جەڭىستىڭ 80 جىلدىعىنا وراي الماتىدا ۇلى وتان سوعىسى ارداگەرلەرىنە ارنالعان 8 اللەيا اشىلدى
جەڭىستىڭ 80 جىلدىعىنا وراي الماتى قالاسىنىڭ بارلىق سەگىز اۋدانىندا ءبىر مەزگىلدە ۇلى وتان سوعىسى ارداگەرلەرىنىڭ جاڭا اللەياسى اشىلدى. بۇل بەيبىت ءومىر سىيلاعان باتىرلارعا دەگەن ەستەلىك پەن العىس بەلگىسى. ءىس-شارا رەسپۋبليكالىق «تازا قازاقستان» باعدارلاماسى جانە «الماتى – ءبىزدىڭ ورتاق ءۇيىمىز» اتتى قالالىق ناۋقان اياسىندا ءوتتى.
نەگىزگى اللەيانىڭ اشىلۋى 28 گۆاردياشى-پانفيلوۆشىلار ساياباعىندا ءوتتى. بۇل كۇنى قالا اكىمى ەربولات دوسايەۆ سوعىس ارداگەرلەرىنىڭ تۋىستارىمەن كەزدەستى. قالا باسشىسى ارداگەرلەر مەن ولاردىڭ وتباسىنا العىس ءبىلدىرىپ، قۇرمەت كورسەتتى.
«جەڭىستىڭ 80 جىلدىعىن الماتىدا ەرەكشە فورماتتا وتكىزۋدى ءجون كوردىك: قالانىڭ بارلىق اۋدانىندا ءبىر مەزگىلدە ۇلى وتان سوعىسى ارداگەرلەرىنىڭ اللەياسى اشىلدى. ءار اۋداننىڭ تۇرعىندارى وسى ورىنداردى ءبىلىپ، باتىرلارىمىزدىڭ رۋحىنا تاعزىم ەتۋگە كەلىپ تۇرسا دەيمىن. الماتىدا بۇگىندە 21 ارداگەر تۇرادى – بۇل ەل بويىنشا ەڭ ۇلكەن كورسەتكىش. سونىمەن قاتار، سوڭعى ەكى جىلدا ومىردەن وزعان ارداگەرلەردى دە ەسكە الامىز. بارلىعى 29 اعاش وتىرعىزىلادى. بۇل اللەيالار كەلەشەك ۇرپاق – بالالار، نەمەرەلەر، شوبەرەلەر ءۇشىن باتىرلىقتىڭ سيمۆولىنا اينالادى. ولار اتا-بابالارىنىڭ ەرلىگىمەن ماقتانىپ، ۇلى جەڭىستىڭ قانداي باعامەن كەلگەنىن ۇمىتپايدى»، – دەدى ەربولات دوسايەۆ.
قالا اكىمى سوعىس ارداگەرلەرىنىڭ جاقىندارىمەن بىرگە بيىكتىگى 6 مەترلىك ءىرى جوكە اعاشىن وتىرعىزدى. بۇل اعاش بەكەر تاڭدالماعان: جوكە – ومىرشەڭدىكتىڭ، مىقتىلىقتىڭ سيمۆولى ءارى كۇتىمى جەڭىل. اعاش وتىرعىزۋ الدىندا كوگالداندىرۋ قىزمەتى اعاش دىڭدەرىنەن تىرەۋ قوندىرمالارىن ورناتىپ، تامىرىن سۋارۋعا جاعداي جاساعان. ءار اعاشتىڭ جانىنا ۇلى وتان سوعىسى ارداگەرىنىڭ ەسىمى جازىلعان تاقتايشا قويىلدى.
اعاش وتىرعىزۋعا بىلتىر قازاندا 100 جاسقا تولعان ۇوس ارداگەرى قامبار سارسەنوۆ تە قاتىستى. قالا اكىمى ەربولات دوسايەۆ قامبار امىرۇلىمەن جانە ونىڭ نەمەرەلەرى مەن شوبەرەسىمەن بىرگە ەستەلىك اعاش وتىرعىزدى.
«بيىل ۇلى جەڭىستىڭ 80 جىلدىعىن اتاپ ءوتىپ جاتىرمىز. مۇنداي اللەيا ءۇشىن العىسىمىز شەكسىز. ءبىزدىڭ ۇرپاق وسى جەرگە كەلىپ، بۇل اعاشتاردى اتالارى وتىرعىزعانىن ەسكە الىپ جۇرەدى»، – دەدى قامبار ءامىر ۇلى.
ءىس-شارا كوڭىلدى جايلى جاعدايدا ءوتتى. قالا اكىمى ءار ارداگەردىڭ تۋىسىنا بارىپ، وزىنە جاقىن تارتىپ، اتا-بابالارىنىڭ ەرلىگى ءۇشىن العىس ءبىلدىرىپ، بالالارمەن ازىلدەسىپ، اعاش وتىرعىزۋعا جانە سۋ تاسۋعا كومەكتەستى. شىنايىلىققا تولى بۇل ءسات ەرەكشە ەدى.
ارداگەرلەردىڭ تۋىستارى دا جۇرەكجاردى العىس ءبىلدىردى. «جوكە – بۇل ەرەكشە ماعىنالى اعاش. ول ءوسىپ، تامىرىن جايىپ، ءبىزدىڭ باتىرلارىمىزدىڭ ماڭگى ەستەلىگىنە اينالادى. ءبىز بۇل جەرگە بالالارمەن كەلىپ، ولاردىڭ اتالارى مەن اجەلەرىنىڭ ەرلىكتەرى تۋرالى ايتىپ وتىرامىز»، – دەدى سوعىس ارداگەرىنىڭ نەمەرەسى يۋليا زاۆادسكايا.
ءىس-شاراعا قازاقستاننىڭ ەڭبەك سىڭىرگەن ارتيستەرى نۇرلان ابدۋللين، اسىلبەك ەڭسەپوۆ، اكتريسا جانار ايجانوۆا، سونداي-اق، پاريج وليمپياداسىنىڭ جۇلدەگەرلەرى – الەكساندرا لە، ناريمان قۇربانوۆ جانە يسلام ساتبايەۆ قاتىستى.
«مەن ءۇشىن بۇل ەرەكشە كۇن. اكەم سوعىس ارداگەرى ەدى، وكىنىشكە قاراي، ءقازىر ارامىزدا جوق. قاي جەردە بولسام دا، 9 مامىر كۇنى اكەمنىڭ بەيىتىنە بارىپ، ەسكە الامىن. اكەم ۇنەمى: «اسپان اشىق بولسىن» دەيتىن. ال انام ازىلمەن: «اسپاندا نەڭ بار، بالالارىڭدى ۇيگە ەرتىپ كەل» دەيتىن. ءقازىر بۇل ءسوزدىڭ قانشالىقتى ماڭىزدى ەكەنىن تۇسىندىك. اسپانىمىز اشىق بولسىن، بەيبىتشىلىك پەن بىرلىك بولسىن. بارشاڭىزعا اماندىق تىلەيمىن»، – دەدى ق ر ەڭبەك سىڭىرگەن قايراتكەرى نۇرلان ابدۋللين.
«ءبىز «تازا قازاقستان» رەسپۋبليكالىق باعدارلاماسىنا قاتىسىپ جاتىرمىز. سپورتشىلار رەتىندە تەك جەڭىسپەن ەمەس، سۇيىكتى قالامىز الماتىنى كوركەيتۋ ارقىلى دا ۇلەس قوسقىمىز كەلەدى. ويتكەنى، تازالىق وزىمىزدەن باستالادى. بۇل اكسيا قالامىزدىڭ ەكولوگيالىق جاعدايىن جاقسارتۋعا كومەكتەسەدى»، – دەدى سپورتشى يسلام ساتبايەۆ.
ۇلى وتان سوعىسى ارداگەرلەرىنىڭ اللەياسى – بۇل تەك جاسىل ايماق ەمەس، ناعىز ەرلىكتىڭ ەسكەرتكىشى. سول كۇنى ساياباقتا 29 اعاش، ال 8 اللەيا بويىنشا جالپى 200 جوكە اعاشى وتىرعىزىلدى.