الماتى اكىمى دارحان ساتىبالدى «الماتى تازالىق» كوممۋنالدىق كاسىپورنىنا بارىپ، قالانى تازالاۋ جانە اباتتاندىرۋ كولەمىن كەڭەيتۋگە باعىتتالعان 2026 جىلعا ارنالعان جوسپارلارمەن تانىستى.
كاسىپورىن ۇسىنعان جاڭا جوباعا سايكەس، الداعى جىلدان باستاپ الماتىدا كوشە-جول جەلىسىن جانە جاسىل ايماقتاردى كۇتىپ ۇستاۋ «قاسبەتتەن قاسبەتكە دەيىن» قاعيداتى بويىنشا جۇزەگە اسىرىلماق. بۇل ءتاسىل ءبىر ۇيىمعا جول توسەمىن، تروتۋارلاردى، ارىق جۇيەلەرىن، سونداي-اق جاسىل جەلەكتەر مەن بۋفەرلىك اۋماقتاردى كۇتىپ ۇستاۋ مىندەتىن كەشەندى تۇردە جۇكتەيدى.
كاسىپورىننىڭ مالىمەتىنشە، 2026 جىلى «الماتى تازالىق» قىزمەت كورسەتەتىن اۋماقتىڭ كولەمى 15 ميلليون شارشى مەتردەن 26 ميلليون شارشى مەترگە دەيىن ۇلعايماق. بۇل تىزىمگە جالپى ۇزىندىعى 1180 شاقىرىم بولاتىن 687 ماگيسترالدى كوشە ەنەدى. قالانىڭ ينفراقۇرىلىمىن ساپالى ۇستاۋ ءۇشىن باعباندار، اگرونومدار، اربوريستەر مەن دەندرولوگتار قاتارىن كوبەيتۋ جانە 319 بىرلىك جاڭا ارنايى تەحنيكا ساتىپ الۋ جوسپارلانعان.
سونىمەن قاتار، جول-جوندەۋ جانە تازالىق جۇمىستارىنا ارنالعان قازىرگى تاريفتەر 2001 جىلى بازالىق باعالار نەگىزىندە ەسەپتەلىپ، ينفلياسيا دەڭگەيىندە عانا تۇزەتىلىپ كەلگەنى اتاپ ءوتىلدى. ال ماتەريالدار مەن رەسۋرستاردىڭ قۇنى ايتارلىقتاي وسكەن.
قازىرگى تاڭدا كوشە-جول جەلىسى مەن جاسىل ايماقتاردى كۇتىپ ۇستاۋعا ارنالعان تاريفتەردى جاڭارتۋ جانە قايتا ەسەپتەۋ جۇمىستارى جۇرگىزىلىپ جاتىر. بۇل باعىتتاعى زەرتتەۋلەرمەن قازاقستان جول عىلىمي-زەرتتەۋ ينستيتۋتى اينالىسىپ وتىر. اكىم قالا قىزمەتتەرىنە وسى جۇمىستى قاراشا ايىنىڭ سوڭىنا دەيىن اياقتاپ، ءماسليحاتتىڭ قاراۋىنا ۇسىنۋدى تاپسىردى.
دارحان ساتىبالدى جوسپارلانعان جوبالاردى ءتيىمدى جۇزەگە اسىرۋدى جانە قالا ينفراقۇرىلىمىن كۇتىپ-باپتاۋدى قامتاماسىز ەتۋدى مىندەتتەدى.
«بىزگە «قاسبەتتەن قاسبەتكە دەيىن» قاعيداتىنا كوشۋ قاجەت. قىزمەت ساپاسىن ارتتىرۋ ءۇشىن كادر الەۋەتىن نىعايتىپ، زاماناۋي تاسىلدەردى ەنگىزۋ ماڭىزدى. قالا كوممۋنالدىق كاسىپورىنداردى قاجەتتى تەحنيكامەن جانە رەسۋرسپەن قامتاماسىز ەتىپ وتىر. ەندى باستىسى، سەنىمنەن شىعىپ، تۇرعىندارعا جوعارى دەڭگەيدەگى قىزمەت كورسەتۋ»، — دەدى الماتى اكىمى.
سونىمەن قاتار، كوممۋنالدىق قىزمەتتەردىڭ جۇمىسىن ءتيىمدى باسقارۋ مەن اشىقتىقتى قامتاماسىز ەتۋ ماقساتىندا الماتىدا كاسىپورىنداردىڭ قىزمەتىن ناقتى ۋاقىت رەجيمىندە باقىلاۋعا مۇمكىندىك بەرەتىن ءبىرىڭعاي سيفرلىق پلاتفورما ەنگىزىلەدى. جۇيە ارقىلى تەحنيكانىڭ قوزعالىسى، مەردىگەر ۇيىمداردىڭ جۇمىس تيىمدىلىگى جانە رەسۋرستاردىڭ ءبولىنۋى تالدانادى. بولاشاقتا بۇل جۇيە قالانىڭ باسقا دا قىزمەتىنە ەنگىزىلىپ، جەدەل باسقارۋ ورتالىعىمەن بىرىكتىرىلەدى.