الماتى قالاسىندا ۇلى جەڭىستىڭ 80 جىلدىعىنا ارنالعان ماڭىزدى شارا ءوتتى. قالا اكىمى ەربولات دوسايەۆتىڭ باستاماسىمەن ۇلى وتان سوعىسى ارداگەرلەرىنىڭ اللەياسى اشىلدى. بۇل تۋرالى Aqshamnews.kz سايتى حابارلايدى.
اللەيانى اشۋ ءراسىمى الماتىنىڭ تاريحي ورتالىعى سانالاتىن 28 گۆاردياشى-پانفيلوۆشىلار اتىنداعى ساياباقتا ءوتتى. سالتاناتتى شاراعا قالا اكىمى ەربولات دوسايەۆ، ارداگەرلەر، ولاردىڭ وتباسىلارى، قازاقستاننىڭ ەڭبەك سىڭىرگەن ارتىستەرى مەن قوعام بەلسەندىلەرى قاتىستى.
بۇل ءىس-شارا ۇلى جەڭىستىڭ 80 جىلدىعىنا ارنالعان ەكولوگيالىق اكسيا اياسىندا ۇيىمداستىرىلدى. اكسيا «تازا قازاقستان» رەسپۋبليكالىق باعدارلاماسى مەن «الماتى – ءبىزدىڭ ورتاق ءۇيىمىز» جالپى قالالىق ناۋقانىنىڭ ءبىر بولىگى بولىپ تابىلادى.
اللەياعا جاسىل ەسكەرتكىش رەتىندە 6 مەترلىك ءىرى جوكە (ليپا) اعاشتارى وتىرعىزىلدى. ءاربىر اعاشتىڭ تۇبىنە ارداگەردىڭ ەسىمى جازىلعان ارنايى تاقتايشالار ورناتىلدى. اعاشتاردى وتىرعىزۋ كەزىندە زاماناۋي اگروتەحنيكالىق ادىستەر قولدانىلىپ، قايىڭ تىرەكتەرى مەن تامىردى سۋارۋ جۇيەلەرى ورناتىلدى.
اكىم ەربولات دوسايەۆ ءوز سوزىندە:
«ۇلى جەڭىس – ەلىمىزدىڭ تاريحىنداعى ماڭىزدى كەزەڭ. ءبىز بيىلعى مەرەيتويلىق جىلى الماتىنىڭ بارلىق اۋدانىندا ءبىر ۋاقىتتا ارداگەرلەر اللەياسىن اشۋدى ءجون كوردىك. بۇل ورىنداردا ءاربىر تۇرعىن باتىرلاردى ەسكە الىپ، رۋحىنا تاعزىم ەتە الادى»، – دەدى.
جيىن بارىسىندا ارداگەرلەردىڭ ۇرپاقتارى اللەيانىڭ اشىلۋىنا ريزاشىلىقتارىن ءبىلدىردى.
يۋليا زاۆادسكايا، ارداگەر ولگا ساۆەنكونىڭ نەمەرەسى:
«ليپا – رۋح كۇشى، توزىمدىلىك پەن ادالدىقتىڭ سيمۆولى. بۇل اعاشتار اتا-بابامىزدىڭ جانقيارلىق ەرلىگىن ەسكە سالادى»، – دەدى.
ليۋدميلا زينچەنكو، ارداگەر ۆاسيليي زينچەنكونىڭ قىزى:
«بۇل تاماشا شارا بىزگە ارداگەرلەردى ەسكە الۋعا مۇمكىندىك بەردى. بالالارىمىزعا باتىر اتالارىنىڭ ەرلىگىن ايتىپ بەرەتىن بولامىز»، – دەدى.
ساۋلە كولۋمبايەۆا، ارداگەر داربالا جاباتايەۆانىڭ قىزى:
«بۇل كۇن – بارلىق ارداگەر وتباسىلارى ءۇشىن ماڭىزدى. وتىرعىزىلعان اعاشتار – بەيبىت اسپان سىيلاعان باتىرلارعا ارنالعان ءتىرى ەسكەرتكىش»، – دەپ العىسىن جەتكىزدى.
مەرەكەلىك شاراعا 100 جاستاعى سوعىس ارداگەرى كامبار سارسەنوۆ تە قاتىستى.
«ارداگەرلەردىڭ ەسىمىن ماڭگى ەستە قالدىرۋ ءۇشىن جاسالعان بۇل باستامانى قۇپتايمىز. بولاشاق ۇرپاق وسى اعاشتاردىڭ جانىندا تۇرىپ، اتالارىنىڭ ەرلىگىن ەسكە الادى»، – دەدى قارت جاۋىنگەر.
الماتىنىڭ سەگىز اۋدانىندا دا ۇلى وتان سوعىسى ارداگەرلەرىنىڭ اللەيالارى اشىلدى. بارلىعى 200 جوكە اعاشى وتىرعىزىلدى. بۇل باستاما ۇلى جەڭىستىڭ 80 جىلدىعىن مەرەكەلەۋدىڭ بىرەگەي ۇلگىسى بولىپ، ارداگەرلەر رۋحىنا تاعزىم ەتۋدىڭ ماڭىزدى بەلگىسىنە اينالدى.
الماتىدا اشىلعان ارداگەرلەر اللەياسى – باتىرلاردى ماڭگى ەستە قالدىرۋدىڭ كورنەكى ۇلگىسى. جوكە اعاشتارى ۇلى وتان سوعىسىنىڭ قاھارماندارىن ەسكە سالىپ، بولاشاق ۇرپاققا رۋحاني مۇرا رەتىندە ساقتالادى.