ءابىلحان قاستەيەۆ اتىنداعى ق ر مەملەكەتتىك ونەر مۋزەيىندە قوردان الىنعان جادىگەرلەردەن تۇراتىن «قازاقستاننىڭ كىتاپ گرافيكاسىنداعى ۇلتتىق ەپوس» كورمەسى اشىلدى، دەپ حابارلايدى aqshamnews.kz
كورمەدە 90-عا جۋىق گرافيكالىق جۇمىس، سونىمەن قاتار، ۇلتتىق ەپوستىڭ قازىنالارىن ساقتايتىن سيرەك باسىلىمدار ۇسىنىلعان. كەلۋشىلەر كلاسسيكالىق وفورتتان باستاپ، ءتۇپنۇسقا گرافيكاعا دەيىنگى ءتۇرلى كوركەمدىك تەحنيكادا ورىندالعان اڭىزعا اينالعان باتىرلاردىڭ، ارۋلار مەن دانالاردىڭ جانە ميفولوگيالىق كەيىپكەرلەردىڭ جارقىن بەينەلەرىن تاماشالاي الادى. ءار تۋىندى سۋرەتشىلەردى ادەبي ماتەريالدى تەرەڭ تۇسىنۋگە شابىتتاندىرعان ۇلتتىق ەپوستىق جىرلاردىڭ سيۋجەتتەرى مەن بەينەلەرىنىڭ بايلىعىن كورسەتەدى.
كورمەدە ەرەكشە ورىن العان جۇمىستاردىڭ قاتارىندا ءابىلحان قاستەيەۆتىڭ «قوبىلاندى باتىر» (1932)، اۋباكىر ىسمايىلوۆتىڭ «قازاق حالقىنىڭ ەپوستىق جىرلارىنا يلليۋستراسيالار» (1928)، «قوبىلاندى باتىر» (1941) جانە «الپامىس باتىر» (1943)، كونستانتين بارانوۆتىڭ «بوزجىگىت» پەن «ايمان-شولپان» (1941)، ەۆگەنيي سيدوركيننىڭ «الپامىس باتىر» (1976-1977) جانە «قىز جىبەك» (1973) جىرلارىنا ارنالعان گرافيكالىق پاراقتارى مەن يلليۋستراسيالارى بار. ولاردىڭ جۇمىستارى كەيىپكەرلەردىڭ ەموسيونالدىق اسەرلىلىگىمەن، جارقىن مەرەكەلىك اتموسفەراسىمەن جانە ۇستامدى مونۋمەنتالدىلىعىمەن ەرەكشەلەنەدى.
– ارسەن بەيسەمبينوۆتىڭ «قوزى كورپەش – بايان سۇلۋ» ەپوسىنا جاساعان گرافيكاسى تەرەڭ كوركەمدىك ويعا تولى. اعىمسالى دۇزەلحانوۆتىڭ «ايمان-شولپان» شىعارماسىنا ارنالعان يلليۋستراسيالارى ليريزم مەن پىشىندەردىڭ جۇمساق پلاستيكاسىمەن ەرەكشەلەنەدى. حاسەن ابايەۆتىڭ «قامبار باتىر» ەپوسىنا ارنالعان ەڭبەكتەرى كورەرمەندى ەجەلگى باتىرلىق ەرلىكتەر الەمىنە جەتەلەيدى. مۇرىن جىراۋ بەينەسىنەن شابىت العان تەمىرحان وردابەكوۆتىڭ تۋىندىلارى قازاق مادەنيەتىندە ەپيكالىق جىرشىلاردىڭ ماڭىزدىلىعىن ايشىقتايدى. جوعارىدا اتالعان جانە وزگە دە كوپتەگەن گرافيكالىق تۋىندىلار عاسىرلار بويى ۇرپاقتان-ۇرپاققا جالعاسىپ، قازاق حالقىنىڭ مادەني كودى مەن رۋحاني قۇندىلىقتارىن ساقتاعان ەپوستارعا جاڭا كوزقاراسپەن قاراۋعا مۇمكىندىك بەرەدى، – دەيدى كورمە جەتەكشىسى سامال مامىتوۆا.