلىكتىڭ، قامقورلىقتىڭ، جاناشىرلىقتىڭ جارقىن ۇلگىسىنە اينالعان بارلىق ارىپتەسىم قۇرمەتكە لايىق دەپ بىلەمىن"، – دەيدى «اۋداننىڭ ۇزدىك الەۋمەتتىك قىزمەتكەرى» نوميناسياسىنىڭ جەڭىمپازى راۋشان قالبابايەۆا.